Cəlilabadda qan vermə aksiyası keçirilib

Azərbaycanda 02 fevral "Gənclər günü" kimi qeyd olunur. Bu məqsədlə ölkədə gənclərlə bağlı müxtəlif tədbirlər keçirilir və gənclərin inkişafına xüsusi qayğı göstərilir.

Cəlilabad rayonunda gənclərlə bağlı keçiriləcək tədbirlər arasında rayon polisinin nümunəvi xeyirxah addımı hər kəsi heyran edib.

30 yanvar tarixində Cəlilabad rayon Polis şəbəsinin bütün əməkdaşları "Qan Donorları Assosiasiyası" İctimai Birliyi və Azərbaycan Qızıl Aypara Cəmiyyətinin təşkilatçılığı altında Azərbaycan gəncinə dəstək məqsədini nümayiş etdirərək irsi qan xəstəliklərindən (hemofiliya və talassemiyadan ) əziyyət çəkən uşaq, yeniyetmə və gənclərə təmənnasız qanvermə aksiyası keçirmişdir. Aksiyada Cəlilabad rayon İcra Hakimiyyətinin başçısı Əziz Əzizov, "Qan Donorları Assosiasiyasının" sədri Fuad Əsgərov, rayonun ictimai xadimləri, bir çox yerli idarə və təşkilat rəhbərləri, rayonun fəal gəncləri iştirak ediblər.

Qanvermə aksiyası Elmi-Tədqiqat Hematologiya və Transfuziologiya İnstitutunun Mərkəzi Qan Bankının əməkdaşlarının nəzarəti altında baş tutub. Aksiyada toplanan qanlar qan xəstəliklərindən əziyyət çəkən insanların müalicəsində təmənnasız istifadə olunacaqdır.