ÜDM 2,1 faiz artıb

Bu ilin birinci yarısında ölkədə 28,7 milyard manatlıq və ya əvvəlki ilin eyni dövrü ilə müqayisədə 2,1 faiz çox ümumi daxili məhsul istehsal olunub.

Publika.az xəbər verir ki, ÜDM-in əhalinin hər nəfərinə düşən həcmi 3063,3 manat (3905,2 ABŞ dolları) təşkil edib.

ÜDM-in 61,1 faizi istehsal sahələrində, o cümlədən 46,0 faizi sənayedə, 10,7 faizi tikintidə, 4,4 faizi kənd təsərrüfatı, meşə təsərrüfatı və balıqçılıqdan hasil olunub. 31,8 faiz isə xidmət sahələrinin payına düşüb. Məhsula və idxala xalis vergilər ÜDM-in 7,1 faizi səviyyəsində təşkil edib. Bu dövrdə iqtisadiyyatın qeyri-neft sektorunda əlavə dəyər 7,0 faiz artıb, onun ÜDM-də xüsusi çəkisi əvvəlki ildəki 55,0 faizdən 56,3 faizədək yüksəlib. Müvafiq olaraq ümumi daxili məhsulun 43,7 faizi neft-qaz istehsalı və emalı sahələrinin payına düşüb və əvvəlki ilə nisbətən 3,9 faiz azalıb.

Cari ilin altı ayında əvvəlki ilin eyni dövrü ilə müqayisədə turistlərin yerləşdirilməsi və ictimai iaşə xidmətləri sahəsində əlavə dəyər 14,8 faiz, informasiya və rabitə xidmətlərində 12,6 faiz, tikintidə 9,6 faiz, ticarət və nəqliyyat vasitələrinin təmiri üzrə xidmətlər sahəsində 8,9 faiz, kənd təsərrüfatı, meşə təsərrüfatı və balıqçılıqda 5,8 faiz, nəqliyyat və anbar təsərrüfatında 5,1 faiz, sosial və digər xidmət sahələrində isə 4,3 faiz artıb.

İqtisadiyyat şöbəsi