Nida.az
Müharibə şayiələrinin qaynağı, yaxud prezidentlər görüşəcəkmi?
ABŞ-ın Bakıdakı səfiri Robert Sekutanın ötən həftə verdiyi bəyanatda Azərbaycan və Ermənistan prezidentinin Dağlıq Qarabağ münaqişəsinin həlli istiqamətində növbəti görüşünün ola biləcəyi anlaşılır. Belə ki, ATƏT-in Minsk qrupunun həmsədrləri prezidentlərin görüşünün hazırlanması üçün regiona səfəri gözlənilir.
İndiki məqamda prezidentlərin görüşəcəyi ehtimalı az görünür. Çünki
Ermənistan 20 ildən artıq bir müddətdə sərgilədiyi
qeyri-konstruktiv mövqe dəyişməz olaraq qalıb. Lakin diqqətçəkən
daha bir məqam lokal müharibənin başlaması haqda məlumatların, daha
dəqiq desək, şayiələrin yayılmasıdır. Bu ehtimalları daha çox
erməni politoloqlar və Rusiya siyasətçiləri müdafiə edirlər. İrəli
sürülən ümumi fikir I Avropa Oyunlarından sonra rəsmi Bakının ərazi
bütövlüyünü bərpa etmək üçün genişmiqyaslı müharibəyə başlayacağı
haqdadır. Təbii ki, rəsmi Bakı torpaqlarının azad olunması üçün
ədalətli mövqe olan müharibə ehtimalını heç vaxt istisna etməyib.
Lakin indiki halda buna getmək Azərbaycanın maraqlarına xidmət
etmir. Çünki münaqişənin həlli üçün danışıqlar prosesi artıq üçüncü
onillikdir davam edir. Bu, bizə heç bir xeyir verməsə belə,
Azərbaycan danışıqlardan imtina etmir. Belə bir vaxtda müharibəyə
getmək ermənilərin “bizə təcavüz edirlər” kimi absurd iddialarını
möhkəmləndirə bilər. Digər tərəfdən, hazırkı geosiyasi situasiyada
da müharibə ehtimalı sərfəli deyil.
Lakin müharibə şayiələrinin arxasındakı məqamlar diqqət çəkir.
Ermənistanın bu tipli şayiələri yaymaqda məqsədi ilk
növbədə daxili çaxnaşmalara hesablanmış addımdır. İyunun 23-də
İrəvanda başlanan kütləvi etiraz aksiyalarının səngiməsində
“Azərbaycan hücum edə bilər” tezisinin Ermənistan rejiminə kömək
etmədiyini demək olmaz. Lakin məqsədlər bununla bitmir. Rusiya məhz
bu müharibə şayiələrindən sonra Ermənistan ordusunun
modernləşdirilməsi üçün 200 milyonluq kredit ayırdı. Bu etirazların
yatırılması qarşılığında ödənilən kompensasiya olmaqla yanaşı, eyni
zamanda, bu şayiələrə istinad olunaraq atılan addım hesab oluna
bilər.
Rusiyanın bəzi politoloqlarının bu şayiələri müdafiə
etməsinin arxasındakı məqam da 200 milyon dolları legitimləşdirmək
məqsədinə xidmət edir.
Belə bir məqamda Minsk qrupunun həmsədrlərinin regiona
səfər planlaşdırması və prezidentlərin görüşünün təşkili üçün
çalışması da diqqət çəkir. Hesab etmək olar ki, həmsədrlər ya
həqiqətən də bu şayiələrə inanaraq regiondakı sabitliyin
pozulmasının qarşısını almaq məqsədi güdürlər, ya da ortada
informasiya oyunu gedir və Minsk qrupu da bu oyunun iştirakçıları
sırasındadır. İkinci variant daha inandırıcı görünür. Bu,
ümumilikdə daha çox danışıqlar prosesinin imitasiyasını
gücləndirməyə hesablanmış addımdır.
Milli Məclisin üzvü Asim Mollazadə də hesab edir ki, danışıqlar
prosesi sadəcə imitasiyanı xatırladır: “Ermənistan sadəcə olaraq,
danışıqlar prosesində iştirak etdiyini göstərir və heç bir addım
atmır. ATƏT də üzvü olduğu ölkənin qonşu ölkənin ərazi bütövlüyünü
pozduğuna əhəmiyyət vermir. İşğalçı ölkəyə qarşı beynəlxalq hüquq
normaları əsasında sanksiyaların tətbiq olunması təcrübəsinin
olmasına baxmayaraq, Ermənistana qarşı heç bir addım atılmır. Buna
görə də Ermənistanın sülh üçün hansısa addım atacağını gözləmək
sadəlövhlük olardı. Minsk qrupunun həmsədrləri də faktiki olaraq
turist kimi davranırlar”.
Qərb Universitetinin professoru, politoloq Fikrət Sadıqov bildirib
ki, Robert Sekutanın bəyanatı Bakıda heç kimi sevindirmir: “Çünki
Minsk qrupunun 20 illik fəaliyyəti göstərdi ki, aparıcı dövlətlərin
heç biri bu münaqişə ilə məşğul olmaq istəmir. Konqres hər il
Ermənistanın Dağlıq Qarabağda separatizminin çiçəklənməsinə xidmət
edən milyonlarla dollar yardım ayırır. Bu məqamda ərazi bütövlüyü
pozulmuş Azərbaycanı hansısa güzəştlərlə dəvət etmək absurd
yanaşmadır”.
Politoloq hesab edir ki, prezidentlərin növbəti görüşünün baş tutması ehtimalı olduqca zəifdir.
Asif Nərimanlı
-
Sosial14:51
Videomu paylaşıb məni biabır etmək istəyirlər - Cahangir Əsgərov
-
Sosial14:16
Elmira Süleymanova vəfat etdi - FOTO
-
Cənubi Qafqaz13:40
İrəvandan İlham Əliyevin təklifinə cavab gəldi: Hazırıq!
-
Sosial13:03
Prokurorluqdan Nəsib Quliyevin intihar faktı ilə bağlı çağırış: bu məlumatlar...
-
Sosial12:25
Baş nazir təyin olunan Ceyhun Cəlilov kimdir? - Dosye
-
Əmlak11:55
Qərar verildi: Ev almaq istəyənlərə 55 min manat ödəniləcək
-
İdman11:25
Ulduzu sönən futbolçunun parlaq gözəli - FOTOLAR
-
Nida Xəbər 10:47
Ermənilər Azərbaycanın nəzarətinə keçəcək körpünü tutdular