Dünya

Malala Yusifzaya hücüm edən 10 nəfərdən 8-i sərbəst buraxılıb

6 İyun 2015 09:53

Nobel mükafatı laureatı Malala Yusifzaya qadınların təhsil hüququ fəaliyyətlərinə görə hücüm edən 10 nəfərdən 8-i sərbəst buraxılıb.

Publika.az xəbər verir ki, bu barədə Pakistan polisi məlumat yayıb. Məlumata görə, Pakistanın Svat vadisinin polis rəisi Səlim Marvat qərb mediasına kifayət qədər dəlil və sübut olmadığı üçün onların azad edildiyini bildirib.

Xəbər Pakistanın digər təhlükəsizlik rəsmiləri tərəfindən də təsdiqlənib.

Aprel ayında Pakistan rəsmiləri bildirmişdi ki, Malalaya qarşı hücüm və onun qətlinin planlaşdırılması ittihamı ilə 10 nəfər ən azı 25 il həbs cəzasına məhkum edilib.

2012-ci ildə məktəbə gedərkən hücuma məruz qalan 14 yaşlı Malalanın işi ilə bağlı bu, birinci ittiham idi. Başından yaralanan Malala İngiltərədə müalicə edilmiş və hazırda orada yaşayır.

Hücumun məsuliyyətini üzərinə alan Taliban geri qayıtdığı təqdirdə onun yenidən hədəf alacağı ilə təhdid edib.