• USD 1,7430 +0,35% EUR 1,8487 -1,24%
    • GBP 2,1929 -0,21% RUB 0,0275 +0,36%

“Yuventus Arena”ya kim qədəm basacaq?

  • İdman
  • 1 May 2014 10:03
  • 736 Baxış
“Yuventus Arena”ya kim qədəm basacaq?

Bu gün Avropa Liqasında finalçılar müəyyənləşəcək.

Publika.az xəbər verir ki, Turində “Yuventus” “Benfika”nı qəbul edəcək. İspaniyada isə La Liqa təmsilçiləri – “Valensiya” və “Sevilya” üz-üzə gələcək. Hər iki qarşılaşma Bakı vaxtı ilə saat 00.05-də başlayacaq.

208-ci qarşılaşma

“Sevilya” Valensiya səfərinə üstünlüklə yollanır. Belə ki, Sevilyada keçirilən ilk qarşılaşmada meydan sahibləri Stepan Mbia və Karlos Bakkanın qolları ilə 2:0 hesablı qələbə qazanıb. Valensiyadakı cavab matçını serb referi Milorad Maziç idarə edəcək. “Valensiya” və “Sevilya” 208-ci dəfə üz-üzə gələcək. Geridə qalan 207 matçda “Valensiya” 95, “Sevilya” 77 qələbə qazanıb, 35 oyunda qalib müəyyənləşməyib. “Sevilya” 2006 və 2007-ci illərdə ardıcıl iki dəfə UEFA Kubokunu başı üzərinə qaldırıb, “Valensiya” isə 2004-cü ildə eyni uğura imza atıb.

“Yuventus” evindəki finala doğru

“Benfika” evindəki ilk matçda 2:1 hesablı qələbə qazanıb. Hesabı 2-ci dəqiqədə meydan sahiblərindən Garay açıb, 73-cü dəqiqədə Tevez bərabərliyi təmin edib. 84-cü dəqiqədə isə Lima portuqaliyalıların qələbə qoluna imza atıb. “Yuventus Arena”dakı matçı ingilis referi Mark Klattenburq idarə edəcək.

Avropa Liqasının final matçı Turində - “Yuventus Arena”da keçiriləcək. “Yuventus” bu finala vəsiqə qazanmaqla azarkeşlərini sevindirmək istəyir.

18 il sonra finala?

Avropa Liqasında (həmin vaxt UEFA Kuboku adlanırdı) sonuncu dəfə 1994/95 mövsümdə finala çıxan “Yuventus” “Benfika” səddini keçəcəyi halda 18 il sonra final oynayacaq. Turin klubu 1994/95 mövsümündəki finalda A Seriyasındakı rəqibi “Parma” ilə qarşılaşmışdı. İlk matçda (həmin vaxt final iki oyundan ibarət olub) 0:1 hesabı ilə yenilən “Yuve” cavab qarşılaşmasında heç-heçə edib - 1:1.

“Yuventus” indiyədək 3 dəfə turnirin qalibi olub və “İnter”lə birlikdə bu kuboku ən çox qazanan klubdu. Turin təmsilçisi 1977, 1990 və 1993-cü illərdə kuboku başı üzərinə qaldırıb. “Benfika” isə sonuncu dəfə Avropa Liqasında ötən mövsüm final oynayıb. Həlledici matçda İngiltərənin “Çelsi” klubu ilə qarşılaşan portuqaliyalılar 1:2 hesabı ilə yenilmişdi. “Benfika” heç vaxt bu kubokun sahibi olmayıb. 1982/83 və 2012/13 mövsümlərində finala çıxan komanda “Anderlext”lə “Çelsi”yə yenilib. “Yuventus”la “Benfika” avrokuboklarda 6-cı dəfə qarşı-qarşıya gələcək. Arxada qalan 5 matçda portuqaliyalılar 4, italyanlar 1 qələbə qazanıb. “Benfika”nın 7 qoluna “Yuventus” 5 dəfə cavab verə bilib.

“Marathonbet” kontorunun açıqladığı əmsalları təqdim edirik:

Valensiya – Sevilya 2.18 3.75 3.45

Yuventus – Benfika 1.58 4.30 6.70

Xəbər lenti

DAHA ÇOX XƏBƏR