Deputatlarımız Paraqvaydan qayıtdılar - FOTOLAR

Azərbaycan Milli Məclisinin üzvləri Cavanşir Feyziyev, Asim Mollazadə, Fuad Muradov və Aslan Cəfərov Paraqvay Respublikasında səfərdə olublar.

Publika.az-ın məlumatına görə, səfər vaxtı ilk olaraq Azərbaycan parlament nümayəndə heyəti Paraqvay Milli Konqresinin yuxarı palatasında Senatın sədrinin əvəzləyicisi qismində sədrin birinci müavini Enrique Bacchetta, Senatın Xarici Əlaqələr və Beynəlxalq Məsələlər daimi komissiyasının sədri Miguel Saguier, habelə Senatda Azərbaycanla parlamentrlərarası dostluq qrupunun üzvləri ilə görüşüblər. Ardınca isə Azərbaycan millət vəkilləri Paraqvay Deputatlar Palatasının sədri Huqo Velazquez və həmin palatanın Beynəlxalq Əlaqələr Komissiyasının sədri Jose Maria İbanez ilə görüşlər keçiriblər.

Görüşlərin ardınca Paraqvay Milli Konqresinin binasında Azərbaycan nümayəndə heyətinin şərəfinə ziyafət verilib.

Görüşlərdə Azərbaycan və Paraqvay parlamentləri arasında əməkdaşlığın iki ölkə arasında siyasi, iqtisadi və humanitar sahələrdə əlaqələrin inkşafına verəcəyi töhfə barədə fikir mübadiləsi aparılıb, enerji və kənd təsərrüfatı sektorları prioritet əməkdaşlıq sahələri kimi qiymətləndirilib və müvafiq sahələrdə qanunvericilik üzrə qarşılıqlı təcrübə mübadiləsinin faydadlılığı qeyd olunub.

Xüsusilə də, hər iki ölkənin açıq dənizə birbaşa çıxışının olmadığını nəzərə alaraq, Paraqvay tərəfi Azərbaycanın beynəlxalq bazarlara çıxışını təmin edən infrastruktur layihələrini, eyni zamanda neft və qaz sektorunda əldə etdiyi nailiyyətləri yüksək qiymətləndirib və bu sahələrdə Azərbaycanın təcrübəsinin öyrənilməsinə maraq göstərib.

Görüşlərdə həmçinin, parlamentlərarası əlaqələrin genişləndirilməsi, beynəlxalq və regional məsələlər də diqqət mərkəzdində olub. Azərbaycanlı parlamentarlar ölkəmizin inkişaf strategiyası, xarici siyasətinin əsas istiqamətləri, Ermənistanın Azərbaycana qarşı təcavüzü, münaqişənin həllinin regiona gətirəcəyi fayda, ölkəmizdə iqtisadiyyatın şaxələndirilməsi, təhsil, gənclər, idman sahələrində aparılan işlər, həmçinin Azərbaycanın mədəniyyətlərarası dialoqda oynadığı rol barədə məlumat veriblər.

Səfər vaxtı Azərbaycan nümayəndə heyətinin Paraqvay hökumətinin üzvləri ilə də təmasları olub.

Paraqvayın xarici işlər nazirinin əvəzləyicisi qismində nazir müavini Rigoberto Gauto ilə keçirilmiş görüşdə iki ölkə arasında siyasi, iqtisadi, humanitar, təhsil sahəsində əməkdaşlıq, müvafiq hüquqi-normativ bazanın inkişafı mövzularında fikir mbüadiləsi aparılıb.

Görüşdə, habelə beynəlxalq və regional mövzular da diqqət mərkəzində olub və azərbayanlı parlamentarlarlar ölkəmizin xarici siyasəti, Ermənistanın Azərbaycana qarşı hərbi təcavüzü və münaqişənin regiondakı vəziyyətə təsiri barədə məlumat veriblər.

Paraqvayın mədən və enerji nazirinin müavini Mauricio Bejarano və kənd təsərrüfatı və heyvandarlıq nazirinin müavini Marcos Medina ilə görüşlərdə Paraqvay tərəfi Azərbaycanın neft və qaz sektorunda, Azərbaycan tərəfi isə Paraqvayın kənd təsərrüfatı sektorunda əldə etdiyi nailiyyətləri yüksək qiymətləndirib.

Tərəflər bu sahələr üzrə qarşılıqlı əməkdaşlıq imkanları barədə fikir mübadiləsi aparıblar.

Səfər çərçivəsində Azərbaycan nümayəndə heyətinin Paraqvayın işğüzar dairlələri, o cümlədən SENACSA, ARP, FECOPROD, APROLE, Frutika kimi istehsal assosiasiyaları və şirkətlərinin rəhbər nümayəndələri ilə görüşləri keçirilib.

Görüşlərdə iqtisadi, ticarət və sərmayə sahələrində əməkdaşlıq imkanları müzakirə olunub.

Azərbaycan parlamentarlarının Paraqvaya səfəri istər bu ölkənin mətbuatının, istərsə də Latın Amerikasının KİV-lərin diqqət mərkəzində olub.

Xatırladaq ki, Azərbaycanla Paraqvay arasında diplomatik münasibətlər 2004-cü ildə qurulub.

2012-ci ildə Azərbaycanın iqamətgahı Buenos-Ayres şəhərində omaqla səfiri Məmməd Əhmədzadə, eyni zamanda Paraqvaya da akkreditə olunub.

2014-cü ildə Paraqvay Milli Konqresinin Senatında tərkibində müxtəlif siyasi partiyaların təmsilçisi olan 7 senatordan ibarət Azərbaycanla parlamentlərarası dostluq qrupu yaradılıb.

Vasif Həsənli