Vəkilovdan şeirlər...
Bizi izləyin

Digər

Vəkilovdan şeirlər...

Ramin Vəkilov Qazaxda doğulub, Bakıda Qafqaz Universitetinin ilahiyyat fakültəsini bitirib. Hazırda Türkiyədə Sakarya Universitetində magistr təhsili alır. Azərbaycanda məşhur soyadın daşıyıcısı olan Raminin iki şeirini təqdim edirik.

Hansı pəncərədən baxar dünyaya...

Sözümə, kəlməmə möhtac deyil ki,

Nə qədər doğmadır könlümə dərdim.

Əğyar oylağıdır, ayaq basammaz ,

Ar eylər gələmməz dilimə dərdim.

Ağlamam, ağlasam kimsə oyutmaz

Gözümün yaşını rüzgar qurutmaz.

Yollar məni yormaz, mənzil qorxutmaz -

Mənnən yol gedəcək ölümə dərdim.

Bilməm kimi sevə, kimləri saya,

Nələrdən usana, nələrdən doya...

Hansı pəncərədən baxar dünyaya,

Naz eylər cəfaya, zülümə dərdim?

Bütün sözlər deyilib

Ağlım buza dönübdü

Soyuğu sümüyümdə.

Yanağıma yad olan

Gözyaşım da çarəsiz.

Bütün sözlər deyilib

Bütün ahlar çəkilib...

Yorma özünü, dostum,

Bu gün hər şey keçərsiz...

Hər yetənə danışma,

Dərdin də oğrusu var.

Sonra nəyin qalacaq

Sən ay bəxtsiz, qədərsiz.

Sabahı gözləməklə

Keçirmişik bir ömür -

Budu sabah da oldu

Amma o da səhərsiz...

Oxumağa davam et
Reklam
Reklam

Gündəm