Hadisə

Orta məktəbdəki ölüm faktı ilə bağlı RƏSMİ AÇIQLAMA

18 Sentyabr 2015 20:05

Göygöl rayonunda orta məktəbdə baş vermiş insidentlə bağlı cinayət işi başlanıb.

Bu barədə Publika.az-a Respublika Baş Prokurorluğundan məlumat verilib. Məlumata görə, sentyabrın 18-də saat 12 radələrində Göygöl rayonunun Çaykənd kənd orta məktəbinin 9-cu sinif şagirdi, 2001-ci il təvəllüdlü Eldənizli Xanəli Niyazi oğlunun məktəbin futbol meydançasında 125 mm-lik dəmir borulardan düzəldilmiş qapının dirəyindən sallaşan zaman əlləri sürüşərək dəmir dirəyin üzərinə düşüb. Müxtəlif bədən xəsarətləri alaraq Gəncə şəhər Təcili Tibbi Yardım Xəstəxanasına yerləşdirilən Xanəli Eldənizli orada vəfat edib.

Faktı ilə bağlı rayon prokurorluğunda Cinayət Məcəlləsinin 124.1-ci (ehtiyatsızlıqdan adam öldürmə) maddəsi ilə cinayət işi başlanıb.

Ölümün və hadisənin baş vermə səbəblərinin müəyyənləşdirilməsi məqsədi ilə iş üzrə müvafiq ekspertizalar təyin edilməklə digər zəruri istintaq hərəkətləri yerinə yetirilir.

Hazırda iş üzrə istintaq tədbirləri davam etdirilir.