212 milyon insan işini itirəcək

2019-cu ilədək dünyada 212 milyon insan işini itirəcək.

Publika.az xəbər verir ki, bu barədə Beynəlxalq Əmək Təşkilatının son hesabatında bildirilir. Hazırda isə 201 milyon insanın işsiz olduğu qeyd edilir.

Hesabata əsasən, 2008-ci ildə başlanan qlobal iqtisadi böhran səbəbi ilə 61 milyon adam işsiz qalıb. Bu göstəricinin 21-ci əsrin ilk onilliyində daha da yüksələcəyi proqnozlaşdırılır.

Beynəlxalq Əmək Təşkilatı işsizlik və qeyri-bərabərliyin bir çox icmalar üçün fəlakətə çevrilə biləcəyi barədə xəbərdarlıq edir. Qurum bildirir ki, işsizlik 15-lə 24 yaş arasında gənlərin etirazlarına yola aça bilər. Belə ki, onların daha yaşlı nəsillə müqayisədə 3 dəfə işsiz qalma ehtimalı mövcuddur.

2014-cü ildə gənclər arasında işsizlik 13 faiz təşkil edib.

Beynəlxalq Əmək Təşkilatının baş araşdırmaçısı Reymond Torresin dediyinə görə, əmək bazarları ilə sosial iğtişaşlar arasındakı əlaqəni inkar etmək olmaz.

“Araşdırmalar göstərib ki, qeyri-bərabərlik yüksək olan ölkələrdə iqtisadi dirçəliş daha aşağı qeyri-bərabərlik yaşanan ölkələrlə müqayisədə daha çətin olur”, - Torres əlavə edib.

Hesabatda deyilir ki, ABŞ və Yaponiya kimi ölkələrdə işsizlik səviyyəsinin azalmasına baxmayaraq, əsasən Avropa olmaqla bir sıra inkişaf etmiş ölkələrdə işsizlik göstəriciləri hələ də yüksək olaraq qalır.

İşsizlik vəziyyəti Afrika, Ərəb regionu, Latın Amerikası və Karib hövzəsi ölkələrində getdikcə pisləşir.