"Bakı 2015" Avropa Oyunları daha üç ölkədə yayımlanacaq
Bizi izləyin

İdman

"Bakı 2015" Avropa Oyunları daha üç ölkədə yayımlanacaq

"Bakı 2015" Avropa Oyunları Əməliyyat Komitəsi Rumıniya, Macarıstan və Belçika ilə üç beynəlxalq yayım müqaviləsinin bağlandığını elan edir.

Komitədən Trend-ə verilən məlumata görə, sözügedən üç müqavilənin bağlanması ilə idman azarkeşləri gələn ilin yayında keçiriləcək 17 günlük birinci Avropa Oyunlarını canlı izləyə biləcəklər.

Bağlanmış müqavilələrə görə "DigiSport" şirkəti Rumıniya və Macarıstanda, "Sport 10" şirkəti isə Belçikada Avropa Oyunlarını yayımlayacaq.

"Bakı 2015" Avropa Oyunları Əməliyyat Komitəsinin əməliyyatlar üzrə baş direktoru Saymon Kleq deyib: "Bu üç sazişin bağlanması bütün qitədə birinci Avropa Oyunlarını izləmək marağının yüksək səviyyədə olduğunu göstərir. Rumıniya, Macarıstan və Belçikanın idman sahəsində möhtəşəm uğurlu tarixi var. Oradakı azarkeşlərin gələn yay keçiriləcək yarışlarda öz idmançılarının nailiyyətlərini izləmələri üçün zəmanətin verilməsi gözəl haldır. Bağlanmış müqavilələrlə ev sahibi olan yayım şirkətimiz - Beynəlxalq İdman Yayımı Şirkətinin (ISB) birgə fəaliyyəti sayəsində idman azarkeşləri bir sıra media platformaları üzərindən hərtərəfli yayımdan yararlanacaqlar".

Beynəlxalq İdman Yayımı Şirkəti Avropa Oyunları müddətində oyunların 800 saatlıq canlı, müasir təqdimatını təmin edəcək.

Hər üç ölkədə hər gün tədbirin kadrları, eyni zamanda, tam şəkildə açılış və bağlanış mərasimləri yayımlanacaq. İlkin proqramlaşdırma və gündəlik olaraq yarışların maraqlı məqamlarından seçilmiş videomateriallar da yayımlanacaq.

"DigiSport" Rumıniya şirkətinin baş redaktoru Georgi Dobre söyləyib: "Biz "Bakı 2015" ilə belə müqavilələrin bağlandığına çox şadıq və Rumıniya və Macarıstandakı azarkeşlərə gündəlik əsasda Avropa Oyunlarının canlı və müstəsna yayımını təqdim etməyi səbirsizliklə gözləyirik".

"Sport 10" şirkətinin idarəetmə üzrə direktoru xanım Karin Stup qeyd edib: "Birinci Avropa Oyunları bütün dünya tamaşaçıları üçün böyük marağa səbəb olacaq və biz belçikalı azarkeşlər üçün yarışlardan yüksək səviyyəli kadrları təqdim edəcəyimizi böyük məmnuniyyətlə elan edirik".

Qeyd edək ki, keçən həftə Türkiyənin "NTV Spor" kanalı Avropa Oyunlarının yayım haqqında beynəlxalq sazişin imzalandığı ilk şirkət olaraq təsdiq edilib.

"Bakı 2015" Avropa Oyunları Əməliyyat Komitəsinin Kommersiya şöbəsinin direktoru Çarli Viceratna deyib: "Birinci Avropa Oyunlarına çox az zaman qaldığı üçün biz bir sıra sazişlərin bağlanmasını yekunlaşdırırıq. Həmin sazişlərə görə azarkeşlərin hər bir idman növü üzrə yarışlardan zövq almaları üçün "Bakı 2015" Avropa Oyunları bütün dünyada canlı olaraq yayımlanacaq".

Oxumağa davam et
Reklam
Reklam

Gündəm