“Heç bir vəzifəm yoxdur, təklif də gəlməyib”- Onun Türkiyədə nə işi var?

Ağasəlim Mircavadovun yeni iş yeri barədə məlumat vermişdik.

Mətbuatda yayılan məlumata görə, “Xəzər Lənkəran”dan ayrıldıqdan sonra işsiz qalan təcrübəli futbol adamı bundan sonra U-21 yığmasında məsləhətçi postunda çalışacaq.

O, hazırda Antalyada təlim-məşq toplanışında olan millinin düşərgəsindədir.

Bundan əlavə, Mircavadovun U-21 yığmasının baş məşqçi postuna gətirilməsi ehtimalı da var.

Məsələ ilə bağlı A.Mircavadovun özü ilə əlaqə saxladıq. Publika.Az-a danışan mütəxəsis U-21-in tərkibində heç bir vəzifə almadığını bildirdi:

“ Xeyr, məsləhətçi kimi yox, sadəcə köməyə gəlmişəm. Hazırda komanda ilə birlikdə Antalyadayam. Sağ olsunlar, mənə qiymət verib çağırıblar. Burada mənim heç bir vəzifəm yoxdur, təklif də gəlməyib.

Baş məşqçi kimi U-21-ə gələcəyim xəbəri də tamamən yanlışdır. Burada çalışan azərbaycanlı mütəxəssislər də, Adams da öz vəzifəsinin öhdəsindən yaxşı gəlir”.

Ağasəlim Mircavadov “Baş məşqçi kimi, sizə təklif gələrsə cavabınız necə olar?”- sualına isə belə cavab verdi:

“Ortada heç nə yoxdur. Olsaydı, özüm sizə açıqlayardım”.

Aygün İlqarqızı