İlham Əliyev "twitter"də Xəzərin statusu və Qarabağ məsələsindən yazdı

“Azərbaycan Xəzərdə qonşuları ilə neft-qaz sahəsində əməkdaşlığa böyük əhəmiyyət verir”.

Publika.az-ın verdiyi xəbərə görə, bu fikirlər Azərbaycan Respublikasının Prezidenti İlham Əliyevin rəsmi “twitter” səhifəsində yer alıb.

Dövlət başçısı bildirib ki, Xəzər dənizi nəqliyyat dəhlizlərinin inkişafı üzrə bir sıra beynəlxalq və regional layihələrdə əlaqələndirici elementdir.

“Xəzəryanı ölkələr arasında sıx dostluq münasibətləri və çoxvektorlu əməkdaşlıq bizim regionda sabitliyin, firavanlığın və təhlükəsizliyin rəhnidir. Azərbaycan Xəzəryanı dövlətlərlə qarşılıqlı hörmətə və etimada əsaslanan ikitərəfli münasibətlərin inkişafına xüsusi diqqət yetirir. Biz Xəzər dənizini dostluq, sülh, təhlükəsizlik və əməkdaşlıq dənizi hesab edirik.

Biz dənizin dibinin həmhüdud sahələrinin bölünməsində əsas norma kimi hamılıqla tanınmış orta xətt prinsipini toxunulmaz hesab edir, dənizçilik, Xəzər dənizindən digər dənizlərə sərbəst gediş-gəliş və tranzit məsələlərinə böyük əhəmiyyət veririk”, - deyə dövlət başçısı qeyd edib.

“Ermənistanın Azərbaycana qarşı işğalçılıq siyasəti regional təhlükəsizliyə başlıca təhdiddir”.

Prezident İlham Əliyev rəsmi “twitter” səhifəsində Qarabağ münaqişəsinə də yer ayırıb:

“Ermənistan rejimi bu münaqişənin uzanmasının mümkün nəticələrinə görə birbaşa məsuliyyət daşıyır. Bu münaqişə beynəlxalq hüquq normaları və Azərbaycanın bütün dünya birliyi tərəfindən tanınmış ərazi bütövlüyü əsasında həll edilməlidir”.

Publika.az