Ölkəyə mal əti idxalı artıb, avtomobil idxalı isə azalıb

Ölkəyə mal və quş əti idxalı artıb. Belə ki, 2014-cü ilin yanvar ayı ilə müqayisədə mal əti idxalı 5,2 dəfə, quş əti və əlavə ət məhsulları 3,1 dəfə, kərə yağı, digər süd yağları və pastaları 4 dəfə, təzə meyvə 4,8 dəfə artıb.

Publika.az xəbər verir ki, əvəzində kartof 55,7 faiz, təzə tərəvəz 41,9 faiz, çay 41,3 faiz, bitki yağları 35,3 faiz, xam şəkər və şəkər 58,1 faiz azalıb. Diqqəti çəkən, məişət kondisionerlərinin 56,2 faiz, paltaryuyan maşınların 28,1 faiz, minik avtomobillərinin 34,7 faiz, yük avtomobillərinin idxalının isə 71,5 faiz düşməsidir. İxracın strukturunda isə xam neft, neft məhsulları, təbii qaz, meyvə-tərəvəz, çay, bitki və heyvan mənşəli piylər və yağlar, şəkər, spirtli və alkoqolsuz içkilər, kimya sənayesi məhsulları, plastmas və ondan hazırlanan məmulatlar, emal olunmamış gön (təbii xəzdən başqa) və aşılanmış dəri, qara metallar və onlardan hazırlanan məmulatlar, alüminium və ondan hazırlanan məmulatlar üstünlük təşkil edib.

Onu da nəzərə çatdıraq ki, idxalın strukturunda quş ətinin idxalının artması diqqət çəkir. Belə ki, Azərbaycanda mövcud olan quşçuluq təsərrüfatlarında illik quş əti istehsalı ötən ilin oktyabr ayına olan məlumata görə, 127.5 min ton, yumurta istehsalı isə 1.1 milyard ədəd təşkil etmişdi. Bununla da respublikanın quş ətinə olan tələbatı 92 faiz ödənilmişdi. Lakin quş ətinin istehsalı prosesində kimyəvi maddələrdən istifadə edilməsi ilə bağlı mətbuatda yer alan xəbərlər yerli toyuqlara tələbatı azaldıb.

İqtisadiyyat şöbəsi