Pxenyan Ağ Ev və Pentaqonu vuracağını bəyan etdi

Pxenyan Ağ Ev, Pentaqon və "bütün Amerika ərazisinə” hücumlar edəcəyi barədə ABŞ-ı hədələyib.

Publika.az-ın xarici mediaya istinadən verdiyi məlumata görə, bu barədə Şimali Koreyanın dövlət informasiya agentliyi STAK bildirib.

“Koreya Xalq Demokratik Respublikası ABŞ-la qarşıdurmanın bütün cəbhələrində, həmçinin kibersahədə müharibəyə hazırdır. Cavab hərəkətləri artıq hazırlanıb. Bizim hədəfimiz Amerika imperialistlərinin bütün qalalarıdır”, - xəbərdə deyilir.

Qeyd edək ki, ABŞ-ın Sony Pictures şirkətinə haker hücumu olub və ABŞ hücumun arxasında Şimali Koreyanın dayandığını bildirir. Ağ Evin bəyanatı Federal Təhqiqat Bürosunun (FTB) araşdırmasının nəticəsinə əsaslanır. FTB-nin gəldiyi nəticəyə görə, Pxenyan “Müsahibə” adlı komediyanın nümayişə çıxarılmasının qarşısını almaq istəyir. Həmin komediya Şimali Koreya lideri Kim Jong İnin öldürülməsi məqsədilə sui-qəsdin hazırlanması barədədir.

Pxenyanın isə iddiaları rədd etməsinə baxmayaraq ABŞ prezidenti Barak Obama söz verib ki, Sony Pictures şirkətinə edilən kiberhücuma lazımı cavab veriləcək.

Ömər Dağlı