Təmir-tikintiyə 9 milyard manat xərclənməsi planlaşdırılır

2015-ci ilin büdcəsində əsaslı xərclər üçün 9366 milyon manat vəsait nəzərdə tutulub. Bu xərclərin də dövlət büdcəsinin xərclərinin tərkibində xüsusi çəkisi 44,4 faiz deməkdir.

Publika.az Maliyyə Nazirliyinə istinadən bildirir ki, bu istiqamətdə xərcləmələr 2014-cü illə müqayisədə 11,5 faiz çoxdur. Əsaslı xərcləmələrdən Azərbaycan qazının dünya bazarına nəqli ilə əlaqədar Cənub Qaz Dəhlizinin fəaliyyətini təmin etmək üçün “Şahdəniz” qaz-kondensat yatağının tammiqyaslı işlənməsi, Cənubi Qafqaz Boru Kəmərinin genişləndirilməsi, Trans-Anadolu Boru Kəməri (TANAP) və Trans-Adriatik Boru Kəməri (TAP) layihələrinin həyata keçirilməsi üçün 928,0 milyon manat müəyyən edilib. Növbəti ildə ali təhsil müəssisələrinin təmirinə 27 815,1 min manat, ümumtəhsil müəssisələrinin tikintisinə 155 878,5 min manat, kənd təsərrüfatına 63 220,7 min manat, nəqliyyata 2 240 405,2 min manat ayrılması nəzərdə tutulub. Əsaslı xərcləmələrdən bəzi istiqamətlər üzrə xərclər həm də xaricdən alınan kreditlər hesabına maliyyələşəcək. Həmin istiqamətlərə nəqliyyat, infrastruktur layihələri, energetika və sənaye, kənd təsərrüfatı, sosial yönümlü layihələr, ekologiya, kommunal infrastruktur daxildir.

İqtisadiyyat şöbəsi