Türkiyə əsgərinin başına çuval keçirən generalla işləyəcək?

Türkiyə onu “çuvalçı general” kimi tanıyır. Söhbət ABŞ Ali Baş Qərargahının hərbi əməliyyat rəisi general-leytenant Vilyam C.Meyvilldən gedir.

Publika.az “Hürriyət”ə istinadən xəbər verir ki, 2003-cü ildə Şimali İraqda Türkiyə əsgərinin başına çuval keçirilməsi əmrini verən Vilyam indi İŞİD-lə (İraq Şam İslam Dövləti) mübarizə koalisiyasının rəhbərlərindəndir.

2003-cü ildə “çuval” əmrini verən zaman polkovnik olan Vilyamın zaman keçdikcə rütbəsi artıb və o, müxtəlif əməliyyatlarda iştirak edib.

General-leytenant rütbəsinədək yüksələn Vilyam hazırda ABŞ Ali Baş Qərargahının hərbi əməliyyat rəisidir. O, İŞİD-ə qarşı ABŞ-ın rəhbərliyi ilə qurulan beynəlxalq koalisiyada da ən yüksək vəzifəni icra edir.

Vəziyyətə görə, Türkiyə İŞİD-ə qarşı qurulan beynəlxalq koalisiyaya hərbi dəstək versə, bir vaxtlar türk əsgərinin başına çuval keçirən ABŞ zabiti ilə birlikdə işləmək məcburiyyətində qalacaq.

Vilyam dünən Pentaqonda təşkil edilən mətbuat konfransında ABŞ-ın rəhbərliyi ilə əməliyyatlarda vurulan İŞİD hədəfləri və vəziyyətin gedişatı haqqında məlumat verib.

Xatırladaq ki, Vilyam C.Meyvill 2003-cü il iyulun 4-də Türkiyə xüsusi təyinatlı dəstəsinin Süleymaniyədəki (Şimali İraq – red.) qərargahlarından başına çuval keçirilmiş və əlləri bağlı şəkildə Kərkükdəki ABŞ hərbi bazasına gətirilməsi əmrini verən polkovnik idi.

Vüsal Tağı