PKK uşaqları qaçırır, polis silahla yatır, Türkiyə o xəritəni axtarır - TƏHLÜKƏ

Dağlıca və İğdır hücumlarından sonra Türkiyə polisi PKK-nın mina xəritəsini tapmaq üçün hərəkətə keçib.

Publika.az xəbər verir ki, PKK-nın yollara minalar yerləşdirərək əsgər və polisə qarşı terror aktları hazırladığı ortaya çıxıb. Polis hazırda terror təşkilatının mina xəritəsini aşkarlamaq üçün əməliyyatlara başlayıb.

Digər tərəfdən, PKK-nın Şərqi və Cənub-Şərqi Anadolu bölgəsində polisə qarşı zirehi dələn raketlər istifadə etdiyi bəlli olub. Məlumata görə, terror təşkilatının istifadə etdiyi bəzi silahlar 60 santimetr divarı dəlib keçə bilir. PKK-nın kustar üsulla düzəldilmiş bombalara, həmçinin "Doçka", "Kanas", RPG-7 minaatan, BCK fişəngləri, M-16, G-3, "Kalaşnikov" və C3, C4, A4 partlayıcılarına sahib olduğu dəqiqləşdirilib.

Terror təşkilatının güclü dəstəyə malik olduğu bölgələrdə polis “PKK həyat yoldaşınızı və uşaqlarınızı qaçıra bilər” - xəbərdarlığını edib. Terrorçuların evlərə də hücum edəcəyindən ehtiyat edilir. Hər cür terrora qarşı Türkiyə polisi yatarkən də silahı atəşə hazır vəziyyətdə yanında saxlayır.

Asif Nərimanlı