Dünya

Almaniya da eynicinslilərin nikahını leqallaşdırdı

21 İyul 2017 19:48

Almaniya prezidenti Frank-Valter Ştaynmayer eynicinsiyyətli nikahların leqallaşdırılması haqqında qanun imzalayıb. Qeyd olunur ki, sənəd 2017-ci il oktyabrın 1-dən tez olmayaraq qüvvəyə minməlidir.

Publika.az bildirir ki, bu barədə “Associated Press” agentliyi məlumat yayıb.

Xatırladaq ki, iyunun 30-da Almaniya parlamentinin aşağı palatası eynicinsiyyətli nikahların tanınması barədə qanun layihəsini bəyənmişdi. Səsvermə nəticəsində 393 deputat dəstək, 226 deputat isə eynicinsiyyətli nikahlara qarşı çıxmışdı.

Maraqlıdır ki, AFR kansleri Angela Merkel qanun layihəsinin qəbul edilməsinin əleyhinə səs verib.

Xristian-demokrat ittifaqının sədri kimi o, deputatlara partiya rəhbərliyinin mövqeyinə istinad etməyərək "vicdan qanunları ilə" səs verməyə çağırıb.

Əvvəllər də eynicinsiyyətli nikahların leqallaşmasını istəməyənlərin əksəriyyəti məhz bu partiyanın üzvləri idi.

Zaur H.