Nazirlik sağlamlıq imkanları məhdud uşaqları Türkiyədə müalicə etdirdi

“Əmək və Əhalinin Sosial Müdafiəsi Nazirliyi (ƏƏSMN) tərəfindən bu ilin ötən dövründə ümumilikdə 185 nəfər əlilliyi olan şəxs və sağlamlıq imkanları məhdud uşaq Türkiyənin Dənizli bölgəsindəki Nobel Tibb Mərkəzinə yola salınıb. Ümumilikdə il ərzində ötən illə müqayisədə daha çox şəxsin xaricdə bərpa müalicəsinin təşkili nəzərdə tutulub ki, bu da ölkəmizdə sosial proqramların yüksələn xətlə davam etdirildiyini bir daha təsdiq edir”.

Publika.az xəbər verir ki, bunu ƏƏSMN-nin Əlillərin sosial müdafiəsi siyasəti şöbəsinin müdiri Saday Abdullayev nazirlik tərəfindən Türkiyəyə ixtisaslaşmış bərpa-müalicəsinə yola salınmış və artıq bərpa-müalicə kursunu başa vuraraq geri dönən daha 20 nəfər sağlamlıq imkanları məhdud 18 yaşadək uşağın və valideynlərinin Heydər Əliyev adına Beynəlxalq Hava Limanında qarşılanması zamanı bildirib. S.Abdullayev əlavə edib ki, Nobel Tibb Mərkəzində yerli təbii müalicəvi resurslardan geniş istifadə edilməklə, peşəkar həkim-reabilitoloq personalı tərəfindən səmərəli fizioterapevtik müalicə metodları (hidroterapiya, palçıq müalicəsi, tibbi masaj, sudaxili məşqlər, mexanoterapiya, hidroprosessor və s.) tətbiq olunur.

Gülnar Əliyeva