Siyavuş Novruzov: “Soçi görüşündə müsbət irəliləyişlər olub” – MÜSAHİBƏ

Milli Məclisin deputatı, Yeni Azərbaycan Partiyası (YAP) icra katibinin müavini Siyavuş Novruzovun Publika.az-a müsahibəsi:

– Avqustun 10-da Soçidə prezidentlər arasında növbəti görüş keçirildi. Görüşün nəticəsini hakim partiya necə qiymətləndirir?

– Bu görüşdə müsbət irəliləyiş ondan ibarətdir ki, Dağlıq Qarabağ münaqişəsi ən yüksək səviyyədə bir daha müzakirə olundu, hər iki tərəfin münaqişənin sülh yolu ilə həllini istəməsi barədə bəyanat verildi. Azərbaycan prezidenti də həmin görüşdə ölkəmizin mövqeyini qəti və sərt şəkildə ortaya qoydu. Cənab prezident İlham Əliyev münaqişənin həllində heç bir güzəştin olmayacağını Serj Sərkisyanın birbaşa üzünə dedi. Hazırda Ermənistanda daxili vəziyyət xeyli gərginləşib. Artıq Azərbaycanın qəti mövqeyini bilən Ermənistan əhalisi yaxşı başa düşür ki, onları çox böyük təhlükə gözləyir. Bunun nəticəsidir ki, Ermənistanda böyük çaşqınlıq yaranıb. Ermənistanın rəhbər şəxsləri bunun qarşısını almaq üçün Soçi görüşü ilə bağlı yalan informasiyalar verməklə məşğuldur. Ancaq Azərbaycan tərəfi hər zaman danışıqların gizli saxlanılmasının tərəfdarıdır. Hər zaman da biz danışıqlar barədə tam təfərrüatı ilə deyil, ümumi məlumatlar veririk. Lakin Ermənistan tərəfi bundan sui-istifadə edir. Bir daha qeyd edirəm ki, Soçi görüşündə cənab prezident İlham Əliyev Azərbaycan Silahlı Qüvvələrinin ən yüksək hərbi imkanlara və keyfiyyətlərə malik olduğunu Serj Sərkisyana xatırladıb. Müdafiə nazirimiz də həmçinin deyib ki, Azərbaycana qarşı bir daha təxribata cəhd olunarsa, o zaman nəinki işğal olunmuş rayonlarımız, o cümlədən Ermənistanın paytaxtı və digər ərazilərinə Azərbaycan Silahlı Qüvvələri tərəfindən hücum ediləcək. Bu bəyənatlar Ermənistan əhalisi arasında çox ciddi təlaş yaradıb. Bu baxımdan da Soçi görüşü bizim üçün ciddi əhəmiyyət daşıyır.

– Soçi görüşündən sonra Rusiya mediasında məlumat yayıldı ki, guya Azərbaycan tərəfi Qarabağın sülh yolu ilə həlli üçün Ermənistana 5 milyard vəsait təklif edir. Bu nə qədər doğru məlumatdır?

– Bütün bu məlumatlar dezinformasiyadır. Əgər bu barədə rəsmi məlumat yoxdursa, buna inanmaq lazım deyil. Burada söhbət nədən gedə bilər? Azərbaycanın bütün regionlarına kifayət qədər investisiya vəsaitləri qoyulur və regionların sosial-iqtisadi inkişafına dair müxtəlif layihələr həyata keçirilir. Dağlıq Qarabağ da Azərbaycanın bir bölgəsidir. Yəni, sabah Dağlıq Qarabağ işğaldan azad olunandan sonra Azərbaycan hökuməti bu bölgəyə də kifayət qədər investisiya vəsaitləri yatıracaq.

– Rauf Mirqədirov, Leyla Yunus, Arif Yunus və digər şəxslərin həbsinə müxalifət düşərgəsi etirazlar edir və bu həbslərlə razılaşmır. Bu etirazları necə qarşılayırsınız?

– Azərbaycanda heç kim səbəbi olmadan və qeyri-qanuni həbs olunmur. Kimliyindən asılı olmayaraq, həbs olunan həmin insanlar törətdikləri əməllərinə görə qanun qarşısında cavab verməlidir. İstər YAP-çı, istər müxalifətçi, istər dövlət, istərsə də qeyri-hökumət təşkilatı nümayəndəsi və ya jurnalist olsun. Onun peşə fəaliyyəti və siyasi mövqeyi törətdiyi cinayət əməlini ört-basdır edə bilməz. Azərbaycanda hər kəs qanun qarşısında bərabərdir. Ona görə də Leyla Yunus və onun həyat yoldaşı Arif Yunus, eləcə də digər saxlanılan şəxslər barəsində kəşfiyyat məlumatları var. Onların xarici ölkələrin, o cümlədən Ermənistan kəşfiyyatı ilə əlaqələri, qeyri-qanuni yollarla xaricdən küllü miqdarda maliyyə vəsaiti alıb ölkəmizdə insan hüquqları ilə bağlı vəziyyəti düzgün əks etdirməyən məlumatları yayması, təbliğ etməsi və Azərbaycanda ictimai-siyasi gərginlik yaratmağa yönəlik addımlar atması faktları artıq sübut olunub. Digər tərəfdən isə bu şəxslərin vətənə xəyanət etməsi və Ermənistan kəşfiyyatına Azərbaycanla bağlı məlumatları ötürməsi faktları sübut olunur. Bu insanları tanıyan adamların hamısı yaxşı bilir ki, Leyla Yunus, Arif Yunus və digərlərinə qarşı qaldırılan iddialar onların törətdiyi cinayətlərin mində biridir.

Ölkəmiz müstəqillik əldə edəndən indiyədək bu cür insanlar tərəfindən kifayət qədər Azərbaycan xalqına və dövlətinə edilmiş xəyanətlər müşahidə olunub. Hətta, buna əksər siyasi partiya rəhbərləri və funksionerləri şahid olublar. İndi hansısa qüvvələr Leyla Yunus, Arif Yunus və digər bu kimi şəxslərin tutulmasına başqa cür don geyindirmək, insanların şüuruna öz istəklərini yeritmək istəyirsə, bunun heç bir əhəmiyyəti yoxdur. Çünki Azərbaycan xalqı bu insanları çox yaxşı tanıyır. Bir məqamı da bildirim ki, hər zaman şəffaflıqdan danışan bu adamlar indi nədənsə aldıqları maliyyə vəsaitləri və qrantlar barədə ictimaiyyətə məlumat verməkdən çəkinirlər? Əgər kimsə hər hansı qrant layihəsinin qalibi olursa və maliyyə vəsaiti alırsa, o zaman bununla bağlı ictimaiyyətə məlumat verməlidir. Niyə gizlədirlər? Qrantlar haqqında əvvəlcədən elan verilməli, qalib gəldikdə isə ayrılan vəsaitin hesabatı olmalıdır. Bunların heç biri yoxdur və qəfildən xəbər tutursan ki, filan təşkilat filan yerdən milyonlarla vəsait əldə edib. Vəsaitin hansı məqsəd və hansı tədbirlər üçün ayrılması barədə yenə isə heç bir məlumat verilmir. Bütün bunlar da əsas verir ki, həmin vəsaitlər Azərbaycan əleyhinə işləyən qüvvələrin, o cümlədən bir sıra siyasi partiyaların maliyyələşdirilməsi üçün sərf olunub. Bu vəsaitlərin bir hissəsi də qrant verən təşkilatların özləri tərəfindən mənimsənilir. Ona görə də sözügedən təşkilatlar aldıqları qrant vəsaitləri ilə bağlı düzgün hesabat verə bilmirlər. Çünki ayrılan bu vəsaitin bir hissəsi qanunla vergilərə, Sosial Müdafiə Fonduna, sığortaya və digər yerlərə ödənilməlidir. Ancaq adıçəkilən qurumlara heç bir vəsait ödənilmir. Bu isə böyük qanun pozuntusudur. İstənilən xarici ölkədə, hətta ABŞ-ın özündə belə bu cür hallara qarşı qanunla ciddi ölçülər götürülür. Misal üçün, ABŞ, Fransa, Almaniya və digər Qərb dövlətlərində hər hansı bir müsəlman ictimaiyyətdən xəbərsiz qrant vəsait alaraq hər hansı bir layihəni həyata keçirmək istəsə, həmin təşkilatın fəaliyyəti dərhal dayandırılır və bütün əmlakına da həbs qoyulur. Bu cür təşkilatlar fəaliyyət göstərdiyi ölkədə, adətən, düşmən ölkənin kəşfiyyatı ilə əməkdaşlıq edir, onların mənafelərinə uyğun hərəkət edirlər. Bizim də əlimizdə kifayət qədər bu cür faktlar var ki, onlar Azərbaycanın əleyhinə fəaliyyət göstərirlər və ölkəmizdə ictimai-siyasi sabitliyi pozmağa çalışırlar. Ona görə də Azərbaycanda bu cür qanunsuz və antimilli təşkilatların fəaliyyətini araşdırmaq və bununla bağlı qanunla ölçü götürmək düzgün addımdır.

Vasif Həsənli