Divan üzvü Rauf Arifoğlunun istefasını alqışladı

Müsavat Divanının üzvü, sabiq deputat İkram İsrafil “Yeni Müsavat” qəzetinin baş redaktoru Rauf Arifoğlunun partiyadan istefa vermək istəyini alqışlayıb.

Publika.az xəbər verir ki, İ. İsrafil Divanı baş redaktorun istefasını qəbul etməyə çağırıb: “Müsavat Partiyası Rauf Arifoğlunun partiya qarşısında xidmətlərini nəzərə alaraq onun istefasını Divanda qəbul etməlidir. Rauf bəyin məlum anonsunu eşidəndə İsa Qəmbərin “Yeni Müsavat”ın təsisçiliyindən istefasını xatırladım. Həmin vaxt İsa Qəmbər çıxış edərək azad və müstəqil mətbuatın önəmindən, asılı mətbuatın fəsadlarından danışdı. O, “Yeni Müsavat” ailəsinə uğurlar arzuladı və təsisçilikdən imtina etdi.

İndi Rauf Arifoğlunun İsa Qəmbərin lideri olduğu Müsavat Partiyasından istefası yaxınlaşır. Rauf bəyin partiyadan istefa vermək istəyini anlayır və təqdir edirəm. İnanıram ki, Rauf bəyin istefası hər bir partiyadaşı tərəfindən anlayışla qarşılanacaq. Çünki Müsavat Partiyasının uğurlarında “Yeni Müsavat”ın, “Yeni Müsavat”ın uğurlarında Müsavat Partiyasının rolu var. Düşünürəm ki, Müsavat Partiyası Rauf Arifoğlunun partiyada rolunu nəzərə alıb, onun istefasını Divanda qəbul etməklə nümunə göstərəcək”.

Asif Nərimanlı