Ermənilər orta məktəbi gülləbaran etdi – Foto/Video

Erməni silahlı qüvvələri iki gündür ki, Qazaxın digər kəndləri kimi Məzəm kəndini də gülləbaran edir.

Axar.az-ın cəbhə bölgəsinə ezam olunan əməkdaşının verdiyi xəbərə görə, kəndin üç gündür iriçaplı pulemyotlardan atəşə tutulması nəticəsində çox sayda ev, o cümlədən kənddə yeni təmir olunan məktəb binası zədələnib.

Atəş nəticəsində məktəbin divarlarında ağır çaplı güllələrin açdığı dəliklər aydın şəkildə görünür. Kənd sakinləri xoşbəxtlikdən tədris ilinin bitdiyini, məktəblilərin tətildə olduğunu deyir.

Kənd sakini Ceyhun Əliyev əməkdaşımıza bildirdi ki, orta məktəbdə bir sıra abadlıq işləri aparıldığından atəş zamanı işçilər hadisə yerində olub:

“Atəş gözləmədiyimiz anda başladı. Məktəbin divarları dəlmə-deşik oldu. Bu məktəb erməni postunun düz qabağında yerləşir. Xoşbəxtlikdən məktəblilər tətildədir. Yoxsa daha pis ola bilərdi. İndi bilmirik ki, yeni tədris ili başlayanda necə olacaq”.

Kənd sakini Süleyman kişi isə bildirdi ki, kənddə çətinliklər var:

“Hazırda kənddə çörək qıtlığı yaranıb, telefon işləmir”.

Qeyd edək ki, əməkdaşlarımızın Məzəm kəndində olduğu vaxtda atışma səsləri eşidilmədi.

Bakı-Qazax