Nida.az
Əliyev-Ərdoğan-Putin görüşündə “Qarabağ masası”: Kreml saatı kimin xeyrinə işləyəcək? – TƏHLİL
Bakı-Moskva-Ankara üçbucağında yeni mərhələ başlaya bilər. Dağlıq Qarabağ münaqişəsinin həlli istiqamətində ciddi irəliləyişlərin anons edildiyi bir vaxtda Prezident İlham Əliyevin Moskvada Ərdoğan və Putinlə bir araya gəlməsi bu coğrafiyada yeni şəkilləndirmələrə də yol aça bilər. Bakının Moskvadan, Ankaranın Bakıdan, Moskvanın hər ikisindən öz istəkləri var.
Sentyabrın 23-də Rusiyanın paytaxtında Cümə Məscidinin açılışı
olacaq. Həmin gün Kremlin qülləsindəki saatın kimin xeyrinə
işləyəcəyi sualı maraqlıdır. Rəsmi məlumata görə, sözügedən tarixdə
Azərbaycan Prezidenti İlham Əliyev, Türkiyə Prezidenti Rəcəb Tayyib
Ərdoğan, həmçinin Qazaxıstan, Türkmənistan, Özbəkistan, Tacikistan,
Qırğızıstan, İran, İordaniya, Qətər, Səudiyyə Ərəbistanı, Fələstin
dövlət rəhbərləri də mərasimə qatılacaqlar.
Qərblə münasibətləri ip üstündə olan Putin üçün NATO üzvü
Türkiyədən tutmuş, Cənubi Qafqazın ən önəmli ölkəsi olan
Azərbaycan, eləcə də Mərkəzi Asiyanın əsas oyunçuları və ABŞ-ın
yaxın müttəfiqi statusunu daşıyan şeyxlərlə Moskvada bir araya
gəlmək kimi yaxşı fürsət ola bilərmi?! Kremlin rəhbəri Avrasiyanın
geosiyasi proseslərini ən azından müzakirə etmək və bəzi razılıqlar
qazanmaq imkanı qazanacaq. Bu həm də Qərbə əla “əzələ nümayişi”
olacaq.
Kreml toplantısında bizim üçün diqqət çəkən ən mühüm məqam isə
Azərbaycan, Rusiya və Türkiyə liderlərinin üçtərəfli görüşləridir.
Təbii ki, Azərbaycan-Rusiya, Rusiya-Türkiyə ikitərəfli görüşləri də
mümkündür.
- Dağlıq Qarabağ
- Enerji faktoru
Üç liderin Moskva divarları arxasında müzakirə edə biləcəyi ən əsas məsələlər bunlardır. Digər məqamlar isə bu iki məsələnin altında gəlir. Toplantıda sentyabrın ilk günlərində Moskvanın baş diplomatı Lavrovla Bakıya göndərdiyi, daha sonra Sarkisyanı Kremlə çağırıb təqdim etdiyi “Qarabağ planı”nın Vladimir Putin və İlham Əliyev arasında yaxın təmasda nəzərdən keçirilməsi gözlənilən məsələdir. Lavrovun səfəri öncəsi Məmmədyarovun Ankarada məsləhətlər aparması prosesdə Türkiyənin də əsas oyunçu olduğunu göstərir. Bu baxımdan, Əliyev - Ərdoğan - Putin üçlüyünün gündəliyində Qarabağ müzakirəsi prioritetdir. Ötən həftə Türkiyənin yeni XİN rəhbəri Firudun Sinirlioğlunun Bakı-Soçi marşrutu üzrə səfərə çıxması da üç liderin müzakirə etməli olduğu çox vacib məsələlərdən xəbər verir.
Ehtimala görə, görüşün Dağlıq Qarabağ punktunda masaya yatırılacaq maddə Rusiyanın yeni planıdır. Hesab etmək olar ki, Rusiya münaqişənin həllində heç vaxt olmadığı qədər maraqlıdır və bunu Azərbaycanın xeyrinə etmək istəyir. Sadəcə olaraq, özünün çıxarlarının da təmin olunmasına çalışır.
Misal üçün, ABŞ kəşfiyyatına yaxınlığı ilə seçilən “Stratfor” beyin mərkəzinin 21 sentyabr tarixli “Dağlıq Qarabağ qambiti” adlı təhlilində deyilir: “Bakı torpaqların qaytarılmasını rəsmi şəkildə prioritet istiqamət elan edib, lakin Ermənistanın patronu Rusiyanın mövqeyinə görə ciddi hərəkətə keçə bilmir. Bu status-kvo Rusiyanın Kiyevdə Qərblə toqquşduğu 2014-cü ildən sonra dəyişdi. Rusiya qəfildən Ermənistan üçün az etibar edilən patrona çevrildi. Ukrayna münaqişəsi Rusiyanın təhlükəsizlik zolağına zərbə vurdu və tətbiq olunan sanksiyalar iqtisadiyyata zərər verdi. Eyni zamanda, Azərbaycan Qərb üçün daha qiymətli oyunçuya çevrildi. Çünki Bakı Rusiyanın enerji təchizatına alternativ təklif edə bilmişdi. Bundan sonra Azərbaycan tərəfi təmas xəttində mövqelərini möhkəmləndirdi və açıq şəkildə Ermənistan ordusuna ciddi zərbələr vurdu. Ermənistan və Rusiya zəiflədiyi bir vaxtda Azərbaycanın Dağlıq Qarabağ münaqişəsində mövqeyi gücləndi. Son aylar danışıqlar prosesində diplomatik fəaliyyətin görünməmiş səviyyəsi müşahidə olunur. Bunun özü Dağlıq Qarabağda status-kvonun tezliklə dəyişəcəyini deməyə əsas verir”.
Bəli, Vaşinqton mənzilli beyin mərkəzinin təhlilindən də göründüyü
kimi, Rusiya münaqişənin həllinə “hə” deyir. Həqiqətən də, 2014-cü
ildən sonra Avrasiyada kartlar qarışdı və Ukraynanı faktiki itirən
Moskva üçün Cənubi Qafqazın çəkisi artdı. Çünki Qərb təhlükəsi daha
yaxından hiss olunmaqdadır. NATO gürcü torpaqlarında hərbi baza
açmaqla Kremlə açıq meydan oxudu. Bu, kobud desək, Kremlin
divarları dibində adam öldürməyə bənzəyir, yəni “sənə öz
evində hakim olaram” mesajıdır. Belə bir vaxtda Qərb üçün enerji
faktoruna görə əvəzolunmaz oyunçuya çevrilən Azərbaycanın dəyəri
Kreml üçün ikiqat artır. O da vurğulanmaldır ki, rəsmi Bakı
anti-Rusiya kampaniyasında ehtiyatlı manevrləri də unudulmayıb.
Beləliklə, Moskva “Madrid prinsipləri” əsasında (Rusiya üç həmsədrin irəli sürdüyü prinsipləri əsas götürməklə prosesdə “özbaşbaşnalıq” etmədiyini nümayiş etdirir) Qarabağ üçün həll planı hazırlayır, Azərbaycanın dəstəyini qazanmaqla Cənubi Qafqazda oynanılan kart oyununda əlini gücləndirir, lakin özü üçün “nəfəslik” də saxlayır: Qarabağdan çıxarılan erməni hərbi birləşmələrin yerinə rus əsgərləri.
Qeyri-rəsmi məlumatlara görə, (bu məlumatlar Rusiya KİV-i tərəfindən yayılıb – red.) Rusiyanın “Qarabağ planı” belədir:
- Ermənistan Dağlıq Qarabağdakı qoşunlarını tamamilə
çıxarır və ətraf yeddi rayon Azərbaycana qaytarılır. Qarabağa
erməni hərbi birləşmələrinin yerinə rus əsgərləri beynəlxalq
sülhməramlılar adı altında yerləşdirilir. Həmçinin Laçın dəhlizi də
saxlanılır.
Bu, prinsip etibarilə Azərbaycanın ərazi bütövlüyünün bərpası
istiqamətində atılan böyük addımdır. Amma mahiyyət etibarilə
Rusiyanın bölgədə hərbi təsir imkanlarına sahib olmasını təmin
edir. Plan hazırdır, lakin görünür, Azərbaycanın Ermənistanla deyil
(İrəvan burada Moskvanın vassalı olaraq kənarda qalır) birbaşa
Rusiya ilə apardığı danışıqlarda razılığa gəlinməyən məqamlar var.
Razılığa gəlinməyən əsas məsələ isə rus əsgərlərinin bölgəyə
yeridilməsi ola bilər. Çünki rəsmi Bakı bunun işğalın daha uzun
müddətə davam etməsi olduğunu yaxşı anlayır. Prosesdə Türkiyənin də
iştirakı ortaq məxrəcə gəlmək üçün qızğın danışıqların getdiyindən
xəbər verir. Bakı yaranmış şansı buraxmaq istəmir və Ankara ilə
aparılan məsləhətləşmələrdə Rusiyanın qarşısına şərt qoyulur:
“Münaqişə plana uyğun həll olunur, lakin sülhməramlıların
tərkibində türk və rus əsgərləri bərabər şəkildə yer
alacaq”. Bu, yeddi rayonun qaytarılması fonunda Azərbaycan
üçün sərfəlidir.
Rusiyanın razılaşmaq ehtimalı böyükdür. Çünki dalana dirəndiyi bir
vaxtda özünə tərəfdaşlar qazanmaq üçün Kreml hər şey etməyə, hətta
Ermənistanı belə gözdən çıxarmağa hazır kimi görünür. Bir tərəfdən
NATO-nun sərhədlərinin dibinə qədər “desant çıxarması”, digər
tərəfdən, “Türk axını” layihəsinin dondurulması ilə enerji amilində
uduzması Moskvanı təcili nəsə etməyə vadar edir. Hesab etmək olar
ki, Moskva görüşündə tərəflər bu məsələləri masaya yatıracaqlar.
Lakin o da faktdır ki, olduqca qapalı saxlanılan prosesdə hər
oyunçunun öz marağı var.
Rusiya: Dediyimiz kimi, çətin vəziyyətdə olan
ruslar Qarabağ münaqişəsini həll etməkdə maraqlı tərəf kimi
görünürlər. Lakin Kremlin Azərbaycanın qarşısında iki şərti
olacaq:
1. Azərbaycan Avrasiya İttifaqına daxil olmalı.
2. Qarabağa sülhməramlılar yerləşdirilməli.
Azərbaycandan “Rusiya birliyinə” daxil olması uzun zamandır
istənilir. Amma Bakının Rusiya faktoru qarşısında “torpaqlarımı
işğal edən Ermənistanla eyni ittifaqda ola bilmərəm” kimi yaxşı
imkanı var. Moskva yeddi rayonu qaytarmaqla Bakının ittifaqa daxil
olmaması üçün əsas gətirməsinin qarşısını almaq istəyir. Eyni
zamanda, rus əsgərlərini bölgəyə salmaqla Qarabağı əlində “kozır”
olaraq da saxlayır.
Türkiyə: Ankaranın tarix boyu Cənubi Qafqazda
təsir imkanlarına sahib olmaq siyasəti Rusiya ilə toqquşub.
Regionda Bakının güclənməsi Türkiyəyə də sərf edir. Bu baxımdan,
Azərbaycanın ərazi bütövlüyünün bərpasında əsas maraqlı tərəf odur.
Münaqişənin həll olunması Azərbaycanı regionda daha güclü gücə
çevirəcək, Ermənistanla Türkiyə sərhədi açılacaq, türk iş adamları
bu ölkədən pul qazana biləcəklər. Həmçinin, siyasi baxımdan
Ermənistan Rusiyanın qanadı altından çıxa biləcək. Bu dolayısı ilə
Qərbə də sərf edən ssenaridir. Lakin Ankaranın
Azərbaycan-Gürcüstan-Türkiyə ittifaqına Ermənistanı da qoşmaqla
regionu bütövlükdə ələ alması maraqları da mövcuddur. Bunun özü də
Qərbə sərfəlidir. Çünki belə olacağı təqdirdə Rusiyaya qarşı
regionda Türkiyə faktoru yaranacaq və Qərb anti-Rusiya mübarizəsini
Türkiyə üzərindən yürüdəcək. Lakin güman ki, Ankaranın özünün
perspektivdə prosesdən daha qazanclı çıxmaq kimi planları olmamış
deyil. Əks təqdirdə, bu oyuna girməkdən çəkinərdi, xüsusilə PKK
kimi böyük dərdinin olduğu bir zamanda.
Azərbaycan: Bakının əsas məqsədi ərazi bütövlüyünün bərpasıdır və bunun üçün bir çox qurbana hazır olduğunu deyir. Lakin rəsmi Bakının ağıllı manevrlərə sahib olduğu da faktdır. Hesab etmək olar ki, Azərbaycan Rusiyanın “Qarabağ” planına razı olaraq, onun iki şərtinə özünəməxsus korrektlər edəcək.
1. Ətraf yeddi rayon qaytarılacağı təqdirdə Qarabağda
erməni hərbi birləşmələrinin yerini tutacaq sülhməramlıların
tərkibi bərabər şəkildə türk və rus əsgərlərindən ibarət olacaq.
Qarabağda status-kvonun müəyyən edilməsinə qədər sülhməramlılar
bölgədə qalacaq, daha sonra Dağlıq Qarabağa Azərbaycanın tərkibində
muxtariyyət veriləcək.
2. Rusiyanın “Avrasiya İttifaqına daxil ol” şərti başqa
“qurbanla” əvəz olunacaq. Bakı Moskvaya enerji savaşında dəstək
verə bilər. Bu dəstək isə Türkiyənin “Türk axını” layihəsində
paralel olaraq iştirakına göz yummaqdır. Hesab etmək olar ki,
indiki şəraitdə Rusiya çıxarları baxımından buna razı ola bilər.
Bununla Moskvanın Bakını birliyə dəvət çağırışı ən azı
qeyri-müəyyən müddətə təxirə düşə bilər. Görünür, Azərbaycan
Moskvada “enerji faktorunu” əsas kart olaraq masaya
qoyacaq.
Moskva görüşdən sonrakı dövr üçün baş verəcəklər bir çox qaranlıq məqamlara işıq tutacaq. Lakin o fikri də müdafiə etmək olar ki, münaqişənin yuxarıda göstərilən formada həlli və bölgədə tarazlığın dəyişməsi Qərbin, yəni ABŞ-ın da marağına uyğun gəlir. Türkiyənin oyunda iştirakı Vaşinqtonu arxayın edən amildir. Güman ki, ABŞ-ın da dövriyyəyə buraxdığı öz şərtləri var və prosesdə bunlar da nəzərə alınır.
Asif Nərimanlı
-
Sosial00:30
“Space" TV-yə geri döndü: "Məbləğin bir qismi ödənildi" - FOTO/VİDEO
-
Qoroskop00:15
Günün ULDUZ FALI: normal imkanlar yaranana qədər gözləyin
-
MDB00:00
Putinə indi məruzə edildi, Şoyquya isə əvvəlcədən deyilib
-
Nida Xəbər 23 Aprel 23:48
Nazirlər Kabinetindən YENİ SİYAHI - Kimlərin adları var?
-
Magazin123 Aprel 23:36
Tünzalə imicini dəyişdi - FOTO
-
MDB23 Aprel 23:12
Şoyqunun müavini SAXLANILDI - Külli miqdarda rüşvət alıb
-
İdman23 Aprel 22:48
Son çempion boşanır: uşaqlıqdan başlayan nağıl bitir
-
Dünya23 Aprel 21:36
Məşhur bloqer helikopterdən bir çanta pulu çimərliyə SƏPƏLƏDİ - VİDEO