Nida.az
Siyasi partiyaların “1607” maneəsi: seçkidən yayınmağın əsl səbəbi nədir?
Bu ilin dekabrın 23-nə təyin edilən bələdiyyə seçkiləri Azərbaycanın siyasi arenasında bir məqamı da ortaya çıxardı.
Mərkəzi Seçki komissiyasının məlumatına görə, bələdiyyə seçkiləri 1607 bələdiyyəni əhatə edəcək. Hakim Yeni Azərbaycan Partiyası seçkiyə 15035 namizəd irəli sürüb. Bu ən yüksək göstəricidir. YAP-ın sosial baza baxımından buna qadir olması normaldır. Lakin digər partiyaların hər bələdiyyəyə ən azı 2 namizəd çıxarması lazımdır ki, heç olmasa, biri qalib gəlsin. Bu isə 3214 namizəd deməkdir. Bu namizədlər ən kiçik də olsa siyasi təcrübəyə və idarəetmə qabiliyyətinə malik olmalıdır.
Ölkədə hakimiyyətə iddialı partiyaların az hissəsi bələdiyyəyə
gedir. Hazırda hakim partiya ilə yanaşı, Vətəndaş Həmrəyliyi, Ümid,
Demokratik İslahatlar, Sosial - Demokrat, Böyük Quruluş, Ana Vətən
partiyalarının səlahiyyətli nümayəndələri Mərkəzi Seçki
Komissiyasında qeydə alınıb.
Bununla yanaşı, Bütöv Azərbaycan Xalq Cəbhəsi Partiyası (BAXCP) də
bələdiyyə seçkisində iştirak qərarını verib. AMİP və KXCP də
seçkidə iştirakda qərarlıdır.
Digər partiyalar isə bu və ya digər səbəbdən seçkidə iştirak etməyəcəklərini açıqlayıb. Lakin heç biri ən azı 3214 namizəd çıxara bilməyəcəyini etiraf etmək istəmir.
Azərbaycan Demokrat Partiyasının (ADP) sədri Sərdar Cəlaloğlu
seçkiyə getməməsini maliyyə problemi ilə əlaqələndirir.
“Seçkidə namizədlərimizin təbliğatı, sənədlərin hazırlanması və
digər işlər üçün kifayət qədər maliyyə vəsaiti lazımdır. Partiyamız
heç yerdən maliyyələşmədiyi üçün bu qədər pulumuz yoxdur”, - deyə o
bildirib.
Azərbaycan Liberal Partiyasının (ALP) sədri Əvəz Temirxan isə
seçkinin partiyanı zəiflətdiyini düşünür: “Partiya olaraq seçkilərə
qatılmayacağıq. İndiki şəraitdə seçkidə iştirakın partiyanı
taqətdən salacağını hesab edirik. Lakin üzvlərimizin seçkidə
iştirakı sərbəstdir”.
Vətəndaş və İnkişaf Partiyasının sədri (VİP) Əli Əliyev isə seçkiyə
getməmələrini belə izah edir: “Bələdiyyələri statusu qeyri-müəyyən
olduğu üçün seçki də o qədər önəmli deyil. Ən vacib seçki kimi
2015-ci il parlament seçkilərini görürük. Bu ilin ikinci yarısında
parlament seçkilərində iştirak üçün koalisiya da yarada bilərik.
Gücümüzü parlament seçkilərinə saxlayırıq”.
Müsavat Partiyası da seçkiyə getməkdən imtina edib. Partiya
Məclisinin qərarı ilə üzvlərə seçkidə iştirak üçün sərbəstlik
verilib. Lakin partiya olaraq iştirak məqsədəuyğun hesab
edilməyib.
Milli Şurada təmsil olunan AXCP-də də seçkiyə eyni yanaşma
mövcuddur.
Lakin seçki texnologiyaları üzrə ekspert Vəli Əlibəyli Publika.az-a
açıqlamasında problemin üzv sayının az olması ilə bağlı olduğunu
deyib. Onun sözlərinə görə, bu gün kağız üzərində on minlərlə
üzvünün olduğunu deyən partiyalar reallıqda çox az insanı ətrafına
toplaya bilir: “Bələdiyyə institutunun kifayət qədər inkişaf
etmədiyi, səlahiyyətlərinin az olduğu bəllidir. Seçkiyə marağın az
olmasına səbəb olan amillərdən biri budur. Misal üçün, Türkiyədə
bələdiyyələrin sahib olduğu səlahiyyətin 50 faizi bizim
bələdiyyələrdə olsa, bu seçkiyə axının kifayət qədər olacağına
əminəm. Lakin siyasi partiyaların cəmiyyətdə mövqeyi baxımından
onların hər seçkidə iştirak etməsi öz xeyirlərinədir. Elə
partiyalar var ki, küçədə insanlardan soruşsan, nə adını, nə
sədrinin kim olduğunu deyə bilməzlər. Bələdiyyə kimi seçkilərdə
partiyaların iştirakı onları daha çox kütləyə tanıtmağa səbəb ola
bilər. Özünü ciddi siyasətçi sayan partiya üzvlərinin bələdiyyədə
çalışmaq istəmədiyini də anlamaq mümkündür. Amma gələcək planları,
iddiaları olan partiyalar bunu mütləq nəzərə almalıdır. Hər şey
aşağıdan başlayır. Əgər aşağıda uğurlu olsa, yuxarıya doğru bu
uğuru daşımaq mümkündür”.
V. Əlibəyli siyasi partiyalarda ixtisaslı üzvlərin olmamasına da
diqqət çəkib.
“Misal üçün, bu il keçiriləcək bələdiyyə seçkilərinə minlərlə
namizəd irəli sürmək lazımdır. Bu namizədlər də, heç olmasa,
müəyyən təcrübəyə, biliyə sahib olmalıdır. Amma bizim partiyalarda
bu qədər insan varmı? Sual versək, hər biri ən azı 20, 30, 40,
hətta 50 min üzvünün olduğunu deyəcək. Amma ortaya çıxarmaq lazım
olanda, çox az sayda insanı görürük. Bu üzdən hesab etmək olar ki,
bələdiyyədən qaçan partiyaların əksəriyyətinin üzvlük problemi var.
Hansısa partiyanın başqa səbəblərə görə getməməsi normaldır. Amma
bələdiyyələrin mənasız seçki olduğu iddialarına inansaq, o zaman
yarım milyondan çox üzvü olan hakim partiya da getməzdi. Əgər
birbaşa parlamentdə düşmək, yaxud prezident olmaq istəyirsənsə,
sonra bunu bacarmayanda başqa yerdə günahkar axtarırsansa, deməli,
problem özündədir”, - deyə ekspert bildirib.
Ekspert müxalifətin seçkidə bütün bələdiyyələri əhatə edəcək qədər
namizəd çıxara biləcəyinə inanmadığını açıqlayıb.
Asif Nərimanlı
-
Hadisə18:26
Bakıda bazar yanır - YENİLƏNDİ
-
Sosial17:50
Cavanşir Məmmədov kostyumla dəfn edilib?
-
Dünya17:45
Ərdoğan bu sarayda HƏMAS lideri ilə GÖRÜŞDÜ
-
Dünya17:30
Fidan: Dünyanın ən böyük problemi ikiüzlülükdür
-
Nida Xəbər 16:10
Ceyhun Bayramov İran səfiri ilə görüşdü
-
Sosial15:10
Cavanşir Məmmədovun dəfn yeri açıqlandı
-
Hadisə14:20
Azərbaycanlı iş adamı öldürüldü
-
Maraq dünyası13:35
Dünyanın ən gənc və ürəyi boş milyarderi: Bu müəmmalı şəxs niyə hamıdan gizlənir?