Nida.az
...Və güllələr işə düşür – Atəşkəsin pozulmasının SƏBƏBLƏRİ
Cəbhədə atəşkəs rejiminin ermənilər tərəfindən davamlı pozulduğu
son günlərdə qəfil hücumlarla bağlı müxtəlif ehtimallar ortaya
çıxdı. Əsas ehtimal isə burda üçüncü-maraqlı olan qüvvənin
mövcudluğuna dairdir. Adətən cəbhədə yaşananlar müstəvisində üçüncü
qüvvə dediyimizdə Rusiya göz önünə gəlir. Nə də olsa Ermənistana
dəstək verdiyini Moskva özü də gizlətmir.
“Cəbhədə qeyri-erməni dilində də komandalar
verilir”
Müdafiə Nazirliyinin rəsmi məlumatında belə deyilmişdi. Hansı
dildən bəhs edildiyi deyilməsə də, faktiki olaraq diqqətlər üçüncü
qüvvənin mövcudluğuna yönəldi. Güman ki, rəsmilər kimdən söhbət
getdiyini bilir, lakin şərtlər bunu açıqlamağa imkan vermir,
həmçinin açıqlamamaq da olmaz. Məhz buna görə belə bir “dil”
seçildi.
Publika.Az –n dərhal başladığı araşdırmalarda müəyyən ip ucları tapıldı (http://publika.az/p/2434 ). Söhbət rus zabitlərindən gedirdi. Adının çəkilməsini istəməyən hərbi mənbə belə iddia edirdi. Özü də bu zabitlər Ermənistandakı rus hərbi bazasından deyil, birbaşa Moskvadan xüsusi olaraq göndərilibmiş. Hərbi ekspertlər də bunu istisna etmədilər.
Bəlkə də təəccüblü heç nə yoxdur, axı söhbət Rusiyadan gedir. Amma niyə məhz indi?
Hər-halda Azərbaycan ordusu “qış sınağına” çəkilmir, xüsusilə Ermənistan buna getməz. Hər kəs cəbhənin o üzündəkilərin atəşkəsi pozacağı vaxt kimi ilin aprelini (köhnə Andranik söhbəti-red) gözləyirdi. Lakin qəfil hücum və bu hücumun Prezident İlham Əliyev Davosda olduğu zaman, həmçinin Ermənistan-Azərbaycan XİN rəhbərlərinin görüşü ərəfəsində edilməsi ehtimalları artırdı.
Ukraynada barrikadalarla davam edən avrointeqrasiya “müharibəsi” fonunda Rusiyanın xal itirməsinin Moskvanı Avropaya qarşı açacağı cəbhəni Cənubi Qafqaza qədər geri çəkməyə məcbur etdiyi görünür və ilk hədəf kimi müstəqil siyasətə can atan Azərbaycanın sıxışdırılması lazımdır. Çünki Moskva “2008-ci il Gürcüstan dərsini” bu dəfə Ukraynada “tədris” edə bilmədi. Bu baxımdan sədləri aşacaq ilk ölkə Azərbaycan ola bilər və buna zəmin də kifayət qədərdir.
Rusiyanın seçki öncəsi təzyiq layihələri sıradan çıxıb. Belə
olduğu təqdirdə yeganə və ən ağır zərbə Qarabağla vurula bilər,
hansı ki, cəbhədə baş verənlər ehtimalları gücləndirir. Buna
paralel olaraq Ermənistanda da müxalifət artıq avrointeqrasiya
şüarlarını dilə gətirməkdədir və bu dəfəki dirəniş Ermənistan
üfüqlərində indiyə qədər görünməyən dirənişə bənzəyir.
Görünən odur ki, Qərb Rusiyaya qarşı “taran hücumuna” bənzər hücuma keçib. Ukraynadakı zərbələrin ardınca Rusiya zərbə ən zəif yeri, “Axilles dabanı” hesab olunan Cənubi Qafqazdan vurula bilər. Faktiki olaraq 3 region ölkəsindən biri- Gürcüstan müəyyən mənada Avropa istiqamətini götürüb. Azərbaycan əvvəldən bəyan etdiyi kimi qərbyönümlü siyasətini yürüdür, bunu Rusiya amili nə qədər ləngitsə belə. Bircə Ermənistan tam olaraq Rusiya məkanı olaraq qalır.
Güman ki, Qərb Azərbaycanın hazırkı iqtidarı, Ermənistanın isə
avromüxalifəti ilə Rusiyaya qarşı işbirliyinə başlayıb. Rəsmi Bakı
o halda razı olub ki, Dağlıq Qarabağ Azərbaycanın ərazi bütövlüyü
çərçivəsində həll olunacaq. Buna qədər də mövcud iqtidar əsas
prioritetinin Dağlıq Qarabağ olduğunu dəfələrlə bəyan edib.
Ermənistan isə buna yalnız hazırkı müxalifətlə razı ola bilər.
Nəzərə alsaq ki, məhz Qarabağ münaqişəsinin həllinə razı olduğuna
görə hakimiyyətdən salınan Levon Ter-Petrosyan bu gün müxalifət
düşərgəsində iqtidara qarşı vuruşur, onun da əsas istiqaməti Qərbə
doğrudur, proseslər müəyyən mənada belə bir gümanı ortaya
çıxardır.
Dağlıq Qarabağ münaqişəsində Türkiyə faktorunun artması bu ehtimalı
daha da gücləndirir. Ankaraya İsveçrədən də- diqqət edin, həmsədr
olmayan ölkələr- dəstək gəlməsi Qərbin münaqişəni hazırki formatdan
kənarda və daha çox qapalı olaraq sürətlə həll etmək istəyində
olduğunu göstərir.
Azərbaycan Prezidenti İlham Əliyevin Dağlıq Qarabağla bağlı
etdiyi çıxışda dolayısı ilə 2014-cü ilin Ermənistan üçün çətin il
olacağını, rəsmi İrəvanın ya konstruktiv mövqeyə gələcəyi, ya da
başqa yollar üzərində düşünüləcəyini bəyan etməsi məhz bu ilin
münaqişə üçün düşərli ola biləcəyi təsəvvürünü yaradır. Bu,
Ermənistan üçün növbəti və sonuncu ola biləcək xəbərdarlıq hesab
oluna bilər. Mövcud beynəlxalq şərtləri nəzərə almadan Azərbaycan
dövlət başçısının bunu deməsi inandırıcı deyil.
Deməli, Rusiya Dağlıq Qarabağ oyunundan çıxarılır. Bu isə
Moskvanın Azərbaycana qarşı əsas kozırını itirməsi, beləliklə də
həm Cənubi Qafqazı, həm də Avropaya olan rıçaqları itirməsi
deməkdir.
Və qəfil cəbhədə ermənilər tərəfindən atəşkəs pozulur, güllələr
dayanmadan yağmağa başlayır.
Moskva hər iki ölkə üçün gərginlik yaratmaqla Azərbaycana “müharibə
dərsini” vermək istəyir. Bu həm də Şimaldan Azərbaycan qarşı dövrü
olaraq istifadə olunan və ən öldürücü zərbədir. Çox maraqlıdır ki,
adətən Şimal qonşumuz Dağlıq Qarabağ kartını son ana saxlayır, yəni
ən kritik məqama. Görünür, hazırda Rusiya üçün ən kritik məqam bu
andır.
Ermənistanın cəbhəyə sürüklənməsi isə avrointeqrasiya tərəfdarı
erməni müxalifətinə “daha vacib müharibə gedir” mesajını vermək
məqsədi daşıyır.
Asif Nərimanlı
-
Sosial08:43
Azərbaycanın tanınmış professoru vəfat etdi - FOTO
-
Magazin208:36
Kristofer Nolan cəngavər olacaq, xanımı isə... - FOTO
-
Ekologiya07:17
Bu günə olan hava PROQNOZU - 20 dərəcə isti
-
Magazin206:16
Leonardo Di Kaprio ilə sevgilisi arasında NƏ BAŞ VERİR?
-
Səhiyyə05:15
Ömrü uzadan pəhriz sınaqdan UĞURLA ÇIXDI
-
Avropa03:43
Meqan Markl Keyt Middltonun xəstəliyindən necə istifadə etdi? - ŞOK DETALLAR
-
Avropa02:00
Azərbaycanlı jurnalist Kiyevdə vəfat etdi - FOTO
-
Magazin101:41
Azərbaycanda tanınmış müğənni üçün 2-ci dəfə TOY ÇALINACAQ - VİDEO