“Qəbələ” “Kuban”la qarşılaşacaq

Türkiyənin Antalya şəhərində təlim-məşq toplanışında olan “Qəbələ”nin yoxlama oyunlarının vaxtında dəyişiklik baş verib. Bu dəyişiklik qış hazırlıq prosesinin ikinci hissəsində baş tutmalı olan qarşılaşmalarla bağlıdır.

Publika.az xəbər verir ki, həmin mərhələdə 3 sınaq matçına çıxacaq Roman Qriqorçukun yetirmələri yanvarın 22, 25 və 29-da deyil, 23, 25 və 27-də gücünü sınayacaq.

Bu arada “Qəbələ”nin daha bir sınaqçı rəqibi müəyyənləşib. “Qırmızı-qaralar” təlim-məşq toplanışının ikinci mərhələsində ilk yoxlama oyununu Rusiyanın “Kuban” klubuna qarşı keçirəcək. Krasnodar təmsilçisi ilə oyun yanvarın 23-də baş tutacaq. Bu matç rusiyalıların məşq keçdiyi “Bellis” idman kompleksinin stadionunda baş tutacaq. Qarşılaşma Bakı vaxtı ilə 13:00-da başlayacaq.

Rusiya Premyer Liqasında çıxış edən “Kuban” 1928-ci ildə yaradılıb. Ötən mövsüm çempionatı 8-ci yerdə başa vuran Krasnodar təmsilçisi cari çempionatda da qış fasiləsinə 8-ci pillədə yollanıb.

Qeyd edək ki, ilk yoxlama oyununda Hollandiyanın PSV klubunun ikinci komandası ilə 0:0 hesablı heç-heçə edən “qırmızı-qaralar” bu gün Türkiyə “Əskişəhərspor”u ilə üz-üzə gələcək. “Kuban”la matçadək baş tutacaq digər iki oyun isə yanvarın 17-də keçiriləcək.

Qeyd edək ki, “Qəbələ” yanvarın 28-də vətənə qayıdacaq.