• USD 1,7430 +0,35% EUR 1,8487 -1,24%
    • GBP 2,1929 -0,21% RUB 0,0275 +0,36%

Başqa məmurlar niyə getmir? - Açıqlama

  • Nida.az
  • 9 Aprel 2012 13:03
  • 183 Baxış
Başqa məmurlar niyə getmir? - Açıqlama

"Ramil Usubovun cənub rayonlarına səfəri çərçivəsində əhali ilə canlı təmaslar yaratması digər məmurlar üçün də örnək ola bilər”. Bunu Publika.Az-a açıqlamasında millət vəkili, Azərbaycan Demokratik İslahatlar Partiyasının (ADİP) sədri Asim Mollazadə bildirib.

Azərbaycanın daxili işlər naziri general-polkovnik Ramil Usubov ölkənin cənub bölgəsinə səfər edib. Nazir səfər zamanı yeni tikilən Lənkəran Şəhər Polis şöbəsinin inzibati binasına baxış keçirib, həmçinin cənub bölgəsinə daxil olan rayonlar - Cəlilabad, Masallı, Yardımlı, Lerik, Astara və Lənkərandan olan bir qrup sakinlə görüş keçirərək, onların şikayətlərini dinləyib.

ADİP sədri hesab edir ki, Azərbaycanda məmurlarla vətəndaşların arasında bir uçurum var və əksər vəzifə sahibləri əhali ilə canlı təmaslardan yayınır: “Azərbaycanda vətəndaşların mülkiyyət hüquqlarının pozulması, onların get-gələ, süründürməçiliyə salınması haqqında dəfələrlə yazılmasına, məsələnin ictimailəşməsinə baxmayaraq, indiyə qədər hər hansı məmurun bununla bağlı açıqlama verməsinin, sakinlərin önünə çıxaraq mövqe bildirməsinin şahidi olmamışıq.

Sanki bu gün Azərbaycanda əksər məmurlar öz fəaliyyətini qapalı formada həyata keçirməyə çalışır, əhali ilə təmaslardan çəkinir. Hesab edirəm ki, Ramil Usubovun cənub rayonlarına səfəri çərçivəsində əyalət sakinlərini qəbul edib, onların problemlərini diqqət mərkəzinə gətirməsi bu streotipləri qıracaq. Hər halda bütün məmurlar, nazirlər, icra başçıları bu addımdan müsbət mənada nümunə götürməlidirlər”.

Milli Dirçəliş Hərəkatı Partiyasının sədri Fərəc Quliyev də oxşar mövqedədir: “Dövlət qulluqçusu deyilən bir anlayış var. Vəzifə sahibləri dövlət qulluqçularıdır. Vətəndaşların problemlərini nəzərə almaq onların borcudur. Təəssüf ki, bir çox hallarda bunun əksini müşahidə edirik. Şəxsən mən təklif edirəm ki, ayrı-ayrı sahələr üzrə ekspertlərin iştirakı ilə hər nazirlikdə, icra strukturlarında əhali ilə ayın müəyyən günlərində təmaslar yaradılsın. Ramil Usubovun son addımı bu əsnada təqdir oluna bilər. Digər məmurlar da ondan ibrət götürsələr, pis olmazdı”.

Azər Niftiyev,

Publika.Az

Xəbər lenti

DAHA ÇOX XƏBƏR