Metyu Brayza ABŞ-ın Azərbaycan siyasətini tənqid etdi

“Amerika liderləri gec-tez Azərbaycanın strateji önəmini və onu müdafiə etməyin vacibliyini anlayacaq”.

Publika.az xəbər verir ki, bu barədə ABŞ-ın Azərbaycandakı keçmiş səfiri Metyu Brayza Rusiyanın “Vestik Kafkaza” saytına açıqlamasında deyib.

M. Brayza Azərbaycanı tənqid edən amerikalı siyasətçilərlə razılaşmadığını bildirib: “Azərbaycanın vəziyyəti haqda danışan amerikalı siyasətçilər bu ölkədə baş verənləri qətiyyən anlamır. Onlar Azərbaycanın hansı çətin şərtlər altında yaşadığını başa düşmürlər. Əgər mənim kolleqalarım bu ölkədə olsaydı, onlar problemləri görərdilər. Yəni hər şey uzaqdan göründüyü qədər sadə deyil. Obama əgər öz strateji maraqlarının müdafiəsi haqda danışırsa, Səudiyyə Ərəbistanına kömək etdiyi kimi, Azərbaycana da etməlidir”.

Amerikalı diplomat hesab edir ki, Vaşinqton hələlik bu məsələdə tələsmir: “Lakin bir neçə ay sonra strateji düşünən insanlar Azərbaycana lazımi diqqəti yönləndirməyə başlayacaq və vəziyyət yaxşılaşacaq”.

Lakin M. Brayza ümumilikdə ABŞ-ın Cənubi Qafqaza həddindən artıq az diqqət göstərdiyini bildirib.

“Bu diqqət ümumiyyətlə yoxdur. Hesab edirəm ki, burda ABŞ-ın strateji maraqları vacibdir. Regionda üç ayrı ölkə var. Lakin iqtisadiyyatına, əhalisinin sayına və strateji önəminə görə ən vacibi Azərbaycandır. Sözsüz ki, Rusiya regionda böyük rol oynayır”, - deyə o bildirib.

Asif Nərimanlı