Nida.az
Ağ Evdən gələn xüsusi elçi: “Türk axını” arxivə göndərilir, Azərbaycan öndə – TƏHLİL
Avropanın qaz bazarı uğrunda müharibədə kartlar yenidən qarışır, “Türk axını” layihəsi sələfinin taleyi ilə üz-üzə və Bakının maraqlarının reallaşması istiqamətində yeni proseslər.
İyunun 11-də ABŞ Dövlət Departamentinin Beynəlxalq enerji
məsələləri üzrə xüsusi elçisi və əlaqələndiricisi Amos Hokstaynın
rəhbərlik etdiyi nümayəndə heyəti Bakıya səfər etdi. Prezident
İlham Əliyevlə görüşdə ABŞ-Azərbaycan münasibətlərinin hazırkı
vəziyyəti və perspektivləri, eləcə də enerji məsələləri üzrə
əməkdaşlıq və gələcəkdə bunun davam etdirilməsi müzakirə
olundu.
Bu, xüsusilə son dövrlər yaşanan gərginlik fonunda ABŞ-Azərbaycan
münasibətlərinin inkişafı baxımından olduqca müsbət məqamdır.
İkitərəfli münasibətlərin müəyyən dövrlərdə ABŞ-ın bəzi dairələri
tərəfindən gərginləşdirilməsi təcrübəsi mövcuddur. Lakin son anda
həmişə qarşılıqlı maraqlar əsas önəm kəsb edir.
Vaşinqtonun xüsusi elçisinin Bakı səfərinin arxasındakı digər məqamlar isə olduqca diqqət çəkir. Söhbət Avropanın enerji bazarı uğrunda ABŞ-Rusiya mübarizəsindən gedir.
Amos Hokstayn. Yaxın günlərdə Ağ Evin enerji məsələləri
üzrə xüsusi elçisi olan bu diplomat “Türk axını” layihəsinə görə
Afinanı sərt tənqid etməsi ilə yadda qaldı. O, yunanların Moskvaya
yaxınlığı ilə seçilən Çipras hökumətinə “bu layihə siyasi mahiyyət
kəsb edir, siz TAP layihəsinə üstünlük verməklə qazana bilərsiniz”
deyə bildirmişdi. Afinanın öz qınını (Avropa Birliyini) bəyənməməsi
və məhz buna görə ciddi təzyiqlərlə üzləşərək uçurumun ağzına qədər
gəlməsində bu amerikalı diplomatın rolu böyük oldu. Azərbaycan bu
proseslərə qarışmasa da, Köhnə Qitənin daxilində baş verən
qarşıdurma Bakının maraqlarına uyğun gəlir.
Hokstaynın səfərindən üç gün öncə - iyunun 8-də ABŞ-ın
Azərbaycandakı səfiri Robert Sekutanın energetika naziri Natiq
Əliyevlə görüşməsi də bu yöndə diqqət çəkir. Məlumatlara görə,
görüşdə “Türk axını” və TAP müzakirə olunub.
Natiq Əliyev TAP layihəsinin reallaşdırılması istiqamətində
işlərin qrafikə uyğun aparıldığını bildirib. Həmçinin TAP ətrafında
müşahidə olunan problemlərə toxunaraq, ABŞ-ın bu məsələdə mövqeyini
yüksək qiymətləndirib.
“BTC nümunəsi də təsdiqləyir ki, iri enerji layihələrinin həyata
keçirilməsi üçün siyasi dəstək çox vacibdir. TAP-ın reallaşması
üçün də belə dəstək mühüm əhəmiyyət kəsb edir”, - deyə nazir
vurğulayıb.
Göründüyü kimi, enerji savaşında yeni proseslər baş verməkdədir və
Amerika bütün vasitələrlə “Türk axını”nı sıradan çıxaracaq,
əvəzində Azərbaycan qazının dominantlığını təmin edəcək addımlar
atmaqda israrlıdır. Təbii ki, bu, Azərbaycanın maraqlarına xidmət
edir, lakin ABŞ-ın öz çıxarları da var. Xüsusilə, Rusiyanın
zəiflədilməsi və Ukraynadan asılı vəziyyətə gətirilməsi üçün
Vaşinqton bütün artilleriyasını işə salıb.
Buna qədər Avropanın enerji təhlükəsizliyinin zamini olan
Azərbaycan qazına qarşı bir sıra maneələr var idi. Prezident İlham
Əliyevin bu haqda dediyi sözlər də təsadüf deyildi.
“Ümid edirəm ki, TAP qarşısında hər hansı süni maneə
meydana çıxmayacaq, ancaq belə əngəllər meydana çıxsa, əlbəttə ki,
bundan udan tərəf olmayacaq”, - deyə dövlət başçısı
Respublika günü ilə bağlı keçirilən mərasimində çıxışı zamanı
bildirmişdi.
Əsas maneələr isə Yunanıstanın solçu hökuməti və Trans-Adriatik Qaz
Boru Kəmərinin (TAP) keçəcəyi İtaliya ərazisində Moskvaya yaxın
olan bəzi dairələrin “ekoloji çirklənməni” əsas gətirərək etdikləri
çıxışlar idi.
Belə ki, bu prosesə keçmiş italiyalı şoumen, hazırda “5 Star”
(5-Star Movement-M5S) adlı siyasi hərəkata başçılıq edən və
parlamentdə 23 faizlik fraksiyası olan Beppe Qrillo rəhbərlik edir.
O, Rusiya KİV-nə müsahibəsində Azərbaycan qazının İtaliyadan
keçməməsi üçün əlindən gələn hər şeyi edəcəyini açıqlayıb.
İtaliya maneəsi, demək olar ki, aradan qalxdı. Bu ölkənin hökuməti
TAP-ın təqdim etdiyi ekoloji layihə haqda sənədi imzalamaqla,
layihənin gerçəkləşməsi istiqamətində ilkin addımı atdı. Boru
kəmərinin İtaliyadan keçən quru hissəsinin tikintisi üçün ilkin
seçim elan edilib və inşa olunacaq kəmər bu ölkənin “Snam Rete Gas”
qaz nəqli şəbəkəsinə qoşulacaq. Prezident İlham Əliyevin ötən həftə
İtaliyaya səfəri və aparılan müzakirələr də problemin aradan
qalxdığını deməyə əsas verir.
Yunanıstan əngəli hələ mövcud olsa da, artıq qüvvədən düşür. Belə
ki, Afinanın solçu rəhbərliyi SOCAR-ın bu ölkənin DESFA
qazpaylayıcı şirkətinin 60 faiz səhmlərini alması haqda müqaviləyə
qarşı çıxır. Bununla bağlı qərarın qəbulu sentyabrda veriləcək.
Həmçinin Çipras hökuməti Moskvanın “Türk axını” layihəsinə sonsuz
dəstəyini nümayiş etdirirdi. Yunan solçuları Rusiyadan alacaqları
güzəştli kreditə və digər köməyə bel bağlayaraq, Brüsselə buynuz
göstərir, Azərbaycan qazının çıxışını tıxamağa çalışırdı. Lakin
proseslər fərqli məcraya yönəldi, ruslar vəd etdikləri pulu
vermədilər və Yunanıstan faktiki olaraq defoltla üz-üzə qalıb. Bu
isə artıq Afinanın nəinki “Türk axını” layihəsinə, ümumiyyətlə hər
hansı layihəyə verə biləcəyi dəstəyinin qalmadığını göstərir. Yəni
Afina ABŞ-ın qarşısına qoyacağı istənilən məsələ ilə razılaşmaq
məcburiyyətindədir.
Bununla yanaşı, Rusiyanın “Türk axını” üçün seçdiyi marşrut
ölkələr - Makedoniya və Serbiya da oyundan çıxıb. Belə ki
Makedoniya hökuməti Qərbə yaxın müxalifətin aksiyalarından sonra
geri çəkildi. Baş verənləri izləyən Serbiya da analoji halla
qarşılaşmamaq üçün Rusiya layihəsindən imtina etdi.
Beləliklə, ləğv olunan “Cənub axını” layihəsinin əvəzinə Moskvanın
gündəmə gətirdiyi “Türk axını” da sələfinin taleyini yaşayacaq.
Ötən həftə “Qazprom”un “Türk axının”ın tikintisi üçün İtaliyanın
“Saipem” şirkəti ilə müqaviləsini ləğv etməsi Rusiyanın bununla
müəyyən mənada barışdığını göstərir. Halbuki, layihə gündəmə
gələndə Kreml hesab edirdi ki, bu, 2016-cı ilə qədər reallaşacaq,
beləliklə, Azərbaycan qazını 2019-cu ildə Avropa bazarına çıxaracaq
boru kəmərlərini qabaqlayacaqdı. Lakin məsələ kağız üzərində qaldı.
Artıq Türkiyənin də layihədən imtina etdiyini demək olar.
Türkiyənin energetika və təbii sərvətlər naziri Taner Yıldız
“Türk axını” ilə bağlı hər-hansı nəticənin əldə olunmadığını deyib.
Rusiyanın əsas ümid etdiyi Ankara faktoru qazın qiymətində
razılığın əldə olunmaması ilə ortadan qalxır. Əvəzində Azərbaycan
qazını Avropaya çıxaracaq marşrutun Türkiyə ərazisində keçən
hissəsinin inşa istiqamətində işlər sürətləndirilib.
Proseslər göstərir ki, Rusiya sonda Ukrayna marşrutu ilə barışmaq
məcburiyyətində qalacaq.
Artıq iyulun 1-dən “Qazprom” qazın Ukraynaya çatdırılmasını
dayandırıb. Şirkət mavi yanacaq üçün Ukrayna tərəfindən ödənişin
əvvəlcədən edilməsini tələb edir. Öz növbəsində, Ukrayna tərəfi
qiymətdə razılaşma olmadığı üçün Rusiya qazını almaqdan imtina
edib.
“Rusiya qazının hazırkı bazar qiyməti min kubmetr üçün 250 dollar
təşkil edir. Amma rusların fikrincə, onlar qazı 300 dollara sata və
deyə bilərlər ki, 50 faiz endirim edirlər. Bu, endirim deyil,
bazardır. Biz “Qazpprom”a dotasiya verməyəcəyik”, - deyə Ukraynanın
baş naziri Arsen Yasenyuk deyib.
Prezident Pyotr Poroşenko isə bildirib ki, “Naftoqaz” və
“Qazprom” arasındakı tranzit razılaşması uzadıla bilər: “Əminəm ki,
“Naftoqaz” və “Qazprom” arasındakı tranzit razılaşması 2019-cu
ildən sonra da davam etdiriləcək. Çünki bunun alternativləri
yoxdur”.
Təbii ki, Poroşenko “alternativlər yoxdur” deməklə Vaşinqtonun
sözlərini çatdırır. ABŞ-ın “qaz müharibəsində” Rusiyanı məğlub
etməsi üçün mütləq şəkildə Azərbaycan qazına üstünlük verməsi
lazımdır. Bu isə Azərbaycan qazının önəmini daha da artırır.
Diqqət çəkən və təqdir olunası məqam isə bütün bu qarşıdurmada
Azərbaycan qazı uğrunda olsa da, rəsmi Bakı hədəf olmaqdan yayına
bilir. Bu, Azərbaycan siyasətinin manevr imkanlarının genişliyindən
xəbər verir.
Asif Nərimanlı
-
Magazin202:22
Məşhur model çimərlikdə çılpaq pozalar verdi - FOTO
-
Nəqliyyat01:00
ŞOK İDDİA: Dubayda su altında qalan avtomobillər Azərbaycana gətirilə bilər - VİDEO
-
Magazin100:45
“Səhvlərinizin əllərindən öpün”
-
MDB00:30
Azərbaycanlı milyarder Rusiyanın ən zəngin adamı oldu
-
Qoroskop00:15
Günün ULDUZ FALI: münasibətlər gərginləşə bilər
-
MDB18 Aprel 23:12
Bu ölkədə falçı və cadugərlərlə bağlı SƏRT QƏRAR VERİLƏCƏK
-
Magazin118 Aprel 22:48
Məşhur xanəndə ONLARI QINADI: "Bu saat necə gəldi geyinirlər" - FOTO
-
Səhiyyə18 Aprel 22:36
Ürək ritminin pozulmasının YENİ TƏHLÜKƏSİ: Hər beşinci insan...