Şeyxin müavini narazılıq yaradan kitabdan danışdı - Özəl

“QMİ özündə iki dini icmanı birləşdirən qurumdur. Biz heç vaxt hansısa icmanın heysiyyatına toxunacaq hallara yol vermərik”.

Bu barədə Qafqaz Müsəlmanları İdarəsi (QMİ) sədrinin müavini Qəmər Cavadlı Publika.Az-a açıqlamasında qurumun dərc etdiyi “Vəhhabilik Cərəyanı” kitabında Əbu-Bəkr və Ömərin təhqir olunması haqqında səslənən iddialara münasibət bildirərkən deyib.

Q. Cavadlı qeyd edib ki, sözügedən kitabda belə bir şeyin olması mümkün deyil: “Bu kitabı biz çap edib paylamışıq. Lakin çap olunana qədər korrektə edilib, redaktədən keçirilib, ekspertlər baxıb, rəylər verilib. Orda bel bir cümlənin getməsi mümkün deyil. QMİ heç bir dini icmanı təhqir edəcək davranışlara yol verməz”.
Qeyd edək ki, İranlı alim Ayətullah Cəfər Sübhaninin Azərbyacan dilinə tərcümə edilmiş “Vəhhabilik Cərəyanı” kitabı Türkiyəni ayağa qaldırıb. Bu məlumatı gundəmxeber.com saytı yayıb. Məlumata görə, vəhhabiliyin tənqid edildiyi kitabda Əbu Bəkr və Ömər pis qələmə verilib.

Türkiyənin İslami çevrələrdə ən tanınmış internet xəbər saytı olan islahhxeber.net buna görə Qafqaz Müsəlmanları İdarəsinin Allahşükür Paşzadəni hədəf alıb. Məlumatda Allahşükür Paşazadənin sünnilərin məscidində həmin kitabın məcbur oxudulması göstərişi verdiyi və məqsədin İranın sifarişi ilə sünnilərin hörmət etdikləri Əbu Bəkr və Öməri gözdən salmaq olduğu qeyd edilib.

Xəbərdə həmçinin bildirilir ki, yaxın vaxtlarda İstanbuldakı Sultan Ahmed məscidində A. Paşazadə əleyhinə mitinq keçiriləcək. Bununla bağlı Türkiyənin baş naziri Rəcəb Tayyib Ərdoğana da müraciət olunacağı bildirilir.

Asif