“Qarabağ” ilk Azərbaycan komandasıdır ki...

«Qarabağ» avrokuboklarda 50 qol həddinə çatan ilk Azərbaycan komandasıdır.

Publika.az xəbər verir ki, cari avrokubok mövsümündə «Tvente» ilə Avropa Liqasının pley-off mərhələsinin cavab görüşündə Muarem Muarem «köhlən atlar»ın yubiley qoluna imza atmışdı. Makedoniyalı futbolçu «Qarabağ»ın 51-ci qolunun da müəllifi oldu. O, «Dnepr»lə Avropa Liqasının səfərdə keçirilən qrup matçında yeganə qolu vurmuşdu.

Azərbaycan çempionunun avrokuboklardakı hələ ki, sonuncu - 53-cü qolunun müəllifi isə «Sent-Etyen»lə Fransadakı görüşdə (1:1) fərqlənən Vüqar Nadirovdur.

«Qarabağ»ın ən yaxın izləyicilərindən «Neftçi» avrokuboklarda 47, «İnter» isə 28 dəfə qol sevinci yaşayıb.

Azərbaycan klublarının avrokuboklardakı 80-ci, 90-cı, 150-ci və 170-ci qollarının müəllifləri “Qarabağ”ın futbolçuları olub. Hazırda qol sayı 184-də dayanıb. “İnter”lə oyunda 185-ci qolumuz vurula bilər. Yubiley - 200-cü qolun klublarımızdan hansının adına yazılacağı da maraqla gözlənilir.

Pərviz Hikmət