Mobil telefonlar ayaqqabıdan enerji yığacaq - FOTO

Bu gedişlə yaxın zamanlarda mobil telefonlar üçün xüsusi enerji mənbəyinə – "adaptor"lara ehtiyac qalmayacaq.

Publika.az xəbər verir ki, buna səbəb Türkiyənin Mersin vilayətinin Erdemli mahalının Akdəniz orta məktəbinin istedadlı şagirdi Furkan Faruk Aslanın mobil telefonlar üçün xüsusi enerji mənbəyi kəşf etməsidir. Həmin aparatı adi ayaqqabılara yapışdırmaqla mobil telefonları saatlarla enerji mənbəyinə qoşmaqdan azad etmək mümkündür.

Məsələ burasındadır ki, 15 yaşlı 8-ci sinif şagirdinin ixtira etdiyi xüsusi 9 voltluq sistem insan addımlarından enerji toplayaraq onu mobil telefonlara ötürür və bununla da telefonlar enerji yığır.

Yeniyetmənin bu ixtirası Türkiyənin müvafiq qurumları tərəfindən dəyərləndirilib və o, müəlliflik hüququ qazanıb. Onun ixtirası ilə hətta bir sıra xarici ölkələrdə də maraqlanmağa başlayıblar. Maraqlıdır ki, mobil telefon texnologiyaları üzrə ekspertlər bununla bağlı dəfələrlə müxətlif cəhdlər göstərsələr də, onların səyləri uğursuz olub. Bu səbəbdən türk şagirdin ixtirası böyük rezonans doğurub.

Qeyd edək ki, Furkan Faruk Aslan əvvəllər də bir sıra ixtiralara imza atıb.

Anar Tağıyev