Dükanlardakı satıcılar insan səhhəti üçün ziyanlı olan siqaretin qablarını toplayaraq Tovuz sakini Hidayət Ələkbərova veriblər. Bu günə qədər 15 mindən çox qutu toplayıb. Çoxları onun kolleksioner olduğunu düşünsələr də amma 70 yaşlı Tovuz sakini daha da irəli gedərək bu lazımsız qutulardan maraqlı əl işləri düzəldərək öz yaşadığı evin divarını bəzəyib.

Tovuz sakini Hidayət Ələkbərovun evinə gələnlərin diqqətini çəkən bu dekorasiyanın ərsəyə gəlməsi uzun müddət vaxt aparıb. Ən maraqlısı isə odur ki, usta bu işi başqa evlərdə görə bilməyəcəyini deyir. Səbəb isə ona lazım olacaq materialların müasir siqaret qutularının üzərində olmamasıdır. Onun sözlərinə görə, bu fiqurlar təsadüf nəticəsində yaranıb.

İllərdi toplanan xam məhsuldan fiqurlar hazırlandıqdan sonra yapışdırma işi aparılır. Hidayət kişi deyir ki,dizayner və ya dekorasiya təhsili almayıb. Amma o, bu işinin davam etdirilməsini, yaşadılmasını istəyir. Bunun üçün də kiçik yaşlı nəvəsini öyrətməyə çalışır. (Region TV)