UEFA-nın vitse-prezidenti hakimlərimizdən danışdı

"Bakıya AFFA-nın Konfransında iştirak etmək üçün gəlmişəm. Burda mən UEFA-nın təmsilçisiyəm". Fanat.az xəbər verir ki, bu sözləri UEFA-nın vitse-prezidenti Şenes Erzik deyib.

AFFA-nın Hesabat Konfransına qatılan qonaq azərbaycanlı hakimlərin işi ilə bağlı fikir bildirib: "Sizin hakimlərə təcrübə lazımdı. Əvvəllər bu, türkiyəli hakimlərdə də yox idi. Bu, uzun bir yoldu. Sizə tələsmək gərək deyil. 20 il qabaq bu gün Azərbaycanda olanlar yox idi".

Bakıda AVRO-2020-nin bir sıra oyunlarının keçirilməsinin mümkünlüyünə toxunan Erzik bunları deyib: "Oyunların keçirilməsini nəzərdə tutan sizin olimpiya stadionunuz hələlik tikilir. AVRO-2020-nin final mərhələsinin bir sıra oyunlarının Bakıda keçirilməsi şanslarına gəlincə, sizin də digər namizədlər kimi, şanslarınız var. Həmçinin, siz bir müddət əvvəl, 17 yaşa qədər qızlar arasında DÇ-ni qəbul etmişiniz. Ancaq şəxsən mən sizə heç nə ilə kömək edə bilmərəm. Mən UEFA-da bu işlə məşğul olmuram".

UEFA vitse-prezidentinin sözlərinə görə, o, Azərbaycanda işləyən türk məşqçilərin yerli futbola kömək olacağına inanır: "Mən bilirəm ki, Mustafa Dənizli və Güvənc Kurtar Azərbaycanda işləyir. Bu mütəxəssislər Türkiyədə az uğur qazanmayıb və Türkiyə futbolunun dirçəlməsinə kömək olublar. Əminəm ki, onlar Azərbaycanda da buna nail olacaqlar".