Müsahibə
İnstitut direktoru: “Vərəmlə mübarizədə gözlənilən nəticə əldə olunmayıb” - MÜSAHİBƏ
- Həkim, bu günə kimi Azərbaycanda nə qədər vərəm xəstəsi müalicəyə cəlb olunub və hansı nəticələr əldə edilib? Ümumilikdə ölkədə nə qədər vərəmli xəstə var?
- 2011-ci il ərzində Azərbaycanda 4870 nəfər ilkin aşkar olunan
xəstə qeydə alınıb. Bunlardan 1127 nəfəri ağ ciyərdən kənar
formalarda xəstələnənlərdir. 100 min əhaliyə görə xəstələnmə 53,
xəstəlik isə 127,1 nəfər azalıb ki, bu da 2010-cu illə müqayisədə
7,2 faiz azalma deməkdir. Bundan başqa, ölüm sayı 391 nəfər təşkil
edib, bu göstərici də 2010-cu ilə nisbətən 4 faiz azalma
deməkdir.
Ölkədə vərəm xidməti tərəfindən aparılan tədbirlər nəticəsində
ilkin xəstələr arasında erkən aşkarlanmanın yaxşılaşması müşahidə
olunur. Belə ki, ÜST-ün aşkarlanma üzrə indikatoru 75% olduğu halda
bizim göstərici 2011-ci ildə 79%, 2010-cu ildə isə 68% təşkil
edib.
Daha bir göstəriciyə diqqət yetirək. Hazırda vərəm xəstələrinin
müalicə nəticələrinə nəzarət sistemi güclənir, müalicə nəticələri
qiymətləndirilməyən xəstələrin faizi azalır. ÜST-ün müalicə
nəticələri üzrə indikatoru 80-85%, Azərbaycandakı göstərici isə
ötən il 76,6%, 2010-cu ildə isə 62% təşkil edib. Bu da ölkəmizdə
vəziyyətin qorxulu olmadığını göstərir.
- Bir çox hallarda insanlarda vərəmin gec aşkarlanması
məlumatlılıq səviyyəsinin aşağı olması ilə əlaqələndirilir. Siz
necə düşünürsünüz, bu sahədə insanları maarifləndirmək hansı
formada aparılmalıdır?
- Bizdə insanların xəstəliklərə münasibəti fərqlidir. Hər hansı
rayonda əhali ilə vərəm xəstəliyi barədə görüş keçirmək istəsək,
heç kim könüllü gəlməz. Qorxurlar ki, onlara xəstə deyərlər. Axı
burada qorxulu şey yoxdur!
Lakin bu bir faktdır və bizi ən çox narahat edən də budur. Demək
istəyirəm ki, insanların vərəm barədə məlumatlılıq səviyyəsinin
aşağı olması bir növ onların bu xəstəliyə yanaşmasından irəli
gəlir.
Cəmiyyətimizdə vərəmə yoluxan insanlar ətrafdakı insanlar
tərəfindən təcrid olunur, onlardan uzaqlaşırlar. Bu da əlbəttə,
həmin xəstələrdə psixoloji sarsıntıya səbəb olur, müalicənin
gedişinə mənfi təsir göstərir. Elə insanlar olur ki, hətta vərəm
xəstəsi olduğu halda “stiqma”ya (hansısa qüsura görə insanlar
tərəfindən cəmiyyətdən təcrid olunma) görə həkimə müraciət etməkdən
çəkinirlər.
Vərəm xəstəliyi 100 faiz sağalan xəstəlikdir. Sadəcə, vaxtında və
ən azı 6 aylıq müalicə almaq lazımdır. Çünki bizim mentalitet
elədir ki, insan yalnız ağrı hiss etdiyi halda həkimin yanına
qaçır. Ağrı kəsəndə isə sağaldığını hesab edir. Bu heç də belə
deyil. Vərəmin müalicə kursu uzunmüddətli və davamlı olmalıdır.
- Elcan bəy, insanların müalicə almaqdan qorxması tibbi xidmət
keyfiyyətinin aşağılığı ilə əlaqəli ola bilərmi?
- Vaxtında düzgün müalicə olunmayanlar üçün sağalmaq qorxuya
çevrilir. Təqsir də adətən də özlərində olur. Müalicəyə gec
qoşulurlar, dərmanları vaxtında qəbul etmirlər, özlərini yaxşı hiss
edən kimi müalicəni dayandırırlar və sair.
Elə xəstələr var, həm I sıra, həm də II sıra dərmanlara
həssaslığını itirir. Yəni bu xəstənin müalicəsi yoxdur. İstər
burada, istərsə xarici ölkədə artıq ona heç kim çarə tapa
bilməyəcək. Niyə? Çünki həmin xəstə vaxtında müalicə almayıb və
xəstəliyi bu mərhələyə qədər gətirib çıxarıb. Buna tibb xidmət nə
etsin axı? İnsanlarda xəstəliyə yanaşma tərzi dəyişmədikcə
mənfliklər hər zaman olacaq.
- Vərəmlə mübarizədə ilkin səhiyyə işçilərinin rolu sizi qane
edirmi? Ümumiyyətlə vərəmlə mübarizəyə kimlər cəlb
edilməlidir?
- İlkin səhiyyə işçiləri vərəmlə mübarizədə mühüm rol oynayırlar.
Onlar vərəmə yoluxan insanları müayinəyə cəlb etməli, müayinədən
sonra diaqnoz təsdiqlənməli və bundan sonra dərmanların verilməsini
təşkil etməlidirlər. Lakin müalicəni yazan, onu formasını müəyyən
edən fitiziatrdır ki, onların da bu sahədə rolu çox böyük mahiyyət
daşıyır.
Hazırda bizdə islahat gedir və müəyyən nailiyyətlər əldə olunub.
Lakin problemlərimiz var və biz nöqsanların aradan qaldırılması
üçün çalışırıq.
Bundan başqa bizim 5 regional bakterioloji laboratoriyamız
(Naxçıvan, Quba, Masallı, Zaqatala və Gəncədə) var ki, onlar da bu
sahədə xidmət göstərirlər.
- Ümumdünya Səhiyyə Təşkilatının qəbul etdiyi vərəm və İİV ilə
mübarizədə əməkdaşlıq siyasəti üzrə rəhbərliyin yeni versiyası bu
xəstəliklərlə mübarizədə nə kimi effekt verəcək?
- Bu rəhbərliklər bizə ümumi istiqamət verir ki, vərəmlə mübarizə
formasını müəyyənləşdirək. Lakin ÜST-ün rəhbərliklərində elə
qaydalar var ki, onları Azərbaycanda tətbiq etmək mümkün deyil.
Misal olaraq, qapalı stasionar şəraitdə məcburi müalicə forması
var, müalicə olunmaq istəməyən xəstələr inzibati tədbirlərlə
müəssisələrə gətirilir və onu izolyasiya şəklinə salırlar. Sağalana
qədər isə buraxmırlar. Çünki bir sıra Avropa ölkələrində prinsip
var ki, əgər müalicə olunmursansa niyə başqalarını yoluxdurursan?
Əfsuslar olsun ki, bizdə bu yoxdur.
ÜST-ün rəhbərliklərində bu kimi bir neçə qayda var. Onları əlbəttə,
bizim mentalitetimizə, dinimizə və digər faktorlara görə
Azərbaycanda tətbiq etmək mümkün deyil. Lakin ümumi müddəalar –
nəzarət altında müalicə, tək bir dərmanla monoterapiyadan fərqli
olaraq, kompleks şəkildə müalicə və xəstələrin həssaslığına uyğun
olaraq onlara individual yanaşma var ki, bizdə də eynidir.
- Davamlı vərəm formasının yaranmasına daha çox hansı amil səbəb
olur? Hesab edilir ki, bəzən həkimlərin düzgün müalicə aparmaması
buna gətirib çıxarır. Bunun qarşısını almaq mümkündürmü?
- I sıra dərmanlara davamlılıq yaranmasının başlıca səbəbi xəstənin
vaxtında düzgün müalicə almaması, dərmanları vaxtında qəbul
etməməsi, müalicəni yarımçıq dayandırması və digər faktorlardır.
Buna görə də I sıra dərmanlar onlara təsir etmir, bu dərmanlara
həssaslıq itir və davamlılıq yaranır. Bundan sonra biz II sıra
dərmanlarla müalicəyə keçirik.
Əgər I sıra dərmanlarla 6-8 ay müalicədən sonra sağalmaq mümkün
olurdusa, II sıra dərmanlarla ən azı 2 il müalicə almaq lazımdır.
Bundan başqa II sıra dərmanların qiyməti birinciyə nisbətən qat-qat
bahadır. Bu dərmanlarla bir xəstənin 2 il müalicə aparması təxminən
50 min manata başa gəlir. Halbuki I sıra dərmanlarla müalicə bundan
10 dəfə daha ucuz başa gələr.
- Azərbaycanda xəstələrin II sıra dərmanlarla təmin edilməsində
müəyyən çatışmazlıqlar var. Bunun aradan qaldırılması üçün hansı
işlər görülür?
- I sıra dərmanlar xəstələrə tam pulsuz verilir. Bu dərmanlar daimi
alınır və bütün bölgələrə paylanılır. Bunlar satışda olmur.
II sıra dərmanlar bizə Qlobal Fond tərəfindən verilir. Hələlik,
əfsuslar olsun, biz bu dərmanlarla bütün xəstələri əhatə edə
bilmirik. Bu günə qədər 3000-ə yaxın xəstədən 992-sini II sıra
dərmanlarla təmin edə bilmişik.
İkinci formada olanlarda ölüm riski adətən yüksək olur. Biz bu
xəstələrdə müalicə effektliyimizi bir ara 57,7 faizə çatdırmışdıq.
Sonradan bunları da biz qrupa ayırdıq. MDR (MultiPLE Drug
ReSistance) qrupunda olanlarda bu göstərici 73%, XDR (Extensively
Dru Resistant) – bütün dərmanlara qarşı davamlı - qrupunda isə bu
göstərici 36% təşkil edir. XDR qrupunda demək olar ki, hər 100
nəfərdən 74-ü ölür. Bizdə də belə xəstələr var.
- “2011-2015-ci illər müddətində Vərəmlə mübarizə strategiyası”
və “Tədbirlər planı” qəbul olunub. Bu qərara müvafiq olaraq hansı
tədbirlər görülür və qarşıdakı illər üçün daha nələr
görüləcək?
- Bu tədbirlər planından öncə 2000, 2001və 2003-cü ildə də belə
planlar qəbul edilmiş və bu sahədə müəyyən işlər aparılmışdı. Lakin
əmrlərin respublikanın bütün rayonlarına tətbiqi 2005-ci ilə qədər
zəif formada davam edib. Lakin həmin ildən sonra bu proses aktiv
şəkildə həyata keçirilməyə başladı.
2011-ci ildə Səhiyyə Nazirliyi tərəfindən “2011-2015-ci illər
müddətində Vərəmlə mübarizə strategiyası” və “Tədbirlər planı”nın,
həmçinin “Vərəmin aşkarlanması”, “Ağ Ciyər Vərəminin kimyəvi
terapiyası” üzrə klinik prtokolların təsdiq olunması bizim bu
sahədə fəaliyyətimizi daha da sürətləndirib.
Bundan başqa ötən il ölkənin bütün rayonlarından Referens
Laboratoriyasına bəlğəm nəqli təşkil olunub və buna əsasən
dərmanlara davamlılıq üzrə epidemioloji nəzarət aparılır. Hazırda I
sıra dərmanlara həssas olmayan davamlı xəstələr üçün xüsusi proqram
hazırlanıb və onlara II sıra dərmanlar tətbiq olunur.
Nisbi epidemioloji əmin-amanlıq 100 min əhaliyə 20-22 nəfər hesab
olunur. Hazırda bizdə bu göstərici 53 nəfərdir. Tətbiq edilən
mövcud strategiyalara əsasən 2015-ci ilə qədər biz bu göstəricini
25-27 nəfərə qədər salmaq istəyirik.
Əfsuslar olsun ki, vərəmlə mübarizə sahəsində biz nəinki
Azərbaycanda, hətta bütün dünyada gözlənilən nəticələr nail ola
bilməmişik. Bunun çoxlu səbəbi var. Bu səbəblərdən biri və bəlkə də
ən birinci miqrasiyadır. Məlum məsələdir ki, əhali iş tapmaq üçün
başqa rayonlara və şəhərlərə gedir. Ola bilər ki, yaşadığı rayonda
vərəm xəstəliyi yoxdur. Lakin miqrasiya etdiyi yerdə vərəm ola
bilər və həmin insan yoluxar.
Miqrantlar daha çox yer dəyişir deyə onların aşkarlanması çox
çətinləşir. Hazırda biz bu sahədə çalışırıq və çıxış yolları
axtarırıq ki, belə insanların qeydiyyatını apar bilək.
- Azərbaycanda vərəmli xəstələrin qeydiyyatını aparmaq və onları
müalicəyə daha asan cəlb etmək üçün xüsusi bir layihə tətbiq
olunacaqmı?
- Biz hazırda xəstələrin aşkarlanması və qeydiyyata alınmasını
asanlaşdırmaq üçün “Tibbi menecer” layihəsini reallaşdırmaq üçün
hazırlıqlara başlamışıq. Bu, daha çox yeni doğulan uşaqlar üçün
verilən “Tibbi elektron kart”lar kimi olacaq. Bunun əsasında
xəstələrin qeydiyyatı, onların tapılması və müalicəyə cəlb olunması
asanlaşacaq.
Xəstə istənilən bir klinikaya getdiyi halda onun adı sistemdə
çıxacaq və avtomatik olaraq bizə məlumat göndəriləcək. Biz bu
kartlar sayəsində bütün xəstəxanalar və klinikalarla qarşılıqlı
məlumat mübadiləsi aparacağıq.
Layihənin hazırlıq mərhələsi gedir və çox güman ki, bu ilin sonunda
onu istifadəyə verəcəyik. Bu layihə hazır olduqdan sonra biz bunu
əvvəlcə Bakıda mərhələli şəkildə tətbiq edəcəyik. Burada onun
effektivliyi yoxlanılacaq və daha sonra rayonlarda da tətbiq
olunacaq. Bu layihəni USAİD beynəlxalq təşkilatı ilə birgə təşkil
edirik.
- Araşdırmalar nəticəsində vərəmin vaxtında qarşısının
alınmasında yaranan problemlərdən birinin diaqnozun düzgün
qoyulmaması ilə bağlı olduğu ortaya çıxır. Azərbaycanda rentgenlə
diaqnozun qoyulması kifayət etmir. Bunun üçün başqa hansı üsuldan
istifadə etmək lazımdır?
- Azərbaycanda vərəmin diaqnozu 3 üsul vasitəsilə təyin edilir.
1. Bakterioloji üsul –bəlğəmin vərəm çöplərinə yoxlanılması. Bu
üsulu biz bütün respublikada tətbiq edə bilirik. Biz bu metodun
köməkliyi ilə vərəm çöpü ifraz edənləri tapırıq, onlarda hansı
dərmanlara həssaslıq və davamlılıq olduğunu müəyyənləşdiririk. Bu
proseslər əvvəllər 2 ay vaxt çəkirdisə, artıq indi 1 həftə ərzində
nəticə əldə edə bilirik.
Bizdə Referens Laboratoriya 2009-cu ilin ikinci yarısından etibarən
fəaliyyət göstərməyə başlayıb. Bu laboratoriya müayinələri düzgün
apardığı üçün Almaniyada yerləşən Beynəlxalq Laboratoriyadan
sertifikat alıb.
2. Şüa (Rentgen) diaqnostikası – bu üsulla xəstədə ciyərlərin neçə
faizinin vərəmə tutulduğunu müəyyənləşdirmək olur. Bundan sonra isə
əsas məqsəd vərəm çöplərinin ifrazatının dayandırılmasıdır ki, bu
da nailiyyət hesab edilir. Hazırda müəyyən problemlərimiz var, amma
həll etmək üçün çalışırıq.
3. Mantu sınağı – Bu üsul yoluxan, lakin hələ xəstələnməyən
uşaqların aşkar edilməsi üçün faydalıdır. Elə olur ki, kimsə bu
xəstəliyə yoluxub, lakin hələ xəstələnməyib. Biz bunun qarşısını
almaq üçün mantu diaqnozu ilə yoxlama aparırıq və bunun nəticəsində
yardım göstərə bilirik.
- Ötən ilin oktyabr ayında Bakıda Ümumdünya Səhiyyə Təşkilatının
61-ci sessiyası keçirildi. Sessiyadan sonra ÜST Azərbaycanda
səhiyyə sahəsində bəzi çatışmazlıqların düzəldilməsi barədə
tapşırıqlar verdi. Bilmək istəyirdik ki, ÜST vərəmlə bağlı hansı
göstərişlər verib?
- Hazırda vərəmlə bağlı İctimai Səhiyyə və İslahatlar Mərkəzi
(İSİM), ÜST-ün Azərbaycandakı nümayəndəliyi və biz özümüz də
maarifləndirici broşuralar çap edərək poliklinikalara, xəstələrə və
digər insanlara paylayırıq. Bundan başqa müxtəlif video roliklər
hazırlayaraq bütün telekanallarda nümayiş etdiririk.
- Bir çox hallarda bölgələrdə yaşayan insanlar lazımi səviyyədə
tibbi xidmətin olmadığından şikayət edir. Bölgələrdəki
dispanserlərin fəaliyyəti sizi qane edirmi?
- Aparılmış islahatlara əsasən dispanserlərin işini poliklinakalara
həvalə etmişik ki, həkimlər xəstələrə daha yaxın olsun. Hər bir
rayonun fitiziatrı var ki, onlar xəstələrə nəzarət edirlər.
Dərmanlara gəldikdə, istər rayonlarda, istərsə də şəhərlərdə I sıra
dərmanlar kifayət qədərdir və onlar pulsuz paylanır.
F. Hacıyev
Publika.az
-
İdman22:48
Son çempion boşanır: uşaqlıqdan başlayan nağıl bitir
-
Dünya21:36
Məşhur bloqer helikopterdən bir çanta pulu çimərliyə SƏPƏLƏDİ - VİDEO
-
Sosial21:24
Böyük ümidlərlə getmişdilər: ilk şəhidimizin məzarı tapılmadı - FOTO
-
Nəqliyyat19:48
Azərbaycanda bu taksi şirkəti BAĞLANIR - FOTO
-
Sosial19:12
Azərbaycanda tikintidə GÖRÜNMƏMİŞ HADİSƏ - VİDEO
-
Sosial18:40
Xankəndidə dünyaya gələn ilk körpənin ailəsinə MÜJDƏ
-
Sosial17:54
Əli Əsədov qərar imzaladı
-
Qarabağ 17:13
Xankəndidə ilk körpə dünyaya gəldi - FOTO