Dünya

Ukraynada rus diversant tutulub

11 Mart 2014 23:10

Ukrayna Təhlükəsizlik Xidməti (UTX) Donetsk şəhərində Rusiya vətəndaşını saxlayıb. Bildirilir ki, saxlanılan şəxs Ukraynaya təxribat qruplarının yaradılması məqsədilə keçib.

Ukrayna Təhlükəsizlik Xidməti (UTX) Donetsk şəhərində Rusiya vətəndaşını saxlayıb. Bildirilir ki, saxlanılan şəxs Ukraynaya təxribat qruplarının yaradılması məqsədilə keçib.

Bu barədə UTX sədri Valentin Nalivayçenko açıqlama verib. O, bildirib ki, saxlanılan şəxs 1977-ci ildə Krımda anadan olub, Rusiya vətəndaşıdır və hazırda Moskvada yaşayır.

UTX-dan verilən məlumatda bildirilir ki, Ukraynaya gələn Rusiya vətəndaşı son 15 gündür təhlükəsizlik qüvvələri tərəfindən izlənilir. Saxlanılan şəxsin Donetskdə yerləşən evində axtarış tədbirləri nəticəsində partlayıcı maddələr, detonatorlar, müxtəlif növ küt alətlər aşkar edilib.

Ukrayna Təhlükəsizlik Xidməti saxlanılan Rusiya vətəndaşının ölkəyə təxribat törətmək məqsədilə gəldiyini bildirib. /anspress/