Müsahibə
“Ortaq seriallar çəkəcəyik“ - MÜSAHİBƏ
TRT-nin Bakı təmsilçisi Yüksəl Dəyərcan Publika.Az-a müsahibə verib.
- Yüksəl bəy, TRT-nin Bakı bürosu 11 ildir Azərbaycandadır.
Özünüzü burada necə hiss edirsiniz?
- TRT olaraq 11 ildir Azərbaycanda fəaliyyət göstəririk, mən özüm
üç ildir Bakıdayam. Özümü evimdəki kimi hiss edirəm. Bu müddətdə
həm Azərbaycan, həm də Türkiyə üçün bir çox xəbərlər hazırladıq.
İndiyədək ölkədə heç bir çətinliklə qarşılaşmadıq. Nə dövlət
qurumları ilə, nə də müxalifət və xalqla ünsiyyətdə. Burda hamı
doğurdan da TRT-ni özlərininkü hesab edir. Biz də özümüzü yad
saymırıq.
- 11 il az vaxt deyil. Gördüyünüz işlərdən, buradakı
fəaliyyətinizdən razısınızmı?
- Bu çağacan 10 mindən yuxarı xəbər, 700 civarında proqram
hazırlayıb Türkiyə tamaşaçılarının ixtiyarına buraxmışıq. Düşünürəm
ki, bunlar çox böyük rəqəmlərdir.
- Azərbaycanla bağlı hazırladığınız xəbər və proqramlar
əsasən hansı səpgidədir?
- Qarabağ problemi ilə bağlı xəbərlərə üstünlük veririk. Çünki
Qarabağ bizim də problemimizdir. Biz eyni soydan, eyni kökdən, eyni
irqdən gələn bir millət, iki dövlətik. Həmçinin xəbərlərimizi
Türkiyənin xarici siyasəti istiqamətində hazırlayırıq. Həm
Azərbaycanın, həm də Türkiyənin maraqlarına uyğun materiallara daha
çox üstünlük veririk. 31 mart və Xocalı soyqrımları, 20 yanvar
faciəsi, Azərbaycanın müstəqillik günü kimi vacib tarixləri
diqqətdə saxlayırıq.
Bunlarla da kifayətlənmirik. Ölkənin inkişafı nəzərimizdən yayına
bilməz. Azərbaycanla bağlı xəbərlər TRT-nin televiziya
kanallarında, 18 radio kanalında, 35 dildə yayımlanan internet
səhifəsində yerləşdirilir. Üstəlik, bu xəbərlər Türkiyədə başqa
dillərə tərcümə edilərək efirə verilir. Hazırladığımız xəbərlər
TRT, TRT-xəbər, TRT-Türk, TRT "Avaz" kanallarında yayımlanır.
- TRT kanallarında Azərbaycandan gündə necə xəbər efirə
verilir?
- Gündə 7-8 material göndəririk Türkiyəyə. Onlardan 3-ü kanalda
yayımlanır. Digərləri də internet səhifəsində yerləşdirilir.
- Azərbaycanda gündəm yaradan xəbərləri izləyib operativ
şəkildə Türkiyəyə göndərə bilirsinizmi?
- Gündəmlə bağlı hər xəbəri izləyirik. Beynəlxalq əhəmiyyət
daşıyan, Azərbaycanın daxili işlərinə qarışmayan, beynəlxalq
arenada rezonansa səbəb olacaq xəbərlərə daha çox önəm veririk.
Xəbərləri hazırlamaqla yanaş operativliyi də saxlamağa
çalışırıq.
- TRT-nin Bakı nümayəndəliyi ilə Türkiyədə bu mənada
rəqabətə girən başqa kanal varmı?
- Zənnimcə, operativliyi qoruya bilirik. Azərbaycanla bağlı
məlumatları Türkiyəyə ilk biz xəbərləyirik. Bu işdə Türkiyədə
bizimlə rəqabətə girən kanal hələlik yoxdur.
- Azərbaycanda fəaliyyətinizin genişləndirilməsi xəbərini
eşitmişik. Doğrudurmu? Doğrudursa bunun hansı zərurətdən
yarandığını acıqlayardınız.
- Bəli, xəbər doğrudur. Bunun bir səbəbi var: Azərbaycanı Türkiyəyə
daha yaxından tanıtmaq. Bilirsiniz ki, Türkiyə ilə Azərbaycan
qardaş ölkələrdir. Düşünürük ki, bu iki ölkənin insanları
biri-birini daha yaxından tanımalıdırlar. Odur ki, fəaliyyətimizi
genişləndirmək qərarına gəldik. Fikirləşdik ki, əvvəl Azərbaycanla
bağlı beş xəbər, iki proqram hazırlayırdıqsa, indi bunun sayını
daha da artırmalıyıq.
Bu gün Azərbaycan Türkiyəni daha yaxından izləyir. Türkiyə isə bu
məsələdə bir qədər geri qalır. Məqsədimiz Türkiyədə Azərbaycanının
yemək mədəniyyətini, geyim üslubunu, yaşam standartlarını, təbii
gözəlliklərini, nemətlərini, eləcədə turizm potensialı ilə tanış
etməkdir. Biz Azərbaycanın Türkiyədə tanınması üçün hərtərəfli
dəstəyi verməyə hazırıq.
Bu gün Azərbaycanın turizm imkanları barədə Türkiyədə çox az
məlumat var. Yaxınlarda əməkdaşlarımız Mədəniyyət və Turizm
Nazirliyində olub bu barədə gözəl bir proqram hazırladılar. Həmin
proqramda Azərbaycanda turizm məkanları, tarixi mədəniyyət
abidələri barədə məlumatlar verməyi nəzərdə tuturuq.
- Bəs hansı yeni proqramlar hazırlamağı
planlaşdırırsız?
- Yaxın günlərdə Azərbaycan mədəniyyəti ilə bağlı yeni bir veriliş
efirə verəcəyik. Bu, Azərbaycan mədəniyyətinin, musiqi sənətinin
Türkiyədə tanınmasına xidmət edəcək. "Azərbaycan ulduzları" adlanan
proqram vasitəsilə inanırıq ki, bu ölkənin doğurdan da sözün sənətə
çevrildiyi bir ocaq olduğunu türk izləyicilərinə çatdıracağıq.
Burada çox dəyərli sənətcilər var ki, onların Türkiyədə tanınması
vacibdir. Aprel ayından bu veriliş TRT"Avaz"da yayımlanacaq. Bundan
sonra bir mətbəx verilişi hazırlamağı düşünürük. Verilişin
adı"Azərbaycan ləzzətləri" olacaq. Bir də 30-40 dəqiqəlik"Qafqaz
günləri" adlı proqram vasitəsilə bölgədəki günün nəbzini tutmağa
çalışacağıq. Bu proqramda Ermənistan, Gürcüstan, Osetiyadakı
hadisələr və Rusiyadakı bölgə ilə bağlı gündəmi izləyəcəyik.
Veriliş Azərbaycan və Türkiyənin xarici siyasətinə zərər gətirən
heç bir xəbər getməmək şərtilə ərsəyə gətiriləcək.
- Azərbaycandakı telekanallarla da işbirliyi qurmağı
nəzərdə tutursunuzmu?
- Bəli. Hətta Azərbaycandakı telekanallarla yaxın əməkdaşlıq
məqsədi güdən, təcrübəmizin qarşılıqlı paylaşması naminə yeni
layihə üzərində işləyirik. Layihə çərçivəsində hər il bir qrup
azərbaycanlı telejurnalist TRT-də qonaq olacaq, oradan isə
Azərbaycana gələcək.
- Belə görünür ki, Bakıda fəaliyyətiniz nəzərəçarpacaq
dərəcədə genişlənəcək. Bəs kadr potensialınız necə, buna imkan
verəcəkmi?
- Doğrudur, işimiz çoxalacaq. Amma biz bunun öhdəsindən çox
işləməklə gəlməyi düşünürük. Bu gün bizim kadr potensialımız
bir-iki nəfəri çıxmaq şərtilə tam olaraq Azərbaycandan formalaşıb.
Ona görə də Türkiyədən işçi qüvvəsinin gətirilməsini nəzərdə
tutmuruq. İnanırıq ki, bunu öz gücümüzlə edə biləcəyik.
- Azərbaycanın Türkiyədə çox az tanındığını söylədiniz.
Ölkəmizin geniş tanınması üçün daha nələri
planlaşdırırsınız?
- Məsələn, "Avropa-Avropa" serialının bir bölümünün burada çəkməyi
düşünürük. Ortaq serial çəkmək planımız da var. Bunun üçün
Azərbaycanda özəl telekanalların biri ilə işbirliyi quracağıq.
Mayda TRT rəhbərliyi Azərbaycana gələcək. Bütün telekanalların
idarə heyətinin başçıları ilə görüş keçirib müzakirə aparacağıq.
Artıq iki telekanalla anlaşmamız var. Amma adlarını indidən çəkmək
istəmirəm.
- Qarşıdan "Eurovision" beynəlxalq mahnı yarışması gəlir.
TRT-nin Bakı nümayəndəliyi Bakıda "Eurovision" həyəcanını isti-isti
türk tamaşaçısına çatdırmaq üçün hazırlıq işləri
aparırmı?
- Artıq Bakının bu yarışmaya necə hazırlaşdığı barədə Türkiyəyə
reportajlar göndəririk. Bakıda aparılan təmir, tikinti, abadlıq,
quruculuq işlərindən xəbərlər hazırlayırıq. Yarış ərəfəsi isə canlı
yayın komandası Bakıya gələcək.
Zülfiyyə Telmanqızı
Publika.Az
-
Magazin222:00
Sevgilisi məşhur aktrisanı döydü: "Aylarla..."
-
Sosial21:36
Daxili İşlər Nazirliyi əhaliyə ÇAĞIRIŞ ETDİ
-
İnanc21:24
Ramazanın 19-cu gününün duası - İmsak və iftar vaxtı
-
Sosial20:24
Şahmar Hüseynova yeni VƏZİFƏ VERİLDİ - FOTO
-
Maraq dünyası20:15
"Tarqovı"da çiy ətdən libas geyinən qızdan QƏRİBƏ HƏRƏKƏTLƏR - VİDEO
-
Art19:36
Azərbaycan və Türkiyə birgə film çəkəcəklər - ADI AÇIQLANDI
-
Elm və təhsil19:12
Emin Əmrullayev ona VƏZİFƏ VERDİ
-
Kriminal18:12
Tulin Ələkbərovanın sevgilisi tərəfindən döyülməsi faktı araşdırıldı: nəticə... - VİDEO