Nida.az
Onlar Qalib Gəlirlər
“Birinci xanım” institutu və ya biz niyə şanslıyıq?
Bütün qadınlar da kişilər kimi tarixin bir parçasıdır. Amma...
Az sayda qadın var ki, tarix yaza bilir...
Onlar ya əla diplomat doğulur, ya dünyada gözəl ana olmağın
örnəyini göstərir, ya da öz həyat yoldaşıyla çiyin-çiyinə dayanır,
ona arxa-dayaq olaraq tarix səhifələrinə ad yazdırmağı
bacarırlar.
Bütün bunlara eyni anda sahib olmaqsa o qadının möhtəşəmliyinə
sübutdur və buna çox nadir hallarda rastlanılır. Belə qadınların
var olduğu ölkələr də nadir ölkələr sayılmalıdır. Kişilər onsuz da
güclüdür. Əgər bir ölkənin üstəlik qadını da güclüdürsə, demək, o
dövlət, o toplum həmişə ayaqda qalmağı bacaracaq!
Azərbaycan kimi...
Diplomat, Ana, Həyat Yoldaşı və... Həyat Yoldaşına əsl
Yoldaş...
Azərbaycanın Birinci Xanımı Mehriban Əliyeva haqda çox söz
deməyə ehtiyac yoxdur. Onsuz da o, haqqında danışsınlar deyə
işləmir, fəaliyyət göstərmir. Bu, onun təbii halıdır, həyat
tərzidir...
“O, insanlara xoş münasibəti, xoş niyyəti, xoş ünsiyyəti
ilə seçilir. Bu, onun xasiyyətinin ən fərqləndirici cəhətidir. Mən
əminəm ki, Mehriban Əliyeva xeyriyyəçilik, insansevərlik, mərhəmət,
Azərbaycan xalqının mentalitetinə, mədəniyyətinə, düşüncəsinə,
əsrlərdən bəri formalaşan ənənələrimizə xas olan ən gözəl
keyfiyyətləri hər zaman davam etdirməyə çalışacaq”.
Prezident İlham Əliyevin söylədiyi bu fikirlər onun fəaliyyəti
haqqında hər şeyi, indiyə qədər deyilən və deyilməyənləri, bundan
sonra deyiləcəkləri ehtiva edir.
O, xeyriyyəçidir, insanları sevir və bütün bunları daxilindəki
mərhəmət hissinə söykənərək edir. Mərhəmətin siması ana simasıdır,
qadın simasıdır! O da məhz belə qadındır və Azərbaycan belə
qadınların olduğu nadir ölkədir...
Mehriban Əliyevanın adı bugünkü dünyamızda mahiyyət etibarilə
“Birinci Xanım” statusunun Parlaq Nümunəsi kimi tarixə keçir.
“Birinci xanım” statusu – hazırkı dünyada bu, öz anlamından xeyli uzaq düşüb.
Bunun arxasında nə insanlıq görəvi, nə bütün uşaqlara analıq
qayğısı, nə də bəşəri sevgi görünür. Halbuki XIX əsrdə yaranmış
“Birinci Xanım” institutu təkcə birinci şəxsin həyat yoldaşı olmaq
demək deyildi.
“Birinci xanım” anlayışı bir qadına sosial həyatda oynadığı rola,
insanlar üçün sərf etdiyi çabaya, ümumbəşəri dəyərlər naminə
çəkdiyi əziyyətə, dövlətlərarası münasibətlərə, dostluğa, mədəni və
humanitar əlaqələrə verdiyi töhfəyə, beynəlxalq sülh üçün
göstərdiyi səylərə və bütün uşaqlara yönəlik analıq qayğısına görə
şamil edilir. Və bütün bu sadalananlarla bahəm o, öz həyat
yoldaşının arxasında sona qədər dayanmağı
bacarmalıdır.
Bu, böyük enerji və fədakarlıq tələb edir. Və şübhəsiz ki,
daxili sevgi olmadan bunları etmək mümkün deyil.
...Bir yolu birinci dəfə zərurətdən, ikinci dəfə
məcburiyyətdən gedənlər tapılar. Amma bir yolu sona qədər getmək
ona ürəkdən bağlı olmaq deməkdir...
Görünən odur ki, çağdaş dünyada ən böyük dövlətlərin birinci
xanımları öz statuslarının tələb etdiyi işləri reallaşdırmağa ya
vaxt tapmır, ya da buna istəksiz yanaşırlar.
Və təəssüf ki, “birinci xanım” anlayışı istər yarandığı Amerikada,
istər Avropada, istərsə qoca Şərqdə yalnız birinci şəxsin həyat
yoldaşı olmaq kimi başa düşülür. Biz dünyanın əksər birinci
xanımlarının nəinki beynəlxalq arenada, heç öz ölkəsində də
insanlardan ötrü çaba sərf etmədiyinə şahid oluruq...
Misal üçün, dünyaya hökmranlıq etmək iddiasında olan Amerikanın
birinci xanımı Mişel Obama. Amerikalıların demokratiya adı altında
müharibə və ölümə qonaq elədikləri əfqan uşaqları üçün bircə dəfə
də olsun nəsə edibmi? Yaxud Əfqanıstanın qonşuluğunda yerləşən,
terrordan və amansız təbii fəlakətlərdən əziyyət çəkən pakistanlı
ailələrə baş çəkibmi?
Aydındır, okeanın o tayı buralardan çox uzaqdır... Amma nədənsə
məsələ maraqlar üzərində intişar tapanda məsafə çox sürətlə
qısalır.
Qərbli birinci xanımlar daha çox şou-proqramlarda rəqs etməyi,
qeyri-adi hərəkətlər etməyi, yaxud ərlərini qısqanmaları ilə
gündəmə gəlirlər. Avropa cəmiyyətləri üçün bu, məqbul ola bilər,
lakin belə imic “birinci xanım” anlayışının mahiyyətinə-məğzinə
uyğun gəlmir və bəşəriyyətin xilasına heç bir töhfə vermir.
Beləliklə, günümüzdə “birinci xanım” anlayışı bir çox hallarda
siyasi korrektələrə (politically correct) məruz
qalır. Yəni əvvəlki anlamını dəyişərək, tamam fərqli məfhuma
çevrilir. Məhz dünyanın bir çox birinci xanımlarının həyat tərzi bu
ictimai-siyasi terminolojinin deformasiyaya uğrayaraq “daha rahat
yaşayış mənbəyi” kimi başa düşülməsinə gətirib çıxarır.
...Güclü qadınlar həyata xüsusi missiya ilə gəlir və istər
ailə, istərsə bəşəriyyətin ən çətin situasiyalarında meydana qədəm
basırlar...
Mehriban Əliyeva da məhz qarmaqarışıq dünyanın dəyişkən
mənzərəsində öz fəaliyyəti ilə “birinci xanım” anlayışının
mahiyyətini bərpa edir, onu əsl mənasına, məğzinə, məcrasına
qaytarır, birinci xanımlığın yalnız rahat yaşayış tərzi ilə
assosiasiya olunmadığını sübuta yetirir.
Bir çox birinci xanımlar yolu birinci dəfə zərurətdən, ikinci dəfə
məcburiyyətdən gedir və üçüncü dəfə imtina edirlər. O isə
yolu sonuna qədər gedir və bunu daxilindəki sevgiyə söykənərək
edir. Bunun özü bəşəri hadisədir. Qlobal
düşüncənin bariz göstəricisidir.
O, anadır, O, ideal həyat yoldaşıdır, O, ölkəsi üçün bütün gücü ilə
çalışır və həyat yoldaşına dəstək verir, Onunla əl-ələ,
çiyin-çiyinə Azərbaycanı qələbəyə aparır. O, tarix yazır,
dahilər və qaliblər kimi...
Azərbaycan tarixi əsrlər boyu dahilərə və qaliblərə çox şahidlik
edib. Bu ölkə tarixin döyüş meydanlarında həlledici rol oynayan
güclü və mərd qadınları ilə də iz qoyub.
Şərqin ilk qadın diplomatı və yaşadığı coğrafiyanı min bir
bəladan qurtaran Sara Xatun da bu millətin övladı idi, öz ağlı və
mədəniyyətə qayğısı ilə tarixə düşən Möminə Xatun da. Düşmən
qarşısında sona qədər həyat yoldaşının yanında dayanan, ona güc
verən Bəyim Xatunun damarlarında da bu millətin qanı
axırdı...
Mehriban Əliyeva da günümüzdə Azərbaycanın fəxr etdiyi qadındır.
O, doğma ölkəsini dünyada təbliğ edir, onun tarixini,
mədəniyyətini, mənəviyyatını, təbiətini, hər daşını-qayasını
qoruyur. O, müstəqil Azərbaycana qarşı dünyanın apardığı ədalətsiz
savaşda xalqın liderinin yanındadır, ona güc verir...
O, Sara Xatun qədər diplomatdır.
Müasir diplomatiyada bir ölkənin xaricdə aparılan təbliğatı əsas
faktordur. Bu gün bir çox məsələlərin həllində ölkənin dünya
miqyasında tanınması xüsusi rol oynayır. Məhz Mehriban xanım
Əliyevanın fəaliyyəti nəticəsində Azərbaycan mədəniyyətinin, tarixi
həqiqətlərinin dünyada təbliği sürətli vüsət alıb. Artıq dünya
Azərbaycanı 10 il öncəki kimi görmür. Azərbaycanın adı dünyanın ən
mötəbər tribunalarında çəkilir...
Mehriban Əliyevanın diplomatik fəaliyyətində iki istiqamət
xüsusilə önəmlidir.
“Mədəni diplomatiya”. Diplomatiyanın bu üsulu bir ölkənin başqa ölkələr arasında mədəni üstünlüyü, fərqliliyi, həmçinin onun özünün mədəni imici deməkdir. Belə diplomatiya ölkənin siyasi əlaqələrinə xüsusi töhfə verə bilir. Misal üçün, ABŞ, Çin, Sinqapur, Yaponiya, Fransa və Rusiya kimi ölkələr mədəni diplomatiyadan siyasətdə geniş istifadə edirlər. Çin təcrübəsi xüsusilə diqqət çəkir. Bu ölkədə yaradılmış Konfutsi Fondunun 100-dən çox institutu dünyanın müxtəlif yerlərində fəaliyyət göstərməklə Çinin rəsmi siyasətində uğura töhfə verir.
Mehriban Əliyevanın rəhbərlik etdiyi Heydər Əliyev Fondu da Azərbaycanın mədəni diplomatiyasının inkişafında xüsusi rol oynayır. Fond və onun müxtəlif ölkələrdə yaradılan filialları Azərbaycanın təbliğatını aparır, “Azərbaycan Mədəniyyəti Günləri” keçirməklə ölkənin cəlbediciliyini artırır, onun tanınma arealını genişləndirir və rəsmi Bakının siyasi diplomatiyasına güclü dəstək olur.
Onun Azərbaycan sərhədlərindən kənardakı fəaliyyəti Dağlıq Qarabağ
həqiqətlərinin tanınmasında da xüsusi çəkiyə malikdir. Buna
yüzlərlə misal gətirmək olar. Təkcə “Qarabağ həqiqətləri” toplusu
ingilis, fransız, alman, rus, macar və yapon dillərində dünyaya əsl
həqiqətləri çatdırır.
Onun çoxşaxəli fəaliyyəti Azərbaycanla müxtəlif beynəlxalq
təşkilatlar arasında əməkdaşlığa da böyük dəstək olur.
“Mehriban xanım Əliyevanın fəaliyyəti sayəsində
Azərbaycanla UNESKO arasında sıx əməkdaşlıq yaranıb”.
UNESCO-nun keçmiş Baş direktoru Koişiro Matsuura onun haqqında belə
deyir.
Qurumun baş direktorunun müavini Marsio Barbosa isə
“Mehriban Əliyeva UNESCO-nun xoşməramlı səfirləri üçün
örnəkdir” deyə onu nümunə göstərir.
Aparılan mədəni diplomatiya özü ilə avtomatik olaraq iqtisadi
divident gətirir. Kiçik bir detal: Azərbaycan mədəniyyətinin
dünyada tanıdılması turist marağına səbəb olur. Ölkəyə gələn hər
bir turist isə büdcəyə əlavə vəsaitin daxil olması
deməkdir.
İctimai diplomatiya (public diplomacy). Hökumətlərarası münasibətlərdən fərqli olaraq, beynəlxalq kommunikasiyanın müxtəlif növləri ilə silahlanmış ictimai diplomatiyanın hədəfi xarici vətəndaş və xalqlardır. Bu diplomatiya nəticəsində dünyanın məşhur insanları ölkənin təbliğinə cəlb olunur və xalqlar üzərində daha effektli təbliğat qurulur.
Mehriban Əliyevanın uğurla həyata keçirdiyi ictimai diplomatiya nəticəsində beynəlxalq rəyə təsir edə bilən məşhur şəxsiyyətlərlə təmaslar qurulur və onların dili ilə Azərbaycanın təqdimatı aparılır. Buna bir misal kimi, Mstislav Rostropoviçin Azərbaycanla dostluğunu göstərmək olar. Onun vəfatından sonra hər il Bakı doğumlu maestronun adına Beynəlxalq Musiqi Festivalının keçirilməsi Azərbaycanın təbliği üçün mühüm addımdır. Bu, Rostropoviçsevərlərin Azərbaycana bağlılığını artırır və ölkəmizin dünya ictimai rəyində yerini möhkəmləndirir.
Mütəmadi olaraq keçirilən Bakı Beynəlxalq Humanitar Forumu da
Azərbaycanın ictimai diplomatiyasının ən uğurlu
nümunələrindəndir.
Belə nümunələr kifayət qədərdir və Mehriban Əliyevanın apardığı
ictimai diplomatik fəaliyyətin bu gün Azərbaycana yetərincə
dividend gətirdiyini artıqlaması ilə isbatlayır.
Mehriban Əliyevanın ölkə hüdudlarından kənardakı fəaliyyəti təkcə
Azərbaycanın təbliği ilə məhdudlaşmır. O, eyni zamanda bəşəri
dəyərlər üçün səy göstərir.
“Siz ölkənizin mədəniyyətini bütün dünyada təşviq etmək
üçün böyük işlər görmüsünüz. Siz, eyni zamanda, dünyadakı müxtəlif
mədəniyyətlər arasında qarşılıqlı anlaşmanın və onlara dözümlülük
əsasında yanaşmanın böyük tərəfdarısınız”, – deyə BMT-nin
Cenevrədəki bölməsinin baş direktoru Sergey Orconikidze onun
haqqında danışarkən bildirir.
O, sivilizasiyaların qovuşmasına və dünyanın sülh şəraitində
yaşamasına çalışır. Məhz buna görə 2006-cı ildə İSESCO-nun
xoşməramlı səfiri adına layiq görülüb.
Mehriban Əliyevanın təkcə Pakistanda həyata keçirdiyi işlər onun fəaliyyətində bəşəri çalarların nə dərəcədə güclü olması faktını təsdiqləyir. Təsadüfi deyil ki, Mehriban Əliyeva Pakistan İslam Respublikasının ali dövlət mükafatı “Hilal-e-Pakistan” ordeni ilə təltif edilib. Pakistanlı jurnalist Həmid Şahinin təbirincə desək, “kədəri sevincə döndərən İnsan”!..
O, bütün bunları tutduğu yola ürəkdən bağlı olduğu üçün edir.
O, Möminə Xatun qədər mədəniyyətin
qoruyucusudur.
Kədəri sevincə döndərən İnsan həm Azərbaycan, həm
də bəşəri mədəniyyətin xilası üçün əvəzsiz fəaliyyəti ilə seçilir:
“Biz azərbaycanlılar öz qədim və zəngin tariximizlə,
mədəniyyətimizlə fəxr edirik, Azərbaycanı dünyada əsrlər boyu
mədəniyyətlərin və sivilizasiyaların qovuşduğu sülhsevər, qədim və
bərəkətli bir torpaq kimi tanıtmaq istəyirik”, - deyə o
bildirir.
Hələ 1995-ci ildə Mehriban xanım Əliyevanın təşəbbüsü və rəhbərliyi ilə “Azərbaycan Mədəniyyətinin Dostları” Fondu yaradılıb. 1996-cı ildə Mehriban Əliyeva Azərbaycan mədəniyyətinin geniş təbliğ olunması məqsədilə Azərbaycan, ingilis və rus dillərində çap olunan “Azərbaycan - İrs” jurnalını təsis edib.
2003-cü ildə Azərbaycanın muğam sənəti UNESCO-nun
Qeyri-maddi-mədəni irs siyahısına daxil edilib. 2008-ci ildə
Abşeronun ən qədim insan məskənlərindən olan Qala qəsəbəsində
Dövlət Tarix-Etnoqrafiya Qoruğunun ərazisində Arxeoloji-Etnoqraf
Muzey Kompleksi yaradılıb. 2013-cü ilin iyul ayında Fransada
“Azərbaycan Kannda” mədəniyyət günləri təşkil olunub.
Mehriban Əliyevanın rəhbərliyi ilə Bakıda Müqəddəs Məryəm kilsəsi
yenidən qurulub, Strasburqda kafedral kilsəsi, Luvr muzeyi və
Versal sarayı təmir olunub.
Onun səyləri nəticəsində bu gün Azərbaycan muğamı UNESCO tərəfindən bəşəriyyətin qeyri-maddi irsinin şah əsəri elan edilib. Qobustan Dövlət Tarixi Bədii Qoruğu Ümumdünya İrs siyahısına salınıb. İçərişəhər Qoruğu UNESCO-nun təhlükədə olan Ümumdünya İrs siyahısından çıxarılıb. Aşıq sənəti və Novruz bayramı UNESCO-nun Qeyri-maddi mədəni irs siyahısında özünə yer alıb.
2012-ci ilin dekabrında tar sənəti və ifaçılığı da UNESCO-nun
Qeyri-maddi Mədəni İrsin Reprezentativ siyahısına düşüb.
Azərbaycanın şifahi xalq ədəbiyyatının və musiqi irsinin qorunub
saxlanılması, inkişaf etdirilməsi istiqamətindəki fəaliyyətinə görə
Mehriban Əliyeva 11 il öncə UNESCO-nun xoşməramlı səfiri
seçilib.
O, bəşəri mədəniyyətin qorunması istiqamətindəki fəaliyyətinə
görə “Qızıl Motsart” medalı ilə təltif olunub.
...Və hər şeydən öncə o, ANAdır, öz üç övladının,
bütün Azərbaycan uşaqlarının və hər yerdə qayğıya, sevgiyə ehtiyacı
olan körpələrin anası.
Alman klassiki Höte yazırdı: “Heç kim qollarında bir
uşaq tutan ana qədər cazibədar və bir neçə uşaq arasındakı ana
qədər hörmətli ola bilməz”.
Mehriban Əliyevanı tez-tez uşaq evlərində, qayğıya ehtiyacı olan
uşaqların arasında görmək olur. O sanki uşaqlarla nəfəs alır, bütün
uşaqlara öz doğma övladı kimi yanaşır.
“Uşaqlara qayğı nə qədər çox olsa, yenə azdır”, - Mehriban Əliyeva söyləyir.
Onun həyata keçirdiyi “Diabetli uşaqlara ən yüksək qayğı”,
“Talassemiyasız həyat naminə” kimi layihələr nəticəsində minlərlə
körpə ölümə qalib gəlib! Onun təşəbbüsü ilə tətbiq olunan amnistiya
aktları sayəsində minlərlə Azərbaycan vətəndaşı öz ailəsinə,
övladlarına qovuşub.
Mehriban Əliyeva bir ana kimi Azərbaycanda və dünyanın müxtəlif yerlərində uşaqlar üçün etdiyi xeyriyyəçilik fəaliyyətinə görə “Qızıl ürək” mükafatına layiq görülüb.
O, Bəyim Xatun qədər həyat yoldaşının, Azərbaycan Prezidentinin yanında dayanan, bu ölkənin qüdrətlənməsi uğrunda aparılan və ona qarşı ədalətsizcəsinə təşkil olunan mücadilədə Azərbaycanın liderinə güc verən qüdrətli və zərif qadındır.
2009-cu ildə “İTAR TASS”-a müsahibəsində deyirdi:
“Həyat yoldaşım üçün hədiyyə seçmək də asan deyil. O, çox
təvazökar adamdır, adətən, yalnız məişətdə zəruri olan şeylərdən
istifadə edir. Yadımdadır, həyat yoldaşımın 45 yaşı tamam olanda
ona nə bağışlamaq barədə uşaqlarla uzun müddət götür-qoy etdik.
Axırda uşaqlarla birlikdə şəkil çəkdirdik, bu şəkil üçün çərçivə
sifariş etdik və bu sözləri yazdırdıq: “Biz səni çox sevirik”. Bu,
onu çox mütəəssir etmişdi, çox razı qalmışdı və həmin fotoşəklimiz
o vaxtdan bəri həmişə onun stolunun üstündədir”.
Bu, yəqin ki, sadə və xoşbəxt ailənin ən gözəl fotosudur.
Xoşbəxtliyin tablosu. “Biz səni sevirik” - hər bir
atanın, ailə başçısının həmişə ehtiyacı olduğu söz...
“Ailədəki sevgi insanları sevməyin əsas
mənbəyidir”, - dahilərdən biri belə deyib.
Sirr buradadır: sadə çərçivəli bir fotonu və “biz səni sevirik”
ifadəsini doğum günündə ən böyük hədiyyə hesab edən sadə ailə
başçısı – Azərbaycan lideri öz xalqına sevgi ilə xidmət edir və bu
ölkəni zirvəyə doğru aparır.
Bu ölkə 20 il öncəki mənzərədən çox fərqlənir. Daha heç bir ata
əliboş getdiyi evində övladının gözlərinə utancla baxmır, daha heç
kəs küçədə qorxa-qorxa gəzmir, daha heç kim bu gününü yaşamaq üçün
gələcəyini xərcləmir. Bu ölkə dünyaya güclü olmağın, insana dəyər
verməyin, insanlığın, humanizmin nəzəriyyəsini təqdim edir.
Və bütün bunların arxasında güclü Azərbaycan lideri İlham Əliyev və
hər zaman onun yanında dayanan güclü Azərbaycan xanımı Mehriban
Əliyevanın zəhməti, xalq sevgisi, təvazökarlığı sezilir. Bu,
zənnimcə, dünyanın “bütün təbəddülatlara rəğmən bu kiçik
ölkə - Azərbaycan necə güclü olmağı bacarır?” və özümüzün
özümüzdən soruşduğumuz “biz niyə şanslıyıq?”
suallarının cavabıdır.
Dünyanın heç də həmişə sevmədiyi bu şanslı ölkə öz güclü lideri və
onun arxasındakı güclü-zərif xanımı ilə yenə tarix yazmağa
hazırlaşır.
...İlk Avropa Oyunlarına sayılı günlər qalıb və dünyanın gözü
Azərbaycandadır. Oyunların Təşkilat Komitəsi Mehriban Əliyevanın
rəhbərliyi ilə hər şeyi mükəmməl şəkildə həyata keçirib, artıq son
akkordlar vurulur.
“Onun “Eurovision” mahnı müsabiqəsinin təşkilat komitəsinə
sədrliyi uğurlu olub. Avropa Yayım Birliyi, eləcə də bu cür
tədbirlərin təşkilatçılarının fikirlərinə görə müsabiqə çox
müvəffəqiyyətlə təşkil edilib, son illərin ən yaxşı
müsabiqələrindən biri olub. Onun yaxşı təcrübəsi vardır” -
deyə Prezident İlham Əliyev Mehriban xanımın işini
qiymətləndirərkən bildirib.
Mehriban Əliyeva 2002-ci ildə Azərbaycan Gimnastika Federasiyasının
prezidenti seçilib. 2004-cü il dekabrın 28-də Azərbaycan
Respublikası Milli Olimpiya Komitəsinin IV Baş Məclisində MOK-un
İcraiyyə Komitəsinə üzv olub.
2003-cü ildə Beynəlxalq Gimnastika Federasiyasının Bədii
Gimnastika üzrə Dünya Kuboku yarışlarının, 2005-ci il Dünya
Çempionatının Azərbaycanda keçirilməsinə dair qərarın qəbul
olunmasında Mehriban Əliyevanın beynəlxalq idman aləmindəki nüfuzu
xüsusi rol oynayıb.
Onun idman sahəsində, xüsusilə beynəlxalq idman yarışlarının
təşkilində təcrübəsi kifayət qədərdir. Məhz bu təcrübəyə istinad
edən Azərbaycan Prezidenti ilk Avropa Oyunlarının təşkilini
Mehriban Əliyevaya həvalə etməklə seçimində yanılmadı.
XÜSUSİ QEYD: I Avropa Oyunlarının Azərbaycana
siyasi və iqtisadi xeyir verəcəyi şübhəsizdir. Lakin əldə
edəcəyimiz dividendlər sırasında diplomatik qazancımızı da xüsusi
vurğulamaq lazımdır. Söhbət Mehriban Əliyevanın indiyə qədər həyata
keçirdiyi mədəni və ictimai diplomatiyadan
gedir.
Oyunlar zamanı Azərbaycana istər idmançılar, istərsə müxtəlif
sektorlarda çalışan turistlər gələcək. Onların Azərbaycan
mədəniyyəti ilə əyani tanışlığı mədəni diplomatiyamızın və dünyada
mədəni imicimizin güclənməsi deməkdir.
Bununla yanaşı, həmin ərəfədə Bakıda olacaq idman dünyasının və
digər sektorun məşhur insanları ilə birbaşa təmaslar qurulacaq.
Beləliklə, ictimai rəyə təsir gücünə malik insanlar dünya
ictimaiyyətinə əyani şəkildə gördükləri, tanış olduqları
Azərbaycanı təqdim edəcəklər. Bu, əlavə xərc və əmək sərf etmədən
ictimai diplomatiyanın həyata keçirilməsidir.
... İnanmaq və onun uğrunda mübarizə aparmaq, nəticə əldə
olunanadək yorulmadan savaşmaq. Ölkə belə bir möhtəşəm
gedişə şahidlik edir: Azərbaycanın lideri və ona dəstək verən
birinci xanım inamla, inancla məqsədə doğru irəliləyir və... ONLAR
QALİB GƏLİRLƏR!!!
Nəticə ortadadır və biz gözümüzün önündə cərəyan edən bu gözəl mənzərəyə tamaşa edirik: Gözəl Günlərdir, Azərbaycan.
Aynur Camalqızı
-
Kriminal18:12
Tulin Ələkbərovanın sevgilisi tərəfindən döyülməsi faktı araşdırıldı: nəticə... - VİDEO
-
Kriminal17:32
Faciəvi şəkildə ölən tələbənin ailəsi məhkəməyə getməkdən imtina etdi - FOTO
-
Nida Təhlil 17:11
İrəvan “Krokus”la bağlı bəyanatı rədd etdi: Kreml necə cəzalandıracaq?
-
Sosial16:58
Bu avtomobillərlə taksi fəaliyyəti göstərmək qadağan edildi
-
Sosial16:36
Azərbaycanda sayğaclar ikiqat hesablayır - ŞOK İDDİA
-
Sosial16:08
Əli Əsədov yeni qərar imzaladı
-
Rəsmi xronika14:51
İlham Əliyev bu qanunu təsdiqlədi
-
Nida Xəbər 14:26
Yeni Kaledoniyada Azərbaycan bayrağı qaldırıldı