Dünya

Ermənilər təhlükəsizlik üçün Bakıdan təminat istəyir

9 İyun 2014 18:35

Ermənistanın iki deputatı NATO Parlament Assambleyasının (PA) Cənubi Qafqazla bağlı iyunun 16 -18-də Bakıda keçiriləcək “Rose-Roth” seminarında iştirak edə bilər.

Publika.az-ın erməni mətbuatına istinadən verdiyi məlumata görə, ermənilər bunun üçün təhlükəsizliyə zəmanət istəyir.

Ermənistanın NATO PA-dakı nümayəndə heyətinin rəhbəri, parlament üzvü Koryun Naapetyan bu barədə keçirdiyi brifinqdə bildirib. Onun sözlərinə görə, 30 may –1 iyun tarixlərində Vilnüsdə keçirilən NATO PA-nın yaz sessiyası çərçivəsində sözügedən məsələ NATO PA-nın birinci katibi ilə müzakirə edilib.

Xatırladaq ki, “Rose Roth” NATO PA üzvlərini müxtəlif regionlarda baş verən proseslər haqqında müntəzəm və dərindən məlumatlandıran məşvərət formatıdır. İyunun 24 -26-da Azərbaycanda NATO PA-nın daha bir “Rose-Roth” seminarı olacaq.

"Rose Roth" seminarları Yerevanda iki dəfə – 2005 və 2010-cu illərdə keçirilib.

Ömər Dağlı