Nida.az
MTN-dən şok əməliyyat!
MTN İranla əlaqəli dəstə zərərsizləəşdirib.
Milli Təhlükəsizlik Nazirliyinin İctimaiyyətlə əlaqələr Mərkəzindən
çərşənbə günü Trend-ə bildiriblər ki, nazirliyin həyata keçirdiyi
əməliyyat tədbirləri nəticəsində, Azərbaycan Respublikasının
suverenliyi və dövlət təhlükəsizliyi zərərinə olaraq casusluq
etməklə dövlətə xəyanətdə və digər ağır cinayətlərin törədilməsində
təqsirli bilinən 22 nəfər ifşa olunaraq tutulmuşdur.
Belə ki, Azərbaycan Respublikasının vətəndaşları - Kərimov Niyazi
Əlövsət oğlu, Əliyev Mübariz İsmayıl oğlu, Tağıyev Elman Ramiz
oğlu, Cəlilov Nüsrət Aydın oğlu, Qasımov Rahim Müseyib oğlu,
Zəkiyev Məmmədtağı Əlikram oğlu, Həşimov Bəhram Nazim oğlu, Abbasov
Ayaz Fərədağa oğlu, Abbasov Əfqan Fərid oğlu, Məmmədov Şahin
Həsənağa oğlu, Ağayev Mirələsgər Mirqasım oğlu, Zülfüqarov Rövşən
Abdulbağı oğlu, Ələkbərov Həmidağa Tofiq oğlu, Qasımov Seymur
Səxavət oğlu, Rəsulov Taleh Əliyusif oğlu, Həbibov Ceyhun Valeh
oğlu, Kərimov Elçin Ələsgər oğlu, Məmmədov Zahid Gülbudağ oğlu və
qeyriləri İran İslam Respublikasının xüsusi xidmət orqanı olan
"İslam İnqilabının Mühafizəçiləri Korpusu" - "SEPAH"ın əməkdaşları
tərəfindən məxfi əməkdaşlığa cəlb olunaraq, "SEPAH"ın
əməkdaşlarının tapşırıqları əsasında casusluq edərək, Azərbaycan
Respublikasının dövlət təhlükəsizliyi zərərinə istifadə üçün
məlumatlar toplamış və vermiş, eləcə də İranın xüsusi xidmət
orqanlarının nümayəndələrinə kömək edə biləcək şəxsləri axtarıb
taparaq onları "SEPAH"ın əməkdaşlarının əlaqəsinə təqdim
etmişlər.
Müəyyən edilmişdir ki, Niyazi Kərimov hələ 1999-cu ilin yaz
aylarında İran İslam Respublikasının Məşhəd şəhərinə səfər edərkən,
Tehran şəhərində Əkbər Pakraveş adlı şəxslə tanış olmuşdur. Səfər
müddəti ərzində, dini həmrəylik təəssübkeşi kimi pərdələnən,
əslində isə İran İslam Respublikasının "İslam İnqilabının
Mühafizəçiləri Korpusu"- "SEPAH"ın əməkdaşı olan Əkbər Pakraveş ilə
Niyazi Kərimov arasında münasibətlər daha da genişlənmişdir.
Sonradan Əkbər Pakraveşin təklifi ilə Niyazi Kərimov könüllü
surətdə məxfi əməkdaşlığa cəlb olunaraq, İranın xüsusi xidmət
orqanının tapşırıqları əsasında Azərbaycan Respublikasının dövlət
təhlükəsizliyi zərərinə casusluq etməyə başlamışdır.
"SEPAH"ın əməkdaşı Əkbər Pakraveş Niyazi Kərimova Bakı şəhərində
fəaliyyət göstərən ABŞ, İsrail və Qərb dövlətlərinin səfirlikləri,
nümayəndəlikləri və təşkilatlarının əməkdaşlarına qarşı
terror-təxribat aksiyalarının həyata keçirilməsi məqsədilə xüsusi
hərbi təlimlərə cəlb olunmaları üçün Azərbaycan Respublikasının
vətəndaşları sırasından münasib şəxsləri taparaq "SEPAH"ın
əlaqəsinə verməsini təklif etmiş və bu işlərin müqabilində ona
külli miqdarda pul vəd etmişdir. Niyazi Kərimov da bu təkliflə
razılaşmışdır.
Bundan sonra, yəni 1999-cu ildən etibarən 2011-ci ilədək Niyazi
Kərimov dəfələrlə İrana gedərək orada məxfi əməkdaşlıq etdiyi
"SEPAH"ın Əkbər Pakraveş və Vəhid adlı əməkdaşları ilə görüşüb
onlardan müvafiq təlimatlar və külli miqdarda pul almışdır. Həmin
təlimat və tapşırıqlara əsasən, Azərbaycan Respublikasının
vətəndaşları - Elman Tağıyevi, Məmmədtağı Zəkiyevi, Mübariz
Əliyevi, Nüsrət Cəlilovu, Rahim Qasımovu, Bəhram Həşimovi, Ayaz
Abbasovu, Əfqan Abbasovu, Şahin Məmmədovu, Mirələsgər Ağayevi,
Rövşən Zülfüqarovu, Həmidağa Ələkbərovu, Seymur Qasımovu, Taleh
Rəsulovu, Ceyhun Həbibovu və qeyrilərini "SEPAH"ın Əkbər Pakraveş
və Vəhid adlı əməkdaşlarının əlaqəsinə vermişdir. Bununla yanaşı,
Niyazi Kərimov Azərbaycan Respublikasının ərazisində fəaliyyət
göstərən ABŞ, İsrail və Qərb dövlətlərinin səfirlikləri,
nümayəndəlikləri və təşkilatlarına, eləcə də vətəndaşlarına qarşı
terror-təxribat aksiyalarının həyata keçirilməsinə hazırlıq üzrə,
həmçinin Azərbaycan Respublikasının dövlət təhlükəsizliyinin
zərərinə olaraq istifadə etmək üçün məlumatların toplanılaraq
"SEPAH"ın Əkbər Pakraveş və Vəhid adlı əməkdaşlarına verilməsini də
təşkil etmişdir.
Məlum olmuşdur ki, "SEPAH"ın Əkbər Pakraveş və Vəhid adlı
əməkdaşları dini həmrəylik pərdəsi ilə öz məqsədləri üçün adları
qeyd olunan Azərbaycan Respublikası vətəndaşlarının bütün səfər
xərclərini ödəyərək, onların müxtəlif niyyətlərlə, əsasən ziyarət
adı altında İrana gəlmələrini təşkil etmişlər. Sonra onları
qarşılayaraq Tehran şəhərində məxfi görüş mənzillərində
yerləşdirmişlər. "SEPAH"ın əməkdaşları Əkbər Pakraveş və Vəhid 4-5
gün ərzində adları qeyd olunan Azərbaycan vətəndaşları ilə
ayrı-ayrılıqda söhbət edərək, Azərbaycan Respublikasının ərazisində
ABŞ, İsrail və Qərb dövlətlərinin səfirlikləri, nümayəndəlikləri və
təşkilatlarına qarşı gələcəkdə həyata keçirilməsi nəzərdə tutulan
terror-təxribat aksiyalarına onları da cəlb edəcəklərini
açıqlamışlar. Bu məqsədlə onlara Tehran şəhəri ətrafında yerləşən
düşərgələrdə xüsusi hərbi təlimlər keçiriləcəyini bildirmişlər.
Sonradan adları qeyd olunan Azərbaycan Respublikasının vətəndaşları
Tehran və Kərəc şəhərlərinin yaxınlığında yerləşən hərbi
düşərgələrdə peşəkar təlimatcıların rəhbərliyi altında müxtəlif
odlu, o cümlədən avtomat silahlardan, tapançalardan atəş açmağı,
partlayıcı maddələrdən və qurğulardan, topoqrafik xəritələrdən
istifadə edilməsi üzrə nəzəri və praktiki xüsusi hərbi təlimlər
keçmiş, eləcə də piyada və avtomaşınla məxfi müşahidələr aparmaq,
məxfi müşahidələrdən yayınmaq və mühafizə olunan qapalı tikililərə
gizli surətdə daxil olmaq kimi vərdişlərə yiyələnmişlər. Təlimlər
başa çatdıqdan sonra "SEPAH"ın əməkdaşları həmin Azərbaycan
vətəndaşlarından məxfi əməkdaşlıq barədə iltizam almış və hər
birinə təxəllüs vermişlər. Habelə onlara Azərbaycan Respublikasının
dövlət təhlükəsizliyi zərərinə istifadə etmək üçün lazım olan
məlumatları toplayıb çatdırmaları, kömək edə biləcək digər, o
cümlədən Gürcüstan vətəndaşları sırasından olan şəxsləri axtarıb
tapmaqla əlaqələrinə vermələrini tapşırmışlar. Eyni zamanda,
"SEPAH"ın əməkdaşları Əkbər Pakraveş və Vəhid həmin Azərbaycan
Respublikası vətəndaşlarının hər birinə Niyazi Kərimov, Elman
Tağıyev, Mübariz Əliyev və digərləri vasitəsilə aylıq məvacib
veriləcəyini vəd etmiş və Azərbaycana qayıdıb onların
göstərişlərini gözləmələrini tapşırmışlar. Bundan sonra, Əkbər
Pakraveş və Vəhid məxfi əməkdaşlığa cəlb etdikləri Azərbaycan
Respublikasının vətəndaşlarını ayrı-ayrılıqda İranın Astara və
Tehran şəhərlərindən Azərbaycana yola salarkən kəşfiyyat-pozuculuq
və terror-təxribat aksiyalarının həyata keçirilməsi barədə bir daha
təlimatlandırmış və onlara külli miqdarda ABŞ dolları
vermişlər.
Həmçinin, "SEPAH"ın əməkdaşları əlaqəyə cəlb edilmiş şəxslərin
onların tapşırığı ilə mütəmadi İrana səfər etmələrinin Azərbaycanın
xüsusi xidmət orqanı tərəfindən şübhə doğurmaması üçün həmin
Azərbaycan Respublikası vətəndaşlarının bəziləri ilə üçüncü
dövlətlərin ərazisində, o cümlədən Suriya Ərəb Respublikasının
Dəməşq və Rusiya Federasiyasının Moskva şəhərlərində görüşmüş və
təlimatlar vermişlər.
Müəyyən edilmişdir ki, İran xüsusi xidmət orqanından aylıq məvacib
formasında gizli şəkildə maliyyələşdirilən adları qeyd olunan
Azərbaycan Respublikasının vətəndaşları tərəfindən tapşırıqların
lazımi səviyyədə həyata keçirilməsini, konspirasiya qaydalarına
ciddi əməl olunmasını və məxfiçilik tədbirlərinin görülməsini
təşkil etmək məqsədilə "SEPAH"ın əməkdaşlarının xüsusi planlarına
əsasən, hələ 1999-cu ilin əvvəllərində məxfi əməkdaşlığa cəlb
olunmuş əsas şəxslər özləri ayrı-ayrılıqda digər Azərbaycan
Respublikasının vətəndaşlarının məxfi əməkdaşlığa cəlb olunmaları
üçün onları İran xüsusi xidmət orqanının Əkbər Pakraveş və Vəhid
adlı əməkdaşlarının əlaqəsinə vermişlər. Belə ki, Niyazi Kərimovun
tapşırığı ilə İrana gedərək Tehran şəhərində "SEPAH"ın əməkdaşı
Əkbər Pakraveş tərəfindən məxfi əməkdaşlığa cəlb olunmuş, xüsusi
hərbi təlim keçmiş Mübariz Əliyev öz növbəsində aldığı təlimatlara
əsasən 2000-2011-ci illər ərzində Bəhram Həşimovu, Ayaz Abbasovu,
Əfqan Abbasovu, Mirələsgər Ağayevi, Rövşən Zülfiqarovu, Şahin
Məmmədovu, Seymur Qasımovu, Ceyhun Həbibovu və qeyrilərini Əkbər
Pakraveş və Vəhidin əlaqəsinə vermişdir. İranda məxfi əməkdaşlığa
cəlb olunmuş, xüsusi hərbi təlim keçmiş Elman Tağıyev tərəfindən
isə 2000-2007-ci illərdə Nüsrət Cəlilov, Taleh Rəsulov, Həmidağa
Ələkbərov, Rahim Qasımov, Elçin Kərimov, Zahid Məmmədov və
digərləri Əkbər Pakraveş və Vəhidin əlaqəsinə verilmişdir.
Beləliklə, bu cür metoddan istifadə etməklə, İran İslam
Respublikasının xüsusi xidmət orqanı olan "İslam İnqilabının
Mühafizəçiləri Korpusu" - "SEPAH"ın əməkdaşları qeyri-səmimi dini
həmrəylik şüarları ilə pərdələnərək, məxfi əməkdaşlığa cəlb
etdikləri, onların bütün əmrlərinə hər an hazır olan, külli
miqdarda pul vəsaiti ilə təmin edilən, hərbi təlim keçmiş
Azərbaycan Respublikasının vətəndaşlarından ibarət Azərbaycanın
dövlət təhlükəsizliyi əleyhinə xüsusi kontingentin yaradılması və
genişləndirilməsi məqsədini güdmüşlər.
Bu illər ərzində "SEPAH"ın əməkdaşları Əkbər Pakraveş və Vəhid
tərəfindən məxfi əməkdaşlığa cəlb edilmiş Azərbaycan
Respublikasının vətəndaşları texniki avadanlıqlar və nəqliyyat
vasitələri ilə təchiz edilərək aldıqları tapşırıqların icrası ilə
bağlı xarici dövlətlərin Bakı şəhərindəki səfir¬lik¬lərinin,
nümayəndəliklərinin, təşkilatlarının, iqtisadi sahədə fəaliyyət
göstərən şirkətlərinin, o cümlədən "Soxnut" adlı qurumun və bir
neçə təhsil müəssisəsinin, "American Fast-food" restoranının,
"BP-Azərbaycan" neft şirkətinin baş ofisinin və digər obyektlərin
dəqiq ünvanlarını, yerləşləşmə proyeksiyalarını müəy¬yən¬ləşdirərək
müşahidələrini aparmış, burada işləyən şəxslər barədə bilgilər
toplamış və əldə etdikləri məlumatları İranda Əkbər Pakraveş və
Vəhidə çatdırmışlar.
Həmçinin məlum olmuşdur ki, "SEPAH"ın əməkdaşları Əkbər Pakraveş və
Vəhid xarici dövlətlərin Azərbaycan Respublikasındakı
səfirliklərinin, nümayəndəliklərinin, təşkilatlarının və iqtisadi
sahədə fəaliyyət göstərən müəssisələrinin əməkdaşlarına qarşı
terror-təxribat aksiyalarının həyata keçirilməsi üçün silah
alınmasını, eləcə də gələcəkdə göndəriləcək silah və sursatın
gizlədilməsi məqsədilə gizli saxlanc yerlərinin hazırlanmasını da
tapşırmışlar. Bu məqsədlə Elman Tağıyev bəzi gizli saxlanc yerləri
müəyyənləşdirərək, fotoşəkillərini "SEPAH"ın əməkdaşlarına təqdim
etmiş, onlarla razılaşdırmışdır. Bundan sonra, Elman Tağıyev Bakı
şəhəri, Sabuncu rayonu, Nardaran qəsəbəsinin sakinləri - Zəkiyev
Əbülfəz Əlikram oğlu vasitəsilə Bəşirov Əli Əli İsa oğlundan 1 ədəd
"AK-74" tipli avtomat silah, həmin silaha aid 2 ədəd daraq və 157
ədəd patron almışdır. Eyni zamanda, məlum olmuşdur ki, qeyd edilən
avtomat silahı, daraqları və patronları Əli Bəşirova həmin
qəsəbənin sakini Nuriyev Gülhüseyn Əhmədağa oğlu satmışdır.
Əməliyyat-istintaq tədbirləri nəticəsində Əli Bəşirov, Əbülfəz
Zəkiyev və Gülhüseyn Nuriyev də saxlanılmışlar. Axtarış zamanı
Əbülfəz Zəkiyevin evindən 1 ədəd "TOZ-8" tipli odlu silah və ona
aid patron, Həmidağa Ələkbərovun evindən 1 ədəd avtomat tipli odlu
silah və ona aid 1 ədəd daraq, 5 ədəd patron, 1 ədəd "F1", 1 ədəd
"RQD" tipli əl qumbaraları, onlara aid 1 ədəd alışdırıcı, eləcə də
tüstü və siqnal şaşkaları, Elman Tağıyevdən 1 ədəd "AK-74" tipli
avtomat silah, həmin silaha aid 2 ədəd daraq və 157 ədəd patron və
sonuncuya məxsus fermadan 1 ədəd "SVD" tipli snayper tüfəngi, 40
ədəd patron, 1 ədəd "PM" markalı tapança, 4 ədəd "F1" əl qumbarası,
4 ədəd alışqan, 3 ədəd 200 qramlıq və 2 ədəd 400 qramlıq trotil
şaşka, 5 ədəd detonator aşkar edilərək götürülmüşdür. Bundan başqa,
müəyyən edilmişdir ki, Əli Bəşirov yaxın qohumu Fərəcov Asif Fərəc
oğluna da "AK-74" tipli avtomat silahın komponent hissəsi olan 1
ədəd daraq və ona aid 45 ədəd patron vermişdir. 2012-ci il martın
13-də keçirilmiş axtarış tədbirləri nəticəsində Asif Fərəcovun
evindən Əli Bəşirovdan əldə etdiyi həmin daraq və patronlarla
yanaşı, əlavə olaraq 1 ədəd "AK-74" tipli avtomat silah, 1 ədəd
"PM" markalı tapanca, ona aid 1 ədəd daraq və 15 ədəd patron,
"TOZ-8" tipli odlu silaha aid 90 ədəd patron, 1 ədəd pnevmatik
tüfəng, 1 ədəd xəncər, eləcə də 100 qrama yaxın marixuana aşkar
edilərək götürülmüşdür.
Bütün faktlarla bağlı Milli Təhlükəsizlik Nazirliyinin İstintaq Baş
İdarəsi tərə¬findən Azərbaycan Respublikası Cinayət Məcəlləsinin
274-cü (dövlətə xəyanət) və 228.2.1-ci (qanunsuz olaraq odlu silah,
döyüş sursatı əldə etmə, baş¬qa¬sı¬na vermə və daşıma) maddələri
ilə cinayət işinin istintaqı aparılır. Kərimov Niyazi Əlövsət oğlu,
Əliyev Mübariz İsmayıl oğlu, Tağıyev Elman Ramiz oğlu, Cəlilov
Nüsrət Aydın oğlu, Qasımov Rahim Müseyib oğlu, Zəkiyev Məmmədtağı
Əlikram oğlu, Həşimov Bəhram Nazim oğlu, Abbasov Ayaz Fərədağa
oğlu, Abbasov Əfqan Fərid oğlu, Məmmədov Şahin Həsənağa oğlu,
Ağayev Mirələsgər Mir¬qasım oğlu, Zülfüqarov Rövşən Abdulbağı oğlu,
Ələkbərov Həmidağa Tofiq oğlu, Qasımov Seymur Səxavət oğlu, Rəsulov
Taleh Əliyusif oğlu, Həbibov Cey¬hun Valeh oğlu, Kərimov Elçin
Ələsgər oğlu, Məmmədov Zahid Gülbudağ oğlu, Zə¬kiyev Əbülfəz
Əlikram oğlu, Bəşirov Əli Əli İsa oğlu, Nuriyev Gülhüseyn Əhmədağa
oğlu və Fərəcov Asif Fərəc oğlu təqsirləndirilən şəxs qis¬mində
cəlb olunaraq məhkəmənin qərarı ilə barələrində həbs qətimkan
tədbiri seçilmişdir.
Cinayət işi üzrə bütün halların araşdırılması üçün zəruri istintaq
hərəkətləri və əməliyyat-axtarış tədbirləri davam etdirilir.
Bir məqam xüsusi qeyd olunmalıdır. Son vaxtlar bəzi psevdo
ekspertlər və bir sıra qaragüruhçu mətbu orqanları daxili
destruktiv və xarici düşmən qüvvələrin göstərişi ilə bilərəkdən,
ictimai təhlükəli, qanunazidd əməllərin törədilməsində təqsirli
bilinərək cinayət məsuliyyətinə cəlb olunmuş şəxslər barəsində
qanunvericiliklə müəyyən edilmiş qaydada həyata keçirilən cinayət
təqibinin, güya dinə və dindarlara qarşı yönəldiyi barədə əsassız,
həqiqətdən uzaq və ikrah doğuran məlumatları yaymaqla cəmiyyət¬də
çaşqınlıq yaratmağa çalışırlar. İrqindən, miliyyətindən, cinsindən,
dinindən və əqidəsindən asılı olmayaraq hər bir kəs qanun
qarşısında məsuliyyət daşıyır. Törədilmiş hüquqazidd əmələ görə
cəzanın labüdlüyü prinsipi hamıya aiddir. Cəmiyyətə zidd əməllərin,
Azərbaycanın milli təhlükəsizliyi əleyhinə cinayətkar qəsdlərin və
təhdidlərin qarşısı bundan sonra da qətiyyətlə alınacaqdır.
Milli Təhlükəsizlik Nazirliyi bəyan edir ki, Azərbaycan
Respublikasının suverenliyi, ərazi toxunulmazlığı, dövlət
təhlükəsizliyi və müdafiə qabiliyyəti zərərinə olaraq dövlətə
xəyanət və casusluq cinayətlərinin törədilməsi üçün xarici xüsusi
xidmət orqanları tərəfindən cəlb edilmiş şəxs aldığı cinayət
tapşırığının icrası üzrə heç bir fəaliyyət göstərməmişsə və dövlət
hakimiyyət orqanlarına könüllü surətdə və vaxtında məlumat
vermişsə, əgər həmin şəxsin hərəkətlərində başqa cinayətin tərkibi
yoxdursa, cinayət məsuliyyətindən azad olunur.
Publika.az
-
Magazin119:10
Brilliant Dadaşovanın rəqsi GÜNDƏM OLDU - VİDEO
-
Region18:50
Rusiya XİN-dən İrəvana qulaqburma
-
Rəsmi xronika18:32
Rumen Radev İlham Əliyevə zəng etdi
-
İdman17:06
"Qarabağ"ı yıxan futbolçu İstanbul nəhənginin hədəfində
-
Sosial16:36
Güclü külək əsəcək, çaylardan sel keçəcək - XƏBƏRDARLIQ
-
Magazin116:11
Zülfiyyə Aşıq Tellini biabır etdi: “Restoranda yeyir, sonra da...”
-
Sağlamlıq15:41
Marketlərdə satılan bu yuyucu tozlar XƏRÇƏNG YARADIR
-
Nida Xəbər 15:11
Təsdiqləndi: Bu şəxslərin MAAŞI ARTIRILDI - MƏBLƏĞLƏR