MŞ: Fəaliyyət aktivliyi cəbhədə baş verən proseslərə köklənmiş internet media resursları var
Bizi izləyin

İKT

MŞ: Fəaliyyət aktivliyi cəbhədə baş verən proseslərə köklənmiş internet media resursları var

Mətbuat Şurası (MŞ) İdarə Heyətinin iclası keçirilib.

Mətbuat Şurası (MŞ) İdarə Heyətinin iclası keçirilib.

Şuradan Publika.az-a verilən məlumata görə, iclasın gündəliyində duran birinci məsələ Azərbaycan-Ermənistan qoşunlarının təmas xəttində düşmən təxribatının qarşısının alınması ilə bağlı vəziyyətin mediada işıqlandırılması olub.

Mətbuat Şurasının monitorinqi zamanı müəyyən olunub ki, fəaliyyət aktivliyi sırf cəbhə xəttində baş verən proseslərə köklənmiş internet media resursları var. Onlar bir çox halda yaydığı materialın məzmununa uyğun olmayan sərlövhələrlə diqqəti özlərinə çəkməyə çalışır. Belə saytlar eyni zamanda rəsmi mənbələrə istinad etmir, yalan, həqiqətə uyğun gəlməyən məsələləri də qabardaraq cəmiyyətdə çaşqınlar yaradır. İclasda belə spekulyativ yol tutanlara qarşı hüquqi ölçünün götürülməsinin zəruriliyi vurğulanıb. Toplanmış materialların müvafiq qurumlara göndərilməsi təqdir olunub.

İclasda o da bildirilib ki, cəbhə xəttindəki vəziyyətin cəmiyyətdə, eləcə də mediada hər hansı neqativ meylləri doğurmaması üçün əlaqədar dövlət orqanları daha çevik fəaliyyət göstərməli, informasiya boşluğunun yaranmasına heç bir halda imkan verməməlidirlər. Təcrübə göstərir ki, gərgin durumlarda yaşanan informasiya durğunluğundan düşmən qüvvələr maksimum istifadə edir. Bu proses yalnız medianı deyil, daha geniş auditoriyaya malik sosial şəbəkələri də əhatə edir. Ona görə də Müdafiə Nazirliyi daha aktiv olmalı, quruma da ictimaiyyət tərəfindən dəstək göstərilməlidir. İclasda bu kimi məsələlərlə əlaqədar MN rəhbərliyi ilə KİV rəhbərlərinin görüşün təşkilinin zəruriliyindən söz açılıb.

MŞ İdarə Heyətinin iclasının gündəliyində duran ikinci məsələ "İnformasiya, informasiyalaşdırma və informasiyanın mühafizəsi haqqında" və "Telekommunikasiya haqqında" Azərbaycan Respublikası Qanunlarına təklif olunan dəyişikliklərlərlə bağlı olub. Bildirilib ki, hər iki layihə ölkəmizin hüquqi münasibətlər sisteminə yeni anlayışların gətirilməsi baxımından önəmlidir. Bu anlayışları vacib edən cəhət onların praktik vəziyyətə adekvatlığıdır. Çünki internet məkanda tənzimləmələrin aparılması məsuliyyət hissinin artırılması, neqativ halların və sui-istifadə meyllərinin aradan qaldırılmasının təminatıdır.

İclasda müzakirə edilən üçüncü məsələ Şuranın "reket jurnalistika"ya qarşı mübarizə tədbirləri olub. Məlumat verilib ki, 2016-cı ildə Mətbuat Şurasının “qara siyahı”sına ümumilikdə 10 KİV-in adı daxil edilib. Bunlardan 3-ü saytdır. Adı əvvəlki illərdə “qara siyahı”ya daxil edilmiş 2 qəzetin onlayn versiyası kimi fəaliyyət göstərən 2 xəbər saytı da qeyd edilməlidir. Beləliklə Şuranın ötən il qəbul etdiyi 44 qərardan 10-u cavabdeh KİV-in adının “qara siyahı”ya salınmasını nəzərdə tutur.

2017-ci ildə «reket jurnalistika»ya qarşı mübarizənin gücləndirilməsi tədbirləri önə çəkilərkən peşə etikasına etinasız yanaşanların fəaliyyətlərini internet məkana daşıdıqları vurğulanıb. Bildirilib ki, ötən il Şuraya şikayətlərin 66.7 faizi internet üzərindən yayımlanan KİV-lərin fəaliyyətindən olub. Bu göstəricinin 51,9 faizi internet xəbər saytlarına, 14,8 faizi informasiya agentliklərinə məxsusdur. Çıxarılan 44 qərarın 30-u da məhz onlarla bağlıdır.

Oxumağa davam et
Reklam
Reklam

Gündəm