İdman

Olimpiya çempionu oğurluq edərkən tutuldu?

13 Dekabr 2014 12:04

Üzgüçülük üzrə 2004-cü il Olimpiya çempionu, fransalı Lor Manodu oğurluq edərkən yaxalanıb.

Publika.az xəbər verir ki, bu barədə Fransanın BFMTV kanalı məlumat yayıb. O, Parisdəki “Disneyland”də 200 avro dəyərində suvenir əşya oğurlayarkən tutulub. Hadisə zamanı Manodunun yanında rəfiqəsi və 4 yaşlı qızı da olub.

İddiaya görə, keçmiş çempionun rəfiqəsinin çantasında da 300 avro dəyərində suvenirlər tapılıb.

Polislər oğurlanmış əşyaları mağazaya qaytarıblar. Lakin Manodu haqda cinayət işi açılmayıb. Polis onu sərbəst buraxıb.

Manodu isə "twitter"dəki səhifəsində xəbəri təkzib edib: “Mətbuat tamamilə yalan danışır. Artıq bezdim. Niyə qızımla heç kim məni narahat etmədən vaxt keçirə bilmirəm? İndi də bunu uydurdular”.

Xatırladaq ki, Lor Manodu 2004-cü il Olimpiya oyunlarında sərbəst üsulla 400 metr məsafəyə üzmədə çempion olub.

Aygün İlqarqızı