• USD 1,7430 +0,35% EUR 1,8487 -1,24%
    • GBP 2,1929 -0,21% RUB 0,0275 +0,36%

Tural Abbaslı: “Fraksiyanı sabah da elan edə bilərik... məni də çıxararlar”

  • Nida.az
  • 11 Mart 2015 13:34
  • 293 Baxış
Tural Abbaslı: “Fraksiyanı sabah da elan edə bilərik... məni də çıxararlar”

“Qubad İbadoğlunun partiyadan çıxarılması haqda MNTK-ya etdiyim müraciətə şifahi cavab verilib. MNTK da Divanın qərarını dəstəkləyir. Lakin mən konkret faktlar tələb etdiyim üçün iki gün sonra rəsmi cavab veriləcək”.


Bunu Publika.az-a açıqlamasında Müsavat başqanlığına keçmiş namizəd, partiya daxilində fraksiya yaradılması təşəbbüsü ilə çıxış edən Tural Abbaslı deyib.


T. Abbaslı iki gün öncə müraciəti ilə bağlı onu MNTK-ya dəvət etdiklərini bildirib: “Mənə bildirdilər ki, müraciətdə bəzi cümlələr aydın deyil, onu aydınlaşdırmaq üçün orda olmalıyam. Gedəndə məlum oldu ki, aydınlıq gətirilməsini istədikləri cümlə Qubad İbadoğlunun çıxarılması ilə partiya daxilində demokratiyanın pozulması ilə bağlıdır. Mən də açıq şəkildə tənqidə dözümsüzlüyün nizamnaməyə zidd olduğunu dedim. Bildirdim ki, əsas olan ərizənin cümlələri yox, mahiyyətidir və Divanın qərarı qeyri-qanunidir. MNTK isə araşdırdığını və Divanın qərarını doğru olduğunu bildirdi. İddia edirlər ki, Qubad bəy KİV-ə açıqlamalarında partiya nizamnaməsini pozub. Mən konkret misal gətirmələrini istədim. Lakin onlar ümumi ifadələrlə mövqelərini müdafiə edirlər. Halbuki, bir şəxsi partiyadan çıxaranda onun konkret hansı səhv addımı atdığı göstərilməlidir. Digər tərəfdən, Müsavat nizamnaməsinin 1.8-ci bəndində partiya üzvünün hüquqları əksini tapıb. Orda qeyd olunur ki, hər hansı üzv partiya rəhbərliyini, strukturlarını tənqid etdiyi üçün cəzalandırıla bilməz. Amma təəssüf ki, MNTK qrup maraqlarından çıxış edir. İndi mənə veriləcək rəsmi cavabı gözləyirəm. Görək orda nə deyəcəklər”.


T. Abbaslı fraksiya yaratmaq məsələsinin nə yerdə qaldığı haqda da danışıb. Onun sözlərinə görə, bu ideya gündəmdədir: “Fəaliyyətimiz davam edir. Lakin bunun baş verməsi bizdən asılı olan məsələ deyil. Fraksiyanı sabah da elan edə bilərik. Amma biz əməli fəaliyyəti olan, rəhbərliyin qərarlarına təsir edə bilər, demokratikləşməyə töhfə verən qurumun yaranmasını istəyirik. Yaratmaq naminə fraksiya yaratmaq istəmirik”.


T. Abbaslı özünün də cəzalandırılacağını istisna etmir.


“Fraksiya yaradılması qeyri-qanuni deyil. Bunu dəfələrlə sübut etmişəm. Lakin bir misal var: əvvəlcə dovşanın qulağını kəsir, sonra sayırlar. Bu baxımdan, fraksiya yaradılsa məni partiyadan çıxarmaları istisna deyil, hətta lazım gəlsə başqa ittihamlar da irəli sürərlər”, - deyə o bildirib.

T. Abbaslı əvvəlki qədər Müsavat qərargahında getmədiyini də qeyd edib. Onun fikrincə, partiyada addımlar real və səmimi atılmır: “Qurultaydan sonra yaranmış yarış əhval-ruhiyyəsindən çıxmaq, partiya maraqlarına uyğun addımlar atmaq lazımdır. Amma addımlar real və səmimi şəkildə atılmır. Mətbuat üçün açıqlamalarda bir söz deyilir, reallıqda bir söz. Bu partiyaya müsbət heç nə vermir”.


Asif Nərimanlı

Xəbər lenti

DAHA ÇOX XƏBƏR