Yeni Maydan bu Avropa ölkəsində hazırlanır

“ABŞ Makedoniyada yeni Maydan hazırlayır”.

Axar.az xəbər verir ki, bu iddia ilə Rusiya mətbuatı çıxış edib. Mətbuatın iddiasına görə, Vaşinqton bununla ölkədən keçməsi nəzərdə tutulan “Türk axını”na mane olmağa çalışır: “Keçən həftə Makedoniyada sərhədi keçməyə çalışan alban terrorçularla döyüş oldu. Döyüşlərdə polislərdən beş, terrorçulardan isə 14 nəfər həyatını itirdi. Bunun fonunda Makedoniyanın paytaxtı Skopyedə qeyri-qanuni dinləmə ilə bağlı skandal yaşandı və xarici QHT-lərin nümayəndləri küçəyə çıxdılar. Bundan sonra isə Makedoniyanın Baş naziri Nikola Qruyevski gizli dinləmələrə görə iki naziri istefaya göndərdi.

Görünür, Makedoniyada da Şərqi Avropaya xas olan narıncı inqilabların ilkin dalğası artıq başlayıb. Müxalifət və hökumət bir-birini ölkədə qeyri-stabillik yaratmaqda günahlandırırlar. Nümayişçilər baş nazir istefaya gedənə qədər küçələrə çıxacaqlarını deyirlər. Ekspertlər isə ölkədəki qeyri-stabilliyin qəflətən başlamasının əsas səbəblərindən birinin “Türk axını”nın bu ölkədən keçməsinin olduğunu deyirlər. ABŞ “Qazprom”a burada istənilən yolla mane olmağa hazırdır. Yaxın gələcəkdə isə bu iki milyonluq kiçik ölkə hətta müharibənin də ağuşuna atıla bilər”.