Ukrayna “hərbi forması”ndan rus diversantları çıxacaq

Rusiya Federasiyasının Rostov vilayəti ərazisində Ukraynanın Silahlı Qüvvələrinin formasını geyinən Rusiya diversiya-kəşfiyyat qrupları yığılır.

Publika.az-ın verdiyi xəbərə görə, bu barədə Hərbi-siyasi Tədqiqatlar Mərkəzinin rəhbəri, “İnformasiya müqaviməti” qrupunun nümayəndəsi Dmitri Tımçuk bildirib.

Hərbi ekspertin sözlərinə görə, diversiya-kəşfiyyat qrupları, əsasən, Rostov vilayətinin Kamensk-Şaxtinski, Qukovo və Novoşaxstinski rayonlarında cəmlənib. “Diversiya-kəşfiyyat qrupları terrorçu qruplaşmalarının gücləndirilməsi üçün Ukraynanın ərazisinə keçməyə hazırdır. Onların ümumi sayı min nəfərdən çoxdur. Bu qrupların əsas hərəkət istiqaməti isə Luqansk, Staniçno-Luqansk və Sverdlovskdur”, – D.Tımçuk qeyd edib. Həmçinin Rusiyanın sərhəd rayonlarında Ukraynanın şərq sərhədlərinin uzununa Rusiya qoşunları cəmlənmişdir.

Hərbi-siyasi Tədqiqatlar Mərkəzinin rəhbəri həmçinin qeyd edib ki, Donetsk istiqamətində 6500, Luqansk və Xarkov istiqamətində 4100, Sumsk və Çerniqov istiqamətində isə 2500-dən çox Rusiya hərbçisi yerləşdirilib.

Ömər Dağlı