Şeyxin qudası bəd dua etdi - FOTO

Milli Məclisin deputatı, Qafqaz Müsəlmanları İdarəsinin sədri Allahşükür Paşazadənin qudası Hacı Qalib Salahzadə 26 dəfə Həcc ziyarətində olması ilə bağlı verdiyi müsahibənin sosial şəbəkələrdə müzakirə olunmasına və bununla bağlı satirik şair Mirzə Sakitin onu təhqir etməsinə münasibət bildirib.

Deputat Publika.az-a açıqlamasında deyib ki, o, haqqında bu cür danışanlara əhəmiyyət verməyə lüzum görmür: “Bu cür danışanlar hər zaman olub və bundan sonra da olacaq. Ancaq onlara əhəmiyyət vermirəm. Mən ilk dəfə 1990-cu ildə Həcc ziyarətində olmuşam. O zaman mən deputat da deyildim. Bir adam deyə bilməz ki, mən halal olmayan nə iləsə məşğul oluram. Mənim qızıldan da, qızıl alverindən də zəhləm gedir. Hər şeyi görən böyük Allah var. Kim mənim haqqımda nə deyir, nalayiq söz danışırsa, hamısını Allaha tapşırıram. Mənim pisliyimə danışanlar gec-tez Allahın bəlasına gələcək. Bunun o yan, bu yanı yoxdur. Allahın müqəddəs evi ilə zarafat etmək olmaz”.

Vasif Həsənli