• USD 1,7430 0,00% EUR 1,8487 0,00%
    • GBP 2,1929 0,00% RUB 0,0275 0,00%

Çanaqqala zəfərində həmrəylik – Bakı və Ankara qardaşlığı gündəmdə

  • Nida.az
  • 4 Aprel 2015 20:06
  • 378 Baxış
Çanaqqala zəfərində həmrəylik – Bakı və Ankara qardaşlığı gündəmdə

Bu gün Böyük İpək Yolu Gənclər İttifaqının təşkilatçılığı, “İrəli” İctimai Birliyi və ADAU-nun dəstəyi ilə Azərbaycan Diplomatiya Akademiyası Universitetində “Azərbaycan Türkiyə əlaqələrində tarixi dostluq, birgə əməkdaşlıq, ikitərəfli inkişaf perspektivlərində medianın aparıcı rolu” mövzusunda dəyirmi masa keçirilib.


Publika.az xəbər verir ki, tədbirdə ölkəmizdə səfərdə olan Türkiyənin aparıcı KİV-nin nümayəndələri, dövlət rəsmiləri, millət vəkilləri, ictimai və gənclər təşkilatlarının rəhbərləri iştirak ediblər.

Çıxışına ümummilli lider Heydər Əliyevin “Biz kökü bir olan xalqıq. Bizim tariximiz bir, dilimiz bir, dinimiz birdir. Ona görə də tariximiz, milli köklərimiz, adət və ənənələrimizin hamısı bizi bir-birimizə sıx bağlayıbdır” sözləri ilə başlayan Böyük İpək Yolu Gənclər İttifaqının sədri, millət vəkili Fuad Muradov qeyd edib ki, bu gün Prezident İlham Əliyev də qardaş Türkiyə ilə ikitərəfli münasibətlərə mühüm diqqət yetirir: “Siyasi əlaqələrimizin ən yüksək zirvəyə qalxması, beynəlxalq təşkilatlarda daim bir-birimizi dəstəklədiyimiz tarixi dostluğumuzun təməl prinsiplər üzərində qurulub”.


Millət vəkili tarixin bütün dövrlərində Türkiyənin Azərbaycanın yanında olduğunu vurğulayaraq bildirib ki, “Azərbaycanın sevinci bizim sevincimiz, kədəri bizim kədərimizdir” deyən Mustafa Kamal Atatürkün, 1918-ci ildə Azərbaycanı erməni-daşnak qüvvələrindən təmizləyən Ənvər Paşa və Nuru Paşanın adları nəinki təkcə Azərbaycanın, eyni zamanda bütün türk xalqlarının yaddaşında həmişəlik qalacaq.


Millət vəkili bir müddət sonra 100 illik yubileyi qeyd olunacaq Çanaqqala zəfərinə də toxunub.


“Prezident İlham Əliyevin Çanaqqala zəfərinin birlikdə qeyd olunması barədə qəti mövqeyi Türkiyə və Azərbaycan dövlətlərinin və xalqlarının bütün tarixi dövrlərdə olduğu kimi, bu gün də bir yerdə və həmrəy olduqlarını, həmin tarixi savaşından çıxan ibrət dərslərinin hər iki ölkə üçün xüsusi əhəmiyyət daşıdığının dünya ictimaiyyəti qarşısında nümayişinə xidmət edir”, - deyə o bildirib.


ADAU-nun prorektoru Fariz İsmayılzadə bu tədbirin məhz ADAU-da keçirilməsinə görə təşkilatçılara təşəkkürünü bildirib.


Tədbirdə iştirak edən Türkiyə Jurnalistlər Federasiyasının sədri Yılmaz Karaca bildirib ki, Türkiyə-Azərbaycan əlaqələrinin geniş tarixi var, iki ölkə daimi olaraq müxtəlif sahələrdə əməkdaşlıq edir: “Mədəniyyətlərarası inteqrasiyadan əlavə olaraq dövlətlərarası bir çox müqavilələr imzalanıb. Bütün bunlar göstərir ki, Azərbaycana Türkiyədən, Türkiyəyə Azərbaycandan əziz ikinci bir ölkə yoxdur”.


Millət vəkili Sahibə Qafarova çıxış edərək bildirib ki, bu gün Türkiyə ilə Azərbaycan arasında əlaqələr möhkəm təməl əsasında qurulur: “Türkiyə və Azərbaycan regional əməkdaşlıq prosesinin fəal və əsas söz sahibi olan iştirakçılarıdır”.


Daha sonra Prezident Administrasiyasının İctimai-siyasi məsələlər şöbəsinin tərkibində gənclər təşkilatları ilə iş sektorunun müdiri Vüsal Quliyev çıxış edərək bildirib ki, Azərbaycanla Türkiyə hər zaman bütün sahələrdə bir-birini dəstəkləyib və bu birlik bundan sonra davam edəcək.


Mətbuat Şurasının sədri Əflatun Amaşov Türkiyə ilə Azərbaycan arasında bütün sahələrdə əlaqələrin çox uğurla inkişaf etdiyini diqqətə çatdırıb: “Bu inkişaf üçün isə media əsas rol oynamalı, Azərbaycan və Türkiyə haqqında həqiqətlər dünyaya çatıdırılmalıdır. Eyni zamanda, hər iki ölkə ilə bağlı ikili standart yanaşmalarına, qərəzli mövqelərə qarşı birgə mübarizə aparılmalıdır”.


“İrəli” İctimai Birliyinin sədri Mirhəsən Seyidov çıxış edərək Türkiyə ilə Azərbaycanda fəaliyyət göstərən gənclər təşkilatlarının qarşılıqlı əlaqələrindən danışıb.


Tədbirdə YAP Gənclər Təşkilatının sədri Seymur Orucov, Dünya Türk Gənclər Birliyinin sədri Əkrəm Abdullayev, Dünya Türk Yazarlar Birliyinin sədri Əkbər Qoşalı çıxış ediblər.


Asif Nərimanlı

Xəbər lenti

DAHA ÇOX XƏBƏR