Dünya

Xəzər donanması İŞİD-i bombaladı: 26 qanadlı raketlə - VİDEO (YENİLƏNİB)

7 Oktyabr 2015 19:22

Rusiyanın Hərbi Dəniz Qüvvələrinin Xəzər dənizi donanması İŞİD terror qruplaşmasının Suriyadakı mövqelərini vurub.

Publika.az “RİA-Novosti” agentliyinə istinadən xəbər verir ki, bu barədə Rusiyanın müdafiə naziri Sergey Şoyqu prezident Vladimir Putinə verdiyi hesabatında bildirib.

“İŞİD-in 11 mövqeyi dörd gəmidən 26 raketlə vurulub. Hədəfə alınan bütün mövqelər məhv edilib, mülki obyektlər zərər çəkməyib”, - Rusiya Müdafiə Nazirliyinin başçısı qeyd edib.

Şoyqu bildirib ki, terror qruplaşmasının silah-sursat anbarı, hərbi texnikası və təlim düşərgəsi məhv edilib.

Məlumata görə, İŞİD-in mövqeləri 3M14 qanadlı raketlərlə vurulub. 3M14 raketi 3M10 raketlərinin yeni versiyasıdır və Amerikanın “Tomaqavk” tipli raketlərin yerli analoqudur. Hərbçilərin məlumatına görə, 3M14 raketlərinin dəniz versiyası ən azı 2,6 min kilometr uzaqlıqda obyektləri məhv edə bilir.