Zibillikdə yaşayan keçmiş televiziya işçisi ilə bağlı nazirlikdən AÇIQLAMA

Yasamal rayonu, Abbas Mirzə Şərifzadə küçəsindəki zibillikdə köhnə taxtalardan qurulmuş daxmada yaşayan 22 yaşlı Əvəz Əsgərov sənədlərini əldə etdikdən sonra iş üçün Əmək və Əhalinin Sosial Müdafiəsi Nazirliyinə (ƏƏSMN) müraciət edə bilər.

Bu barədə Publika.az-a nazirliyin İctimaiyyətlə əlaqələr şöbəsinin müdiri Elman Babayev bildirib.

Onun sözlərinə görə, zibillikdə yaşayan bu gənci sığınacağa yerləşdirmək mümkün deyil:

“Əgər həmin şəxsin sənədləri yoxdursa, o, Daxili İşlər Nazirliyinə müraciət edib sənədlərini almalıdır. Bundan sonra işlə təmin olunmaq üçün Dövlət Məşğulluq Xidmətinə müraciət edə bilər. Sığınacaq və Qocalar Evi bu tip gənclər üçün deyil. O, əmək qabiliyyətli insandır və işləyə bilir. Sənədləri olsa, biz ona nazirlikdə olan vakant vəzifələrə uyğun iş tapmaqda köməklik göstərə bilərik”,- E. Babayev deyib.

Qeyd edək ki, 22 yaşlı Əvəz Əsgərov 1 yaşında ikən atasını, 11 yaşında isə anasını itirib. Zibilxanada yaşayan bu gənc əvvəllər ATV və “Space” telekanallarında çalışıb. Şəxsiyyət vəsiqəsini itirdiyindən daimi iş tapa bilmir.

Gülnar Əliyeva