Müsahibə
Elçin Əlibəyli: “Vadonun ATV-yə hansısa yenilik gətirəcəyinə inanmıram“ - MÜSAHİBƏ
Elçin Əlibəyli ilə yerli telekanallardakı keyfiyyət, baş verən dəyişikliklər, reytinq haqda söhbət
- Televiziyadan uzaqlaşmağınız söz-söhbətlərə səbəb
oldu...
- Burda qeyri-adi heç nə yoxdur. Televiziya elə bir sahədir ki,
hamının diqqəti oradadır. Ekrandakı ən kiçik dəyişiklik belə,
tamaşaçı üçün hadisədir. Nəinki hansısa telekanaldan uzaqlaşmaq,
hətta aparıcının bir televiziyadan, digərinə keçməsi də bizdə faciə
kimi qarşılanır. Bu, tamaşaçılara aid deyil. Aparıcılar yaradıcı
insanlardır. Onlar həssadırlar. Efir isə, məşhurluq, tanınmaq, ən
əsası isə ətrafdan hörmət deməkdir. Hansısa telekanaldan uzaqlaşan
aparıcıya o qədər sual verilə bilər ki, psixoloji gərginlik keçirə
bilər. Çünki o, dünənə qədər hər gün efirdə idi. Tamaşaçı hər gün
efirdə gördüyü aparıcını görməməyi qəbul etməyə də bilir. Bu isə,
uzunmüddətli deyil.
- Niyə uzaqlaşdınız?
- Baxın, mən bu suala dəfələrlə cavab vermişəm. Yenə də gəlib eyni
yerə çıxırıq. Mən aparıcı deyiləm. Bu, bir layihə idi və bitdi.
Proqrama qədər mənim kifayət qədər keyfiyyətli televiziya
layihələrim olub. Eyni zamanda elmi işlə məşğulam.
- Geri qayıtmaq təklifi olsa, necə?
- Mən aparıcı deyiləm. Hazırda reklam, televiziya layihələrim
var.
- Uzaqdan hər şey necə görünür?
- Elə bir dəyişiklik hiss etmirəm. Yenilik üçün potensiallı kadr
olmalıdır. Bizdə isə televiziya sahəsində müasir tələblərə cavab
verən kadr yoxdur. Bu problem isə öz-özünə həll olunmur. Dünya
təcrübəsi keçmiş, televiziya işini bilən gənclər yetişməlidir.
- Kadrların yetişməsi üçün hansı şərait tələb olunur?
- Bizdə heç bir fakültədə, ixtisasda televiziya işi öyrədilmir.
Bunun üçün televiziya akademiyası açılmalıdır. Eyni zamanda da,
başqa ölkələrə ildə ən azı 20 tələbə göndərilməlidir. Bunun üçün
uyğun ölkə Türkiyədir. Türkiyə yaxın ölkələr içərisində televiziya
sahəsində inkişaf etmiş, konkret ənənələri olan, yenilikləri
mənimsəmiş ölkədir. Hər il 20 tələbə göndərilsə, bir neçə il sonra
televiziya sahəsində uğurdan danışmaq olar.
- Televiziya akademiyası açmaq üçün maddi vəsaitimiz yoxdur
ki?
- Təhsildən danışırıqsa, burada yalnız boş binadan söhbət getmir.
Bunun üçün də sahəni bilən pedaqoqlar lazımdır axı.
- Sizə elə gəlmir ki, televiziyalar çox ittiham olunur?
- Elədir. Televiziya elə bir sahədir ki, hamı ora ilə əlaqəlidir.
Elə insan yoxdur ki, gündə bir dəfə də olsun, ekran qarşısında
əyləşməsin. Təhsil sahəsində, gənclərlə bağlı, ümumilikdə
cəmiyyətdə gördüyü bütün natarazlıqlar üçün telekanalları hədəfə
alanlar var. Hər şeydən əvvəl nəzərə almaq lazımdır ki, televiziya
biznes sektorudur. Burada əlahəzrət, reytinq və reklamdır. Reklamı
isə reytinq məsələsi həll edir. Reklam almaq üçün telekanallarda
çoxluğun baxdığı əyləncəli proqramlar olmalıdır. Biz də bilirik ki,
keyfiyyət, efir mədəniyyəti, mövzu seçimi, zövqlə bağlı efirdə çox
sayda problemlər var. Televiziyanı ittiham etmək çox asandır. Amma
bu məsələdə telekanalın yaşaması üçün reklam prinsiplərini də
nəzərə almaq lazımdır.
- Belə çıxır ki, telekanalın bütün cəhdləri reklam almağa
hesablanıb...
- Əlahəzrət reytinq nəyi tələb edirsə, ekrandan onu görürsünüz.
- Onda televiziyanın maarifləndirmək kimi heç bir öhdəliyi
yoxdur?
- Telekanaldan məktəbin, universitetin verdiyi təhsili, tərbiyəni
tələb etməklə maarifləndirməyi qarışdırırlar. Televiziyada
maarifləndirici, intellektual proqramlar kifayət qədər var. İndi o
proqramlara baxırlar ya yox, onu televiziyaları vaxtaşırı hədəfə
çevirənlərdən soruşmaq lazımdır.
- Toy proqramları da tənqid olunur. Ancaq xalqımızın ən
reytinqli proqramıdır...
- Hamı toy proqramlarının bağlanmasını tələb edir. Bu haqda qızğın
tənqidlər var. Ancaq heç kim əsaslandıra bilmir ki, niyə
bağlanmalıdır. Evlənməyin nəyi pisdir? Yaşlı, problemli insanlar
üçün yaxşı variantdır. İnkar etmirəm ki, o proqramlarda efir
mədəniyyətinə zidd hərəkətlər olur və çox sayda keyfiyyət problemi
var. Ancaq insanlar evlənir. Bu, bütün dünyada var.
- Axı bizi Zaur və ya Elgiz evləndirməyib. Onlara qədər də
insanlar ailə qururdu. Evlilik intim məfhum deyil?
- Söhbət ondan gedir ki, insanlar evliliklə bağlı hələ də
konservativ görünməyə çalışırlar. Evlilik intimdirsə, niyə ölkənin
yarısını yığıb toya çağırırlar? Toya gələnlər bilir ki, toyun
nəticəsi iki insanın intim münasibətidir. Utanıb gəlməsinlər də.
Toy proqramları da elə. Kim istəyər baxar, kim utanar, baxmaz.
Evlilik proqramını qlobal problemə çevirmək düzgün deyil.
- Efirdə ləhcə ilə danışmaqdan necə, utanmaq lazım
deyil?
- Efirdə yalnız aparıcılar ləhcə ilə danışmırlar. Məmurlar,
professorlar, təhsil adamları, hamısı ləhcə ilə danışır. Hamı öz
ləhcəsini düzgün danışıq qaydası kimi təqdim etməyə çalışır və
bunun doğruluğuna inanır. Aparıcılara gəlincə, jurnalistika
fakültəsinin müəllimləri auditoriyada ləhcə ilə danışırsa, onun
tələbəsi də efirdən onun kimi danışacaq. Təhsilin problemi efirdən
televiziyanın problemi kimi görünür.
- Keçmiş ATV-çi kimi ATV-də baş verən dəyişikliklərlə bağlı nə
deyə bilərsiniz?
- Kollektivdə dəyişiklikdən əvvəl proqramı dəyişdirmək lazım idi.
ATV hələ də köhnə proqram və strukturu ilə işləyir. Hansısa
dəyişikliyi görmək üçün ən azı, 6 ay zaman lazımdır. Köklü
dəyişiklik etmək elə asan deyil. Bunun üçün proffesional
televiziyaçılar lazımdır ki, o da bizdə yoxdur.
- ATV-dəki “get-gəllər” nə ilə bağlı idi?
- Mənim ATV ilə heç bir əlaqəm yoxdur. Bunu telekanal
rəhbərliyindən soruşmaq lazımdır. Yəqin ki, bu, yeni rəhbərliyin
kollektivi yaxşı tanımaması ilə bağlıdır. Televiziyada kadr
dəyişikliyi çətin məsələdir.
- Sizin keçmiş vəzifənizə yeni təyin olunmuş Vado ilə bağlı nə
deyə bilərsiniz? O, hansısa yenilik gətirəcəkmi?
- Məndən sonra həmin vəzifəyə Mirsalam Mirsalamov təyin olunmuşdu.
Yeni rəhbərlik Mirsalamın yerinə Vadonu təyin etdi. Onunla yaxın
olmasaq da, tanışlığımız var. Vadonun telekanalda hansısa
dəyişikliyə səbəb olacağına inanmıram. İndiyə qədər televiziyada
hansısa ciddi və uzunmüddətli layihə qoymayıb. Mən ümumiyyətlə,
nələr baş verəcəyini təsəvvür edə bilmirəm. Murad Dadaşov, Oqtay
Əliyev kimi illərlə televiziyada güclü layihə müəllifləri olan
insanlar var. O vəzifəyə gətirilmək üçün uğurlu seçim o zaman
olardı ki, həmin adamın televiziya təcrübəsi olsun.
- Bəs qeyri-proffesionallarla niyə və necə işləyirdiniz?
- Başqa variant yox idi. Əvvəldə də dediyim kimi, keyfiyyətli kadr
və işi bilənlər yoxdur. Çox çətinliklə hansısa layihənin öhdəsindən
gəlirdim. Layihə rəhbəri bəzən hamının yerinə işləməli olur.
Əslində isə belə olmamalıdır. Hamı öz işini bilsə, 10 günə başa
gələn layihəni 1 saata da həll etmək olar.
- “Keyfiyyətsiz kadrlarla” bağlı o zaman niyə ölçü
götürmürdünüz?
- “Ölçügötürmə” məsələsi olurdu. Amma bu, nəticədə elə də
dəyişikliyə səbəb olmurdu.
- Və nəhayət, tamaşaçı nə zaman ekran qarşısından məmnun halda
ayrılacaq?
- Tamaşaçı yalnız intellektual proqram tələb edən və ya yalnız
evlilik proqramına baxan kəsim deyil. Hamının zövqünə uyğun
layihələr üçün xaricdə təhsil almış, beynəlxalq televiziyaçılığı
öyrənmiş kadrlar yetişdirilməlidir. Televiziyanın daxilində baş
verənlər tamaşaçıya maraqsızdır. Tamaşaçı ekrandan maraqlı proqram
gözləyir. Bunun üçün də proqramçılığı, iş prinsiplərini yeniləmək
lazımdır. Normal televiziyanın proqram idarəçilərinin arasında
psixoloq, sosioloq və s. olur. Bu idarəetmə sistemini gətirmək
lazımdır.
Günay Muradlı
Publika.Az
-
Magazin222:00
Sevgilisi məşhur aktrisanı döydü: "Aylarla..."
-
Sosial21:36
Daxili İşlər Nazirliyi əhaliyə ÇAĞIRIŞ ETDİ
-
İnanc21:24
Ramazanın 19-cu gününün duası - İmsak və iftar vaxtı
-
Sosial20:24
Şahmar Hüseynova yeni VƏZİFƏ VERİLDİ - FOTO
-
Maraq dünyası20:15
"Tarqovı"da çiy ətdən libas geyinən qızdan QƏRİBƏ HƏRƏKƏTLƏR - VİDEO
-
Art19:36
Azərbaycan və Türkiyə birgə film çəkəcəklər - ADI AÇIQLANDI
-
Elm və təhsil19:12
Emin Əmrullayev ona VƏZİFƏ VERDİ
-
Kriminal18:12
Tulin Ələkbərovanın sevgilisi tərəfindən döyülməsi faktı araşdırıldı: nəticə... - VİDEO